1 Ne miduma te Mulin-ulin he Megbevayà si Azaria he anak ni Oded. 2 Ne mibpekid-ahà sikandin ki Asa ne migkeǥiyan din te, “Pemineǥa a keniyu Hadì Asa, wey sikiyu is langun he tig-Juda wey tig-Benjamin. Is Nengazen ne kenà edsuwey keniyu emun kenè kew edsuwey kandin. Emun edangep kew kandin ne egkeehè niw is keupiya zin. Piru ke ed-iniyuǥan niw sikandin, ne ed-iniyuǥan kew zin daan. 3 Meluǥayad he timpu ne wazà kilelalaa te menge Israilihanen is tutuu he Megbevayà; wazè dan menge memumuhat he mibpenurù kandan, wey wazè dan menge kesuǥuan. 4 Piru hein edlised dan en, ne midangep dan diyà te Nengazen he Megbevayà te Israel, ne midtevangan din sikandan. 5 Haazà he timpu dilikadu is kebiyahi su edsinamuk is menge etew. 6 Su edtetebek is menge etew ziyà te menge nasyun wey ziyà te menge inged, su migurigew sikandan te Megbevayà pinaaǥi te menge wazà med-iring-iring he menge kemereǥenan. 7 Sikiyu mulà guntaan, ne pekevurut kew ne kenè kew mebmeluya, su edsuhulan kew tenged te menge vaal niw.”

8 Dutun te kegkezineǥa ni Asa te migkaǥi ni Azaria he ebpeneuven he anak ni Oded, ne mibpekevurut sikandin. Ne impepen-awè din sikan is utew mezaat he menge ed-ezapen diyà te tivuuk he Juda wey Benjamin, wey ziyà te menge inged he menge naaǥew zin diyà te vuvungan te Efraim. Mibpepurungan din is pemuhatà para te Nengazen he ziyà te etuvangan te varkun te valey te Nengazen.

9 Ne midtiǥum din is langun he menge keet-etawan te Juda wey Benjamin, wey is menge etew he ebpuun te Efraim, Manase, wey Simeon he zuma zan he meǥinged. Mezakel is midhalin diyà te Juda he ebpuun te Israel hein neehè dan he miduma ki Asa is Nengazen he Megbevayè din.

10 Midtiǥum dan diyà te Jerusalem te iketelu he vulan te ike-15 he tuig te kedhadì ni Asa. 11 Ne te haazà he timpu nemuhat dan diyà te Nengazen te menge uyaǥen he ebpuun te menge naaǥew zan te kebpekidtebek–700 he vaka wey 7,000 he menge kerehidu wey kambing. 12 Neuyunan dan he edangep dan diyà te Nengazen, he Megbevayà te menge kepuun dan, te tivuuk he ǥehinawa zan wey kedsavut. 13 Ne is minsan hentei he kenà edangep diyà te Nengazen he Megbevayà te Israel, ne edhimetayan, batà etawa meǥurang, maama etawa vahi. 14 Mibpenaad dan diyà te Nengazen pinaaǥi te mezaǥing he laǥeng, duma is ked-ugyab wey impezaǥing dan is menge trumpita wey menge vudyung. 15 Utew nengelipey is langun he tig-Juda su nekevaal zan te kebpenaad he ebpuun te ǥehinawa zan. Ne utew meheǥet is gehinawa zan te kedangep te Nengazen, ne neehè dan is keupiya zin. Ne mibeǥayan din sikandan te kelinew su wazè dan mekepekidtebek te menge kuntada zan diyà te peliǥuy.

16 Impaawà daan ni Hadì Asa is apù din he si Maaca te kegkerayna zin tenged te mibaal sikandin te utew mezaat he tukud he simbulu te ed-ezapen he si Ashera. Impetamped ni Asa heini he tukud ne impeǥurey zin. Ne mibpevinsulan din diyà te zal-ug te Kidron. 17 Minsan te wazà maawà is langun he simbahan diyà te metikang he lugar te Israel, ne wazà si Asa med-awà diyà te Nengazen te tivuuk he untung din. 18 Mid-uwit din diyà te valey te Megbevayà is menge pelata, menge vulawan, wey zuma pa he menge azen he inhalad dan te amey zin diyà te Megbevayà.

19 Wazà tebek taman te ike-35 he tuig te kedhadì ni Asa.