14
Is Turuǥan wey Pemilya ni David diyà te Jerusalem
(2 Samuel 5:11-16)
1 Dutun he timpu, midsuǥù si Hadì Hiram he hadì te Tyre te menge menunudtulà diyà te ki David duma is menge pandey, menge tigsimintu, wey mibpeuwit te menge kayu he sidru, su ebengunen dan is turuǥan ni David. 2 Ne zutun nesavut ni David he iyan is Nengazen midsavuk kandin he hadì te Israel wey iyan mibpeuswag te ginhedian din para te menge etew zin he menge Israilihanen.
3 Diyà te Jerusalem, mezakel pa is mid-esawa ni David, ne neumanan is menge anak din. 4 Iyan heini ngazan te menge anak din he maama he neetew ziyà: si Shamua, Shobab, Natan, Solomon, 5 Ibhar, Elishua, Elpelet, 6 Noga, Nefeg, Jafia, 7 Elishama, Beeliada, wey si Elifelet.
Nezaag ni David is menge Filistihanen
(2 Samuel 5:17-25)
8 Hein netuenan te menge Filistihanen he iyan si David nepilì he hadì te tivuuk he Israel, midtiǥum dan is langun he menge sundaru zan para te kedakep kandin. Piru netuenan ni David, ne midsinuǥung din nasì sikandan. 9 Dutun, midsurung te menge Filistihanen is Suǥud he Refaim. 10 Umbe, nenginginsà si David te Megbevayà, “Edsurungen dey ve is menge Filistihanen? Ibpezaag nu ve sikandan kenami?” Midtavak is Nengazen diyà te kandin, “Uya, ǥenat kew en, su ibpezaag ku sikandan keniyu.” 11 Ne zutun midhendiyà si David wey is menge sakup din te Baal Perazim, ne zutun nezaag dan is menge Filistihanen. Migkaǥi si David te, “Migerà te Megbevayà is menge kuntada ku he henduen be te mibeyaan te zekelà he zalem, ne migamit e zin para meǥerè dan.” Umbe migngezanan haazà he lugar he Baal Perazim.
12 Ne mid-ewaan te menge Filistihanen is menge ed-ezapen dan dutun, ne insuǥù ni David he edtutungen haazà.
13 Mid-umanan surunga te menge Filistihanen is Suǥud he Refaim. 14 Ne mid-uman mebpenginginsà si David diyà te Megbevayà, ne midtavak is Megbevayà diyà te kandin te, “Kenè niw ǥègaani te edsurung, kekenà, linguti niw sikandan ne surunga niw ziyà te uvey te menge kayu he balsam. 15 Emun egkezineg niw he henduen te ebmartsa is menge sundaru ziyà te zapit te zivavew zutun te menge kayu he balsam, ne surunga niw en su iyan tuus heeyan he iyan a edhuna te kedsurung niw te menge Filistihanen.” 16 Umbe, midtuman ni David is insuǥù kandin te Megbevayà, ne nengepatey zan is menge Filistihanen puun te Gibeon pehendiyà te Gezer.
17 Ne tenged kayi nevantug si David diyà te minsan hendei ne mibpengelinteuwan te Nengazen he mengehandek kandin is langun he menge nasyun.