1 Penga niyan, impekità din kanak se wayeg iningedanan Wayeg Mekebegay te Kaling Pedowan. Ontò iyan metìngaw iling te ispiho, aw egtebol kidoen te onsedanan te Timanem aw Karniro. 2 Eg-okit se wayeg diyà te tengà-tengà te kersada te lonsod sìyan. Kidoen te kilid te wayeg, doen menge kayo intanem iningedanan Kayo Mekebegay te Kaling Pedowan. Egpongo iyan te mekesempolò teg dowa te kelikit te omay, so egpongo te kelikit te bolan. Se dawen heman niyan, yan se mekebolong te kedita te otaw. 3 Wedad tinèyogan te Timanem kidoen.

Kidoen se onsedanan te Timanem aw Karniro, aw simbahen se Timanem te kedita te sakop din. 4 Komità dan te bawa din, aw solatan se kilay dan te ngadan din. 5 Wedad delem kidoen, aw wedad kekemowan dan te solò aw aldaw kidoen, so keenyagan dan te Timanem Pengolo dan. Lomowan dan doma te Timanem te wedad temanan.

6 Minikagi se anghil kanak, “Ontò benal se kedita te kagi dinineg no, aw metoman iyan meinang, so se Timanem migpekeliwat te kagi din pineokit te telekeliwat din gebii, yan se Pengolo simogò te anghil din amon ketegahan te kedita te sakop din aw eden se meinang te eked kenamay.”

7 Minikagi se Pengolo, “Na, lomikò a te eked kenamay.”

Ontò meluba se kedita te otaw tomolò te kagi ingkeliwat pineokit te libro seini.

8 Siak si Juan, aw dinineg ko aw kinità ko se kedita te insolat ko dini. Penga te pegdineg ko kani aw pegkità ko kani, limongken a diyà te anghil migpekità kani kanak amon simbahen ko. 9 Meneng minikagi sikandin, “Ikà egsimba kanak, so pengkey siak, aw sikona, aw kedita heman te doma no telekeliwat te kagi te Timanem, aw kedita te otaw tomolò te kagi insolat kidoen te libro seini, egtolò se kedita tadon te Timanem. Yan keilangan Timanem olò se simbahen nikaw.”

10 Minikagi heman sikandin, “Ikà eg-eles te kagi ingkeliwat den kamno aw insolat no diyà te libro seini, so metoman iyan meinang te eked kenamay. 11 Aw metoman iyan, pebeyai se menge otaw gayed eg-inang te medaet aw wedad yàyà, so yan se pinemallì dan. Meneng keilangan gayed tomayod meg-inang te mèpiya aw metòlid se kedita te otaw egpenimanem.”

12 Minikagi se Pengolo, “Na, lomikò a te eked kenamay, aw doen ontong ibegay ko diyà te kedita te otaw tepad te ininang dan. 13 Siaken se Alpa aw Omiga, siaken se keteboan aw temanan te kedita, so monà a pa diyà te kedita, aw modi a pa heman diyà te kedita.”

14 Ontò meluba se kedita te otaw neonawan lekat te salà dan, so yan se otaw mepakay komaen te pongo te kayo iningedanan Kayo Mekebegay te Kaling Pedowan, aw mepakay heman aw mawop dan te lelebangan pesalo doton te lonsod. 15 Meneng se kedita te otaw eg-inang te mekeyàyà, aw egketoigan, aw eglayok te kenà kandan esawa, aw metibonò, aw egsimba te kenà benal timanem, aw kedita te otaw egkebolalaw aw egkeibeg te kebolelawan, yan se eked pekeawop te lonsod.

16 “Siak si Jesus se simogò te anghil ko doton kamno amon ikeliwat se kagi ko seini diyà te kedita te otaw egpemenal aw egsimba kanak. Siak se bowad-bowad i David impakang gebii. Siak heman se meanyag bitoen te medapag aldaw.”

17 Egtawal se Espiritu Santo aw esawa te Karniro, kagi dan, “Ayas kaw diyà.”

Aw kedita te otaw menenalan, keilangan tomawal dan heman diyà te doma otaw, “Ayas kaw heman diyà.”

Pengkey sinu se otaw nelao meibeg minem, doen wayeg ibowang kandin mekebegay te kaling pedowan.

18 Seini se ipunù ko diyà te kedita te otaw domineg te kagi ingkeliwat pineokit te libro seini. Aw doen otaw megdogang te libro seini, idogang te Timanem diyà kandin se kedita te kededàtan in-indan ko dini te libro seini. 19 Aw doen otaw mengabat te kagi lekat te libro seini, ebaten heman te Timanem lekat kandin se ontong din, sìyan pongo te Kayo Mekebegay te Kaling Pedowan. Ebaten heman te Timanem lekat kandin se ontong din te peg-ogpà din kidoen te lonsod eg-ogpaan te Timanem, sìyan in-indan ko kidoen te libro seini.

20 Si Jesus se netaga-taga te benal se kedita te insolat ko, aw minikagi sikandin, “Ontò a lomikò te eked kenamay.”

Metoman iyan. E Jesus, Pengolo ko, ibeg ko lomikò ka den.

21 Ibeg ko, kedita niyo sakop te Timanem se tebangan te Pengolo tadon si Jesus. Metoman iyan.