1 Nayan, doen aldaw migtoladà si Jesus doton te kilid te lanaw. Ontò medita se otaw netipon diyà kandin, aw yan se doun te minalin sikandin doton te belangay pinondohan medapag te kilid te lanaw. Nenenoo sikandin kidoen, meneng mig-ogpà se kedita te otaw tinoledaan din doton te kilid te lanaw kidoen te tanà. 2 Penga niyan, medita se kebenalan intoladà din diyà kandan pineokit te tegdeyanan. Pegtoladà din, minikagi sikandin, 3 “Doen otaw dimoton te pawà amon menabog te benì, so yan se ketanem te pegpenanem din. 4 Pegsabog din, doen benì nesabog diyà te dalan, aw kinaen iyan te menge manok te kebenesan. 5 Doen heman benì nesabog diyà te tanà kebeto-betowan, aw wedad nael tanà kidoen. Timobò iyan te wedà kenamay, so kenà medalem se tanà. 6 Meneng pegkelangkaw te aldaw, nelanes aw nematay so wedad nael dalid. 7 Doen heman benì nesabog diyà te pinonoan te sagbet doen tigis. Timilles heman se sagbet doen tigis aw kinelep se menge tobò aw nematay. Yan wedad palos pongo niyan. 8 Meneng doen benì nesabog diyà te melambò tanà. Yan se timobò aw timilles, aw minongo. Doen minongo te ketlowan, aw doen minongo te keneman aw ginatos.”

9 Minikagi heman si Jesus, “Keilangan menenalan se kedita niyo doen telinga.”

10 Penga te pegkesayo te keditaan te otaw, doen diyà te sempolò teg dowa tinoledaan i Jesus aw menge otaw nesamà mig-insà diyà kandin tepad te tegdeyanan intoladà din. 11 Minikagi si Jesus, “Sikiyo se pinetega-tegahan te Timanem te kebenalan tepad te peglowan din. Meneng olò pineokit te tegdeyanan se pegtoladà ko te doma otaw 12 amon pengkey tomengteng dan, meneng eked dan kità te kedegdagan niyan. Pengkey domineg dan, meneng eked dan ketaga-taga te kebenalan niyan, so aw mekelabet dan, mengenganay dan diyà kanak aw pegwedaden ko se salà ininang dan.”

13 Minikagi si Jesus, “Nepela a so wedà kaw pekelabet te tegdeyanan sìyan. Aw wedà kaw pekelabet kenyan, eked kaw pekelabet te kedita te doma tegdeyanan ipegtoladà ko kenyo. 14 Nayan, se kedegdagan te otaw nenabog te benì, yan se otaw egtoladà te kagi te Timanem. 15 Se benì nesabog diyà te dalan, yan se iling te otaw toledaan te kagi te Timanem. Aw domineg dan kenyan, doen inangen i Satanas amon kelibelan dan se kagi te Timanem dinineg dan. 16 Nayan, se benì nesabog diyà te tanà kebeto-betowan, yan se iling te otaw domineg te kagi te Timanem, aw meluba dan, aw tomolò dan kenyan te eked kenamay. 17 Meneng aw domateng se kelimahan aw pemilangen dan tandà te pegpemenal dan te kagi te Timanem, tenanan dan se pinemenalan dan, so iling dan te tinanem wedad nael dalid. 18 Nayan, se benì nesabog diyà te pinonoan te sagbet doen tigis, yan se iling te otaw ontò domineg te kagi te Timanem intoladà. 19 Meneng penga niyan, wedad ontong dan so dàgen dan te ibeg dan tomaking te ketanem te keneyonan, aw ibeg dan megkeyaman amon meluba dan, aw menge doma ibeg dan. Yan se doun te wedad ontong dan diyà te kagi te Timanem dinineg dan. 20 Meneng se benì nesabog diyà te melambò tanà, yan se iling te otaw domineg te kagi te Timanem, aw menenalan dan kenyan. Doen ontong dan iling te intanem mongo te ketlowan, aw keneman aw ginatos.”

21 Minikagi si Jesus, “Aw menemtem se otaw te solò, eked din iyan sengkobi. Eked din heman elesi doton te siyong te katri. Meneng mèpiya aw isawol din iyan diyà te kelengkawan. 22 Iling heman kenyan, wedad in-eles songkani eked kitai te modi aldaw. Wedad heman imbolon songkani eked keindan te modi aldaw. 23 Keilangan menenalan se kedita niyo doen telinga.”

24 Minikagi heman si Jesus, “Keilangan toloen niyo se dinineg niyo. 25 Se otaw kominawà te kebenalan, yan se dogangan te kebenalan. Meneng se otaw eked kinawà te kebenalan, yan se pegwedadan te kebenalan.”

26 Minikagi heman si Jesus, “Iling kani se peglowan te Timanem. Aw menanem se otaw te benì doton te pawà din, 27 penga niyan, wedad ketetana din tepad te pegtilles niyan pengkey aldaw aw delem, so gayed tomobò aw tomilles se itanem din pengkey wedà din ketegahi se pegtobò niyan. 28 Gayed tomilles se itanem kidoen te tanà, so onà tomobò, aw penga niyan domawen, aw penga niyan mongo iyan. 29 Aw metesan se pongo, geniyen iyan te otaw, so dimateng den se aldaw te peglegani.”

30 Minikagi heman si Jesus, “Meg-indan a den kenyo tepad te peglowan te Timanem pineokit te tegdeyanan seini. 31 Doen benì ontò deitek intanem te otaw doton te pawà din. Pengkey wedad ekon palos benì labi pa deitek kenyan, 32 meneng penga te pegtanem din, timilles iyan, aw labi pa iyan dakel diyà te kedita te doma intanem din. Dakel se menge panga niyan, aw migsalag se menge manok kidoen.”

33 Migtoladà si Jesus kandan pineokit te medita tegdeyanan iling kenyan taman te egkelebetan dan. 34 Impeokit din te tegdeyanan se kedita te intoladà din kandan. Meneng gayed din ipeg-indan te menge tinoledaan din dalem te wedad doma dan aw eden se kedegdagan te kedita te tegdeyanan.

35 Pegkeapon te aldaw sìyan, minikagi si Jesus diyà te menge tinoledaan din, “Mèpiya aw matas kidon doton dipag te lanaw.”

36 Penga niyan, tinenanan dan se kedita te otaw netipon kidoen te kilid te lanaw, aw simakay dan heman te belangay tapay sinekayan i Jesus. Doen heman menge doma belangay timaking kandan. 37 Wedà kenamay, dinetengan dan te kelamag ontò mebandes, aw nekeawop se wayeg diyà te belangay, aw agpet dan neteled. 38 Meneng neketedogi si Jesus diyà te olonan kidoen te olin. Linoka dan sikandin aw minikagi dan, “Sir, tebangi kay, so melemes kidon den.”

39 Neloka si Jesus aw sinagda din se kelamag. Minikagi sikandin diyà te balud, “Pegkelinaw ka.”

Penga niyan, timunung se kelamag aw migkelinaw se lanaw. 40 Minikagi si Jesus, “Wedà pa kedì kelobos se pegsalig niyo kanak. Ikà niyo egkelemitan.”

41 Ontò dan nepela aw migpebelaw-belaway dan, kagi dan, “Ontò sikandin metolos, so pengkey kelamag aw balud timolò kandin.”