1 Dutun he menge andew he si Samuel ebpenilbi en te Nengazen, dizalem sikandin te kedumala ni Eli, ne mezelag dà ebpekidlalag is Nengazen, wey deisey zà is egkengelewasan. 2 Sevaha zutun he mezukilem, edlipezeng si Eli ziyà te ruǥu zin. Dutun he timpu kenè en utew ebpekaahà si Eli. 3 Ne si Samuel ziyà edliplipezeng te valey te Nengazen he zutun sikan is Kavan te Kebpekid-uyun. Is sulù te Megbevayà, wazè pa zutun evuki ne 4 mid-umew sikandin te Nengazen. Midtavak si Samuel te, “Hengkey, datù?” 5 Ne mibpelelaǥuy sikandin pehendiyà te ki Eli is mid-insà te, “Hengkey, datù, maan is ed-umawen a kenikew?” Ke si Eli te, “Wazè ku sikew umawa. Likù ke en diyan wey medlipezeng.” Ne zutun midlikù diyà te hizeǥaan din su edlipezeng.

6 Mid-uman en maan umawa sikandin te Nengazen, “Samuel! Samuel!” Mid-enew si Samuel ne midhendiyà te ki Eli, ke sikandin te, “Hengkey, datù, maan is ed-umawen a kenikew?” Midtavak si Eli te, “Mama, wazè ku sikew umawa, likù ke en wey med-uman medlipezeng.” 7 Dutun he penahun wazè pa mekilala ni Samuel is Nengazen su wazè pa meulaula is nekidlalag kandin is Nengazen.

8 Mid-umew sikandin umani te Nengazen te ketetelu. Mid-enew si Samuel ne midhendiyà te ki Eli is egkaǥi te, “datù, maan is ed-umawen a kenikew?” Ne zutun netuenan ni Eli he iyan ed-umew ki Samuel is Nengazen. 9 Ne migkeǥiyan din si Samuel te, “Likù ke en diyan wey medlipezeng, ne emun ed-umanan ke zin te ed-umew, ne keǥiyi nu te, ‘Nengazen, kaǥi kad, su siak is suluǥuen nu ebpemineg.’ ” Ne zutun midlikù si Samuel diyà te hizeǥaan din.

10 Midhendiyà is Nengazen te ki Samuel he midhitindeg. Ne iring ded te nehuna he mibeelan din, mid-umew zin en maan si Samuel te, “Samuel, Samuel.” Ne migkaǥi si Samuel te, “Kaǥi ka, Nengazen su ebpemineg a is suluǥuen nu.” 11 Migkaǥi is Nengazen te, “Timan-i nu, kenè ne egkeuǥet, duen ebeelan ku kayi te Israel. Ne is langun he ebpekezineg kayi, ne utew en egkeherati. 12 Emun egkeuma haazà he andew ne ebeelan ku is langun he migkaǥi ku he ebpekesuǥat te pemilya ni Eli. 13 Su mibpetizeenan ku sikandin he edsilutan ku is pemilya zin taman te taman tenged te mibpesagdan din is menge anak din te kebaal te salà he utew mekeeled-eled minsan netuenan din haazà. 14 Umbe, impenangdù ku he is salà te pemilya ni Eli taman te taman ne kenà egkepesaylu pinaaǥi te kebpemuhat te minsan hengkey he menge pemuhat.”

15 Nekelipezeng si Samuel taman te egkepawà, ne mibpuwasan din is gemawan te valey te Nengazen. Egkahandek si Samuel he ebpenudtul ziyà te ki Eli mehitenged te impahayag te Nengazen diyà te kandin. 16 Ne mid-umew zin te, “Samuel, anak.” Midtavak si Samuel, “Hengkey, datù.” 17 Migkaǥi si Eli te, “Hengkey is migkaǥi kenikew te Nengazen? Kenè nu i-eles kedì. Utew mereǥen is silut kenikew te Megbevayà emun kenè nu ibpenudtul is langun he migkaǥi zin kenikew.” 18 Ne zutun midtudtul ni Samuel is langun. Wazè din in-eles. Ke si Eli te, “Iyan sikandin kes Nengazen; is egkeisip din he meupiya, iyan ebeelan din.”

19 Hein dekelè en si Samuel pedayun is kegiyahi kandin te Nengazen; ne minsan hengkey is egkeǥiyen ni Samuel mibpengelinteuwan te Nengazen he metuman. 20 Umbe, migkilala sikandin te tivuuk he Israel puun te Dan pehendiyà te Beersheba he sevaha sikandin he ebpeneuven te Nengazen. 21 Ne pedayun is kebpezeyag te Nengazen ki Samuel ziyà te Shilo pinaaǥi te kebpekidlalag kandin.