1 Ne is nekeilis ki Asa te kedhadì ne iyan is anak din he si Jehoshafat. Midlig-enan ni Jehoshafat is ginhedian din su para mekesukul sikandin te Israel. 2 Mibpepelestaran din te menge sundaru is langun he vinerengbeng he menge inged te Juda, ne midtukuzan din te menge kampu te menge sundaru is Juda wey is menge inged te Efraim he naaǥew te amey zin he si Asa. 3 Eduma is Nengazen ki Jehoshafat su zutun te nehuna he menge tuig te kedhadì din ne midsunud din is menge ulaula te kepuun din he si David. Wazà sikandin medangep diyà te menge ledawan ni Baal, 4 kekenà, diyà sikandin medangep te Megbevayà te amey zin wey midsunud din is kesuǥuan, ne wazè din sunuza is menge ulaula te menge tig-Israel. 5 Midlig-enan te Nengazen is ginhedian dutun te kandin he kedhadì. Mid-uwitan sikandin te langun he menge tig-Juda te gasa, umbe midekelà is ketiǥeyunan din wey nevantug. 6 Metinumanen sikandin te kedsunud te menge paaǥi te Nengazen. Imperundus din te menge tig-Juda is menge simbahan diyà te metikang he menge lugar wey kes tukud he simbulu te vahi he ed-ezapen he si Ashera.

7 Hein ike-3 en he tuig te kedhadì din, ne midsuǥù din is menge upisyal zin he si Ben Hail, Obadias, Zacarias, Netanel, wey si Micaya te kebpenurù diyà te menge inged te Juda. 8 Iyan duma zan he menge Levihanen ensi Shemaya, Netania, Zebadia, Asahel, Shemiramot, Jehonatan, Adonia, Tobia, Tob Adonia, wey menge memumuhat he si Elishama wey si Jehoram. 9 Mid-uwit dan kes Libru te Kesuǥuan te Nengazen ne mid-eneb dan is langun he inged te Juda ne mibpenurù dan is menge etew.

10 Mibpelihandek te Nengazen is langun he menge ginhedian he nekelingut te Juda, umbe wazè dan mebpekidtebek ki Jehoshafat. 11 Is duma he menge Filistihanen ne mid-uwitan dan si Jehoshafat te menge gasa wey pelata he ibuhis dan. Ne zuen daan menge tig-Arabia he mid-uwit diyà te kandin te 7,700 he menge kerehidu wey 7,700 he menge kambing. 12 Umbe, mibmelig-en utew si Jehoshafat. Umbe mibpehitindeg sikandin diyà te Juda te melig-en he menge kutà wey menge inged he para te menge budiga. 13 Utew zekelà he menge kinehenglanen is midtiǥum din dutun te inged te Juda. Midsavuk daan sikandin te menge memetau he menge sundaru ziyà te Jerusalem. 14 Is menge sundaru zin ne nelista sumalà te kandan he menge pemilya. Si Adnah iyan peremandar te 300,000 he menge memetau he menge sundaru he tig-Juda, he migrupu te tig-1,000. 15 Is sunud kandin ne iyan si Jehohanan he peremandar te 280,000 he menge sundaru. 16 Ne is sunud ne iyan si Amasia he anak ni Zicri, he peremandar te 200,000 he menge memetau he menge sundaru. Midbuluntaryu sikandin para te buluhaten te Nengazen.

17 Si Eliada, is sevaha he metau he sundaru, ne iyan peremandar te 200,000 he menge sundaru he tig-Benjamin. Heini he menge sundaru ne zuen dan menge kelasag wey menge panà. 18 Ne iyan sunud kandin si Jehozabad he peremandar te 180,000 he neǥumeenan he menge sundaru.

19 Iyan heini sikandan mibpenilbi ki Hadì Jehoshafat. Ne kenà ragkes kandan is menge sundaru he ziyè din ipelastar te vinerengbeng he menge inged diyà te tivuuk he Juda.