1 Hein minatey en si Jehoshafat, inleveng sikandin diyà te midlevengan te menge kepuun din diyà te Inged ni David. Ne iyan nekeilis kandin te kedhadì is anak din he si Jehoram. 2 Iyan heini menge suled ni Jehoram si Azaria, Jehiel, Zacarias, Azariahu, Micael, wey si Shefatia. Iyan heini menge anak langun ni Hadì Jehoshafat he hadì te Juda. 3 Mibeǥayan sikandan ni Jehoshafat te mezakel he menge gasa he pelata wey vulawan, mahalen he menge azen, wey menge vinerengbeng he menge inged diyà te Juda. Piru iyan din impeilis kandin si Jehoram te kedhadì su iyan man kinekekayan.

4 Hein melig-en en is kedhadì ni Jehoram diyà te ginhedian te amey zin, ne mibpepenhimetayan din is langun he menge suled din, ragkes is duma he menge upisyal te Juda. 5 Mibpenuiǥen si Jehoram te 32 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te walu he tuig. 6 Midsunud din is mibeelan te menge hadì te Israel, iring te mibeelan te pemilya ni Ahab, su neesawa zin is anak ni Ahab. Mezaat is ulaula zin diyà te etuvangan te Nengazen. 7 Piru tenged te kebpekid-uyun te Nengazen ki David, ne wazè din dèdeeti is kevuwazan ni David. Su midsaad is Nengazen ki David he zuen menge kevuwazan din he edhadì taman te taman.

8 Hein timpu te kedhadì ni Jehoram, nekidsukulà is Edom te Juda, ne mibpilì dan te keugelingen dan he hadì. 9 Umbe, midhendiyà si Jehoram duma is menge upisyal zin wey langun he menge kerwahi zin su edsurungen dan is Edom. Midliǥuyan sikandin wey is menge peremandar te menge kerwahi zin te menge Edomanhen. Piru hein mezukilem, midtik-awan dan etekiya is menge Edomanhen, ne nekepelaǥuy zan su nekelawang dan. 10 Taman en guntaan ne kemulu pa ebpekidsukulà is Edom te Juda. Ne zutun daan he timpu nekidsukulà daan is Libna te Juda.

Haazà he timpu ne nekidsukulà daan is Libna te Juda, tenged te mid-iniyuǥan ni Jehoram is Nengazen he Megbevayà te menge kepuun din. 11 Midtukud sikandin te menge simbahan diyà te menge vuvungan te Juda he iyan hinungdan te ked-azap te menge tig-Jerusalem wey menge tig-Juda te zuma he menge ed-ezapen.

12 Mibpeuwitan te ebpeneuven he si Elias si Jehoram te surat ne iyan heini egkeǥiyen din: “Iyan heini egkeǥiyen te Nengazen he Megbevayà te kepuun nu he si David: wazè nu sunuza is mid-ulaula te amey nu he si Jehoshafat wey te apù nu he si Asa he nehimu he hadì daan te Juda. 13 Kekenà, iyan nu midsunud is mibeelan te menge hadì te Israel. Mid-iniyat nu is menge tig-Juda wey menge tig-Jerusalem te ked-azap te zuma he menge ed-ezapen, iring te mibeelan ni Ahab. Mibpenhimetayan nu zaan is menge suled nu he meupiya pa kenà sikew. 14 Umbe, edezeetan guntaan te Nengazen is menge etew nu, menge anak nu, menge esawa nu, wey is langun he menge azen nu. Dekelà he kezeetan is ebpeseǥazan din keniyu. 15 Ebpekaantus ka te utew mereǥen he zaru te ǥetek taman te egawas is bituka nu.”

16 Midhimu te Nengazen he mepeuki si Jehoram te menge Filistihanen wey menge Arabo he menge meǥinged diyà te uvey te Etiopia. 17 Ne midsurung dan is Juda, ne mibpenguwa zan is menge ketiǥeyunan diyà te turuǥan te hadì, ragkes is menge esawa zin wey menge anak din. Iyan dà wazà mekuwa is kineheziyan he anak din he si Ahazia.

18 Hein neiwas is kegkeul-ulaha zutun, ne midrasey te Nengazen si Jehoram te daru te ǥetek he wazè din en kegkeulii. 19 Midlavey is dezuwa he tuig, ne migawas is bituka zin tenged dutun te daru zin, ne iyan impatey zin is utew mesakit. Wazà sikandin beǥayi te zengeg te menge etew zin pinaaǥi te kedtetavun he iyan daan mibeelan dan diyà te menge kepuun din.

20 Mibpenuiǥen si Jehoram te 32 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te walu he tuig. Dutun te kebpatey zin ne wazà neseeng kandin. Diyè ded ileveng te Inged ni David; piru wazà dutun te edlevengan te menge hadì.