1 Hein midlikù si Saul puun te kebpekidtebek te menge Filistihanen ne netudtulan sikandin he ziyà si David te sibsivayan te En Gedi. 2 Umbe, mibpilì sikandin te 3,000 he etew puun te tivuuk he Israel he midhipanew para ebpen-ahà ki David wey te menge sakup din dutun te menge betuwen he ed-ubpaan te menge kambing he menge leew. 3 Nekeuma si Saul zuen te tudil te menge kerehidu he kilid te zalan he zuen dutun surung. Midseled dutun si Saul su ebpekeindes. Dutun bes te surung med-eles si David wey is menge sakup din. 4 Migkeǥiyan te menge sakup din si David te, “Iyan en heini penahun he migkaǥi te Nengazen he ibpalad din kenikew is kuntra nu ne iyan ke en bayàbayà ke hengkey is ed-ul-ulahan nu kandin.” Ne zutun mibpenanap si David pehendiyà te ki Saul ne wazà metukawi ni Saul is kebpitasi ni David te kilid te kumbalè ni Saul. 5 Hein nepasad ne mibmesakit is gehinawa ni David te mibeelan din he mibpitas te kilid te visti ni Saul. 6 Migkeǥiyan din is menge sakup din te, “Deyzey pezem ke kenà medtuǥut is Nengazen he mekevaal a te kenà meupiya ziyà te egalen ku, he mibpilì te Nengazen he edhadì.” 7 Ne pinaaǥi zutun te migkaǥi ni David midawey zin is menge sakup din, ne wazè din tuǥuti te kedhimatey ki Saul. Ne migawas si Saul zutun te surung ne migenat.

8 Ne migawas si David dutun te surung ne mid-umew zin si Saul, “Mahal he Hadì!” Midlilingey si Saul, ne midluhud si David su edtahud kandin. 9 Migkaǥi si David diyà te ki Saul te, “Maan is ebpemineǥen nu is menge etew he edsumbung kenikew he duen ku pelanu te kedhimatey kenikew? 10 Neehè en guntaan he andew ke mibmenumenu te Nengazen is paaǥi te kebpelaza zin kenikew kayi te kedì dutun te seled te surung. Migkeǥiyan a te menge zuma he sakup ku te himetayi nu en, piru wazè ku sikew himetayi. Migkeǥiyan ku sikandan te kenè ku egketikaan te edhimatey is egalen ku tenged te mibpilì sikandin te Nengazen he edhadì. 11 Amà, ahaa nu is kilid te kumbalè nu he egewezan ku. Mibpitas ku piru wazè ku sikew himetayi. Ebpesavut heini he wazè ku tuyù te kedezaat kenikew wey kebpekidsukulà kenikew. Wazè a mekesalà kenikew piru edtinguhaan nu is kedhimatey kedì. 12 Berakat he iyan is Nengazen edhukum kenita te zezuwa, ne berakat he iyan sikandin is ebales te mezaat he ebeelan nu kedì. Piru kenè ku mulà sikew egketikaan. 13 Iring te menge egkegkeǥiyen guntaan he egkaǥi te, ‘Iyan is mezaat he etew is ebaal te mezaat.’ Umbe kenè ku sikew ebmenuwen. 14 Iyan ka hadì te Israel ne ebpen-ahaan a kenikew. Maan, hentei e ves? Iring e zè man te minatey he asu wey tilema. 15 Iyan is Nengazen edhukum kenita wey edtimbangtimbang ke hentei is selaan kenita te zezuwa. Deyzey ke seǥipaa e zin, ne levani e zin wey luwasa e zin diyà te kenikew.”

16 Nepangkus is kegkaǥi ni David ne migkaǥi si Saul te, “Iyan ke ves heeyan David, anak ku?” Ne mibpurung medsineǥew. 17 Migkaǥi pa sikandin te, “Metazeng ka kenà siak. Mezaat is mibeelan ku kenikew, piru meupiya mulà is mibeelan nu kedì. 18 Imbeǥey a te Nengazen diyà te kenikew, piru wazà a kenikew himetayi. 19 Is duma mulà emun egkeehè dan is kuntada zan, ne kenè dan heini ebpesegdanen he mekepelaǥuy. Iyan is Nengazen ebales te keupiya nu he impeehè nu kedì guntaan. 20 Netuenan ku he egkehimu ka he hadì, ne is ginhedian te Israel ne ebmelig-en pinaaǥi te kenikew he kedumala. 21 Umbe, guntaan penangdù ka kayi te kedì pinaaǥi te ngazan te Nengazen he kenè nu ebpenhimetayan is menge kevuwazan ku, para kenà maawà is ngazan te pemilya ku.” 22 Ne zutun mibpesarig si David. Ne mid-ulì si Saul, piru si David mulà wey is menge sakup din ne midlikù dan dutun te elesey zan.