1 Penga niyan, mig-edop se ikelima anghil te bodyong din, aw doen kinità ko iling te bitoen kidoen te tanà, so nedagdag sikandin lekat te langit. Binegayan sikandin te konsì amon mekeowang te awang pesalo doton didalem te tanà wedad temanan te kedalem. 2 Penga niyan, mig-owang sikandin te awang diyà te tanà, aw limowà se ebel niyan iling te ebel lekat te ontò dakel seyaban. Neselibengan se aldaw aw migkengitngit so limowà se ebel lekat te awang diyà te tanà. 3 Penga niyan, limowà se medita dolon lekat te ebel, aw migpedanà dan diyà te tanà. Insogò dan amon megpeeleg te otaw pineokit te kesakit te seged dan iling te kesakit te inenipit. 4 Doen impunù kandan te eked dan bàti se sagbet, aw golay, aw kayo. Meneng mepakay aw ipeeleg dan olò se otaw wedad pengilala te Timanem kidoen te kilay dan. 5 Insogò se dolon amon megpelumun kandan taman te lima se bolan, meneng doen impunù kandan te eked dan imetayi se otaw. Iling te kesakit te pegbangà te inenipit se pelumun kandan. 6 Dalem te lima se bolan sìyan, ontò meibeg se otaw megpekematay, meneng eked iyan kebatog. Pengkey ibeg dan matay, meneng eked dan iyan kebatog.

7 Se lawa te dolon, iling te lawa te kodà sekayan te otaw meggira. Doen insangkob dan diyà te olo dan iling te korona ininang te bolawan. Iling te bawa te otaw se bawa dan, 8 aw melayat se logay dan iling te bayi. Iling te ngipen te liyon se ngipen dan. 9 Iling te kelasag ininang te kinis se kagpa dan. Peglayang dan, dimaging se pakpak dan iling te daging te ontò medita kelisa goyoden te kodà komagnan pesalo doton te gira. 10 Iling te ikog te inenipit se ikog dan, so mekeseged. Doen lalas diyà te ikog dan amon mekepelumun dan te otaw taman te lima se bolan. 11 Doen selotan te dolon nengibing kandan. Sikandin se anghil i Satanas aw pengolo te kedita dan kidoen te awang te tanà wedad temanan te kedalem. Ngadan din diyà te kagi te Hebreo si Abbadon. Ngadan din diyà te kagi te Griego si Apolyon. (Se kelebadan niyan, “Metibaet.”)

12 Nepenga den se tagnà puluk, meneng doen pa dowa mendad puluk domateng.

13 Penga niyan, mig-edop se ikeenem anghil te bodyong din, aw doen dinineg ko minikagi kidoen te epat seka te sonoganan ininang te bolawan kidoen medapag te onsedanan te peglowan. 14 Minikagi sikandin diyà te ikeenem anghil, “Pelowai se epat anghil i Satanas ginapos pa kidoen te dakel wayeg te Yofritis.”

15 Yan impelowà din se epat anghil sìyan. Tapay dan impetagad taman te omay seini, aw bolan seini, aw aldaw seini, aw oras seini, amon mengimatay dan te iketelo ketengà te otaw. 16 Inindanan a te kedita te sondalo dan simakay te kodà. Dowa gatos milyon se kedita dan. 17 Iling kani se bawa te kodà aw sondalo impekità kanak. Kinità ko se sondalo simakay, aw doen menge saol dan ininang te kinis melalag, iling te kelalag te apoy. Doen heman menge saol dan melonaw, iling te batek te bato meelagà iningedanan sapiro. Doen heman menge saol dan bolaw, iling te batek te esopri. Iling te olo te liyon se olo te kodà dan, aw lekat te bahà dan limowà se apoy aw ebel aw esopri. 18 Negelà se iketelo ketengà te otaw pineokit te telo kededàtan, sìyan apoy, aw ebel, aw esopri limowà lekat te bahà te kodà dan sìyan. 19 Doen lalas te kodà diyà te bahà aw diyà heman te ikog dan, so doen olo diyà te ikog dan iling te memokan, aw mekedaet iyan te otaw.

20 Se kedita te otaw nesamà, sìyan wedà imetayi te kodà mekedaet, wedà dan lengà te peg-inang dan te medaet. Wedà dan heman lengà te pegsimba dan te menge bosaw, aw pegsimba dan te inotaw ininang dan lekat te bolawan, aw selapì, aw galang, aw bato, aw kayo. Simalig dan kenyan pengkey wedà iyan pekekità, aw wedà pekeikagi, aw wedà pekeipanaw. 21 Wedà dan heman lengà te pegbonò dan, aw pegketoigan dan, aw peglayok dan te kenà kandan esawa, aw pegpenakaw dan.