1 Neuma is timpu zutun, ne migkeǥiyan te Nengazen si Samuel te, “Sengemenu ves keluǥayad is kedlalew nu ki Saul? Id-awè ku en sikandin he hadì te Israel. Guntaan penua nu te lana heeyan is teleǥuey nu he sungey, ne hendiyè ka te ki Jesse he tig-Betlehem, su mibpilì ku is sevaha zutun te menge anak din he iyan egkehimu he hadì.” 2 Ne migkaǥi si Samuel te, “Ebmenumenu e ve he edhendiyà? Kela ke metueni heini ni Saul ne kela ke himetayi e zin.” Migkaǥi is Nengazen te, “Uwit ka te zumeraǥa he vaka ziyà te Betlehem, ne keǥiyi nu is menge etew ziyà he midhendutun ka su ebpemuhaten nu is Nengazen. 3 Ne hinggata nu si Jesse te kebpemuhat nu, ne ebpenuruen ku sikew te ebpeveelan ku kenikew. Ne idtezù ku kenikew is etew he mibpilì ku he iyan egkehimu he hadì. Ne lenahi nu is ulu zin.”

4 Midtuman ni Samuel is insuǥù kandin te Nengazen. Hein nekeume en sikandin diyà te Betlehem, ne midsinuǥung kandin is menge etew he edumala te inged is ebpengerkeren su egkengehandek. Mid-insè dan te, “Meupiya ve is tuud nu te kedhedini?” 5 Midtavak si Samuel te, “Uya, midhendini a su ebpemuhat a ziyà te Nengazen. Mebpekelumpiyu kew ne zuma kew kedì te ebpemuhat.” Ne midhimu ni Samuel is tulumanen para melumpiyuwi si Jesse wey is menge anak din, ne midhinggat din sikandan te kebpemuhat.

6 Hein nekeuma zan dutun te pemuhatà, ne naahà ni Samuel is sevaha zutun he anak ni Jesse he egngezanan ki Eliab, netaǥù te isip din is, “Siguradu iyan en heini kes mibpilì te Nengazen he egkehimu he hadì.” 7 Piru migkaǥi is Nengazen diyà te ki Samuel te, “Kenè nu iyan ahaa is dagwey wey is kelangkew. Is tutuu wazè ku sikandin pilia. Su is ed-ahaan ku ne kenà iring te ed-ahaan te etew. Su is etew iyan ed-ahaan din is dagwey, piru siak iyan ed-ahaan ku is gehinawa.” 8 Ne mid-umew ni Jesse is anak din he si Abinadab ne impehendiyè din te ki Samuel. Migkaǥi si Samuel te, “Kenà sikandin kes mibpilì te Nengazen.” 9 Ne impehendiyè en maan ni Jesse si Shama te ki Samuel. Migkaǥi si Samuel te, “Kenà sikandin kes mibpilì te Nengazen.” 10 Ne hein pudu en ingkepehendiyà ni Jesse te ki Samuel sikan is pitu he anak din, migkaǥi si Samuel te, “Wazà sevaha kandan he mibpilì te Nengazen.” 11 Mid-insaan ni Samuel si Jesse te, “Iyan dè be sikandan menge anak nu?” Midtavak si Jesse te, “Duen pa, is tinengkezan, piru wazà kayi su ebantey sikandin te kerehidu.” Migkaǥi si Samuel te, “Ipehendini, su kenè tew edhimuwen is kebpemuhat emun kenà ebpekeuma kayi.” 12 Umbe, mibpevayaan ni Jesse si David, ne impehendutun. Metaid he meriǥàriǥà is kedlulundis din, wey meupiya he ed-ahaan is mata zin. Migkeǥiyan te Nengazen si Samuel te, “Lenahi nu en is ulu zin su iyan en sikandin nepilì ku.” 13 Ne migkuwa ni Samuel kes lana ne midlenahan din is ulu ni David he zutun te etuvangan te menge suled din. Ne puun dutun mid-ulinan si David te Mulin-ulin te Nengazen. Ne mid-ulì human si Samuel ziyà te Rama.

14 Dutun he timpu mid-awà diyà te ki Saul is Mulin-ulin te Nengazen, ne midrasey sikandin te mezaat he mulin-ulin he midsuǥù te Nengazen. 15 Migkaǥi is menge suluǥuen ni Saul te, “Ibpaantus ka te mezaat he mulin-ulin he midsuǥù te Megbevayà. 16 Umbe, Mahal he Hadì, tuǥuti key te kebpen-ahà te metau he edtukar te alpa, su emun edsemuken ke en maan te mezaat he mulin-ulin he midsuǥù te Megbevayà, idtukar zin is alpa ne ebmeupiya maan is gehinawa nu.” 17 Umbe, migkeǥiyan ni Saul is menge suluǥuen din te, “Uya, pen-ehè kew te etew he metau he edtukar te alpa ne zumaha niw kayi te kedì.” 18 Migkaǥi is sevaha zutun te menge suluǥuen din te, “Duen neehè ku he sevaha he anak ni Jesse he tig-Betlehem ne metau he edtukar te alpa. Gawas pa zutun, mevurut sikandin wey metau he ebpekidtebek. Mataid sikandin wey metau he ebpengaǥikaǥi, wey edtevangan sikadin te Nengazen.”

19 Midsuǥù si Saul te menge menunudtulà diyà te ki Jesse ne ebpekeǥiyan te, “Ibpehendiyà te kandin si David he tigbantey te menge kerehidu.” 20 Umbe, midsuǥù ni Jesse si David diyà te ki Saul he ed-uwit te menge gasa: sevaha he asnu he migkergahan te menge supas, sevaha he teleǥuey te vinu he lundis he nepenù te vinu, wey sevaha he nati he kambing.

21 Ne hein diyè en si David te ki Saul, ne mibpenilbi sikandin ki Saul. Nesuatan utew sikandin ni Saul, ne midhimu sikandin ni Saul he tig-uwit te ǥumaan din. 22 Ne mibpeuwitan ni Saul si Jesse te lalag he edhenduen te, “Tuǥuti nu si David he ebpedayun he ebpenilbi kedì.”

23 Uman ebpekeuma ziyà te ki Saul is mezaat he mulin-ulin he edsuǥuen te Megbevayà, ne egkuwaan en maan ni David kes alpa zin ne idtukar zin. Ne egkeulian segugunà ne ed-awà diyà te kandin kes mezaat he mulin-ulin.