1 Penga niyan, kinità ko se anghil migpedanà lekat te langit. Inibing din se konsì te awang te tanà wedad temanan te kedalem. Binitbit din heman se dakel sengkalì. 2 Dinakep din se nagan, yan se memokan gebii, si Satanas. Yan se ginapos din lamig mepenga se sebad melalan se omay. 3 In-agbel din doton te awang te tanà wedad temanan te kedalem, aw tinakep din iyan, aw pinengilelaan din se tetakep amon wedad meg-owang. Yan se ininang din amon eked pa peg-akal se nagan diyà te otaw te kedita te lonsod. Aw mepenga se sebad melalan se omay, ipelowà sikandin te eked kenamay.

4 Penga niyan, kinità ko se menge onsedanan te peglowan. Nenenoo kidoen se menge otaw insawol amon meg-okom. Kinità ko heman se pedowan te kedita te otaw inimetayan tandà te peg-indan dan tepad ki Jesus aw pegtoladà dan te kagi te Timanem, so wedà dan pegsimba diyà te menenanap mebolot aw diyà te inotaw impeinang din, aw wedà dan heman pegpeinang te pengilala kidoen te kilay dan aw belad. Inantay den dan, aw limowan dan doma i Cristo dalem te sebad melalan se omay. 5 Yan se tagnà peg-antay te Timanem te otaw lekat te nematay, so wedà entayi se menge doma otaw lekat te nematay singed aw mepenga se sebad melalan se omay. 6 Meluba aw egpenimanem heman se kedita te otaw entayen te Timanem te tagnà peg-antay din. Yan se otaw eked pesipati diyà te medaet otaw ipelumun te ikedowa pegkematay. Inangen dan menge sogounun i Cristo aw Timanem. Lomowan dan doma i Cristo dalem te sebad melalan se omay.

7 Aw mepenga se sebad melalan se omay, ipelowà si Satanas lekat te keleboso. 8 Aw lomowà sikandin, meg-akal te kedita te lonsod te keneyonan, pengkey Gog aw Magog, aw megtipon kandan amon megbolaw dan te Timanem. Ontò medita se sondalo metipon, aw eked dan kebilang iling te enay kidoen te dagat. 9 Peg-ipanaw dan, limanang dan diyà te kebelad te tanà, aw nelibedan se lonsod te Jerusalem nedekelan te Timanem te pedowan aw eg-ogpaan te menge sakop din. Meneng nedegdagan dan te apoy lekat te langit, aw neamin dan nematay. 10 Penga niyan, in-agbel se mig-akal kandan si Satanas doton te lanaw apoy aw esopri tapay inegbelan te menenanap mebolot aw telekeliwat din te kebolalaw. Elegen dan te aldaw aw delem te wedad palos temanan.

11 Penga niyan, kinità ko se mepotì onsedanan te peglowan ontò dakel, aw doen nenenoo kidoen. Ontò migpekediyò se tanà aw langit lekat kandin tandà te kelangkaw din, aw eked den dan kitai. 12 Kinità ko se kedita te otaw neantay den lekat te nematay, pengkey melangkaw aw sagkep. Timindeg dan diyà te monà te onsedanan te peglowan. Bineka se menge libro aw sìyan libro sinolatan te ngadan te kedita te otaw binegayan te kaling pedowan wedad temanan. Se insolat kidoen te menge doma libro, yan se indan aw eden se ininang dan te wedà dan pa kematay, aw yan se binasa te peg-okom kandan. 13 Peg-antay kandan, inantay se kedita te otaw lekat te nematay, pengkey nelemes dan kidoen te dagat, aw nekelowà se pedowan dan lekat te ogpeanan te otaw nematay. Inokom se kedita dan tepad te ininang dan te wedà dan pa kematay. 14 Penga niyan, in-agbel doton te lanaw apoy se kemetayun aw ogpeanan te otaw nematay, aw yan se temanan niyan. Se lanaw apoy, yan se iningedanan Ikedowa Kemetayun. 15 Se otaw wedà kitai se ngadan dan kidoen te libro sinolatan te ngadan te kedita te otaw binegayan te kaling pedowan wedad temanan, yan se in-agbel doton te lanaw apoy.