1 Hein nekepasad he ebpengemuyù si Solomon, ne zuen hapuy he ebpuun diyà te langit ne nengetutung haazà is pemuhat he edtutungen wey zuma pa he menge pemuhat, ne is mekeǥeǥehem he kebpekiduma te Nengazen ne nekepenù dutun te valey te Nengazen. 2 Kenà ebpemekeseled is menge memumuhat dutun te valey te Nengazen su midsirang sikandan te mekeǥeǥehem he kebpekiduma te Nengazen he nekepenù dutun te valey te Nengazen. 3 Hein naahà te langun he menge Israilihanen haazà is hapuy he mibulus wey is mekeǥeǥehem he kebpekiduma te Nengazen dutun te divavew te valey te Nengazen, ne midluhud dan ne mid-azap dan is Nengazen he zuma is kebpeselamat. Migkaǥi sikandan te, “Meupiya is Nengazen; wazà pidtemanan te gaǥew zin.”

4 Ne nemuhat diyà te Nengazen si Hadì Solomon wey is langun he menge Israilihanen. 5 Nemuhat dan te 22,000 he menge vaka wey 120,000 he menge kerehidu wey menge kambing. Te heini he paaǥi impehinungud duen te hadì wey langun he menge keet-etawan haazà is baley te Megbevayà. 6 Ne mibpelastar is menge memumuhat duen te valey te Nengazen, ne iring din ded daan is menge Levihanen he nemekesinaru kandan ne migkanta he edhenduen te, “Wazà pidtemanan te gaǥew zin.” Eduyuǥan dan haazà is kanta te menge gelemiten he mibpeveelan ni Hadì David te kedalig te Megbevayà. Dutun te etuvangan te menge Levihanen, is menge memumuhat mibpezaǥing daan te menge trumpita zutun te kemulu en ebpenhitindeg is langun he menge Israilihanen.

7 Impehinungud ni Solomon sikan is lama he ziyà te etuvangan te valey te Nengazen. Ne nemuhat dan dutun te menge pemuhat he edtutungen, menge pemuhat he para gasa, wey menge tavà he pemuhat he para te meupiya he kedepità. Ne sikan is brunsi he pemuhatà he mibpeveelan ni Solomon ne utew zeisey para kayi he menge pemuhat.

8 Midsilibra pa si Solomon wey is langun he menge Israilihanen te Pista te Kebaal te menge Lawig seled te pitu he andew. Utew mezakel he menge etew is nevurun he ebpuun te Lebo Hamat he zapit te zizaya pehendiyà te zal-ug te Ehipto he zapit te zivavà. 9 Hein ikewalu en he andew, mibeelan dan is ketepusan he keburunburun, su midsilibra zan is kebpehinunguza zuen te pemuhatà wey te tivuuk he valey te Nengazen seled te pitu he andew, wey te kedsilibra te Pista te Kebaal te menge Lawig seled daan te pitu he andew. 10 Sunud dutun he andew, he iyan ike-23 he andew te ikepitu he vulan, impeulì ni Solomon is menge etew. Mid-ulì dan he melipayen utew tenged te langun he meupiya he mibeelan te Nengazen ki David wey ki Solomon, wey te menge etew zin he menge Israilihanen.

11 Ne nepasad ni Solomon is kebangun duen te valey te Nengazen wey te turuǥan din. Nepasad din is langun he menge pelanu zin para kayi. 12 Ne sevaha zutun he mezukilem, mibpaahà kandin is Nengazen he egkaǥi, “Nezineg ku is menge kebpengemuyù nu ne mibpilì ku heini is baley ku he pemuhatà te menge pemuhat.

13 “Penenglitan kenè ku ibpeuzan, etewa ebpeeǥiyan ku te menge terapan is tanà he egkaan te menge pinemula kayi, wey ebpeeǥiyan ku is keet-etawan ku te kezeetan, 14 emun is menge etew he mid-umew ku kenà ebpelavew, ne ebpengemuyù wey ed-aput kayi te kedì, ne ed-iniyuǥan dan is menge mezaat he menge ulaula zan, ebpemineǥen ku sikandan kayi te langit ne ebpeseyluwen ku is menge salè dan, ne idlikù ku is uzar te menge tanè dan. 15 Edseǥipaan ku sikandan ne ebpemineǥen ku is menge kebpengemuyù dan te kayi he lugar, 16 su heini is baley ku ne mibpilì ku wey insivey ku heini he lugar para kedì su wey mehimu he zutun a ebeǥayi te zengeg he wazà pidtemanan. Ebentayan ku heini wey ed-eturen ku lelayun.

17 “Ne sikew, emun edsunud ka kedì iring te amey nu he si David, ne ebeelan nu is langun he ebpeveelan ku kenikew wey edtumanen nu is ibeǥey ku he menge sulunuzen wey menge suǥù, 18 ibpehadì ku is menge kevuwazan nu te wazà pidtemanan. Iyan heini impenaad ku ziyà te amey nu he si David hein migkeǥiyan ku sikandin te, ‘Kenè ka egkeewaan te kevuwazan he edhadì te Israel.’ 19 Piru emun ed-iniyuǥan a keniyu ne kenè niw edtumanen is menge suǥù wey menge sulunuzen he imbeǥey ku keniyu, wey ke ebpenilbi kew wey ed-azap te zuma he menge ed-ezapen, 20 ne ibpaawè ku sikiyu kayi te tanà he imbeǥey ku keniyu, ne ebeleǥazen ku heini is baley ku he iyan mibpilì ku he lugar he kayi a ebeǥayi te zengeg. Ne ed-un-undahan wey ed-engitan te menge etew. 21 Ne minsan pa te mekempet wey nevantug heini is baley ku, ne edrundusen ku heini. Egketingkemed wey egkengeinuinu is langun he edsaǥad kayi, ne egkaǥi zan te, ‘Maan is mibeelan heini te Nengazen kayi he tanà wey kayi te valey zin?’ 22 Edtavak is duma te, ‘Tenged te mid-iniyuǥan dan is Nengazen, is Megbevayà te menge kepuun dan, he iyan mibpeǥawas kandan diyà te Ehipto, ne mibpenilbi wey mid-azap dan te zuma he ed-ezapen. Umbe mibpeeǥiyan sikandan te Nengazen kayi he menge kezeetan.’ ”