1 Duen sevaha he etew he tig-Benjamin he layun dà ebpen-ahà te samuk. Iyan ngazan din si Sheba, he anak ni Bicri. Impezaǥing din is budyung ne ebpengulahì te, “Menge tig-Israel, wazè tew lavet ki David he anak ni Jesse! Ebpen-ulì kiw is langun!” 2 Ne zutun nemenggenat haazà is menge tig-Israel ne mid-ewaan dan si David ne miduma zan ki Sheba he anak ni Bicri. Piru is menge tig-Juda ne wazè dan ewai is hadì dan, ne midumahan dan puun dutun te Wahig he Jordan pehendiyà te Jerusalem.

3 Hein nekelikù si David diyà te turuǥan din diyà te Jerusalem, ne impaangey zin kes sepulù he esawa zin he intaǥak din he para ed-etiman duen te turuǥan, ne zuen ibpevantey zin kandan. Ne mibeǥayen din sikandan te kinahanglan dan, piru wazè din en hulizi sikandan. Ne zutun en sikandan med-ubpà he henduen be te menge valu taman te kebpatey zan.

4 Ne zutun migkeǥiyan dutun te hadì si Amasa te, “Umawa nu is langun he menge sundaru te Juda ne pehendiyè kew te kedì te iketelu he andew puun guntaan.” 5 Ne migenat si Amasa ne impetawag din is menge sundaru te Juda, piru wazà sikandin mekelikù dutun te andew he migkaǥi kandin te hadì. 6 Umbe, migkeǥiyan te hadì si Abishai te, “Tuwas pa he mezaat is ebeelan kenitew ni Sheba, kenà te mibeelan ni Absalom. Umbe ǥuntaan, dumaha niw is menge sakup ku ne del-asa niw sikandin, su kela ke mekaaǥew sikandin te vinerengbeng he menge inged ne egkepeleǥuyan kiw zin.”

7 Ne migenat si Abishai puun te Jerusalem su edleyasen din si Sheba he anak ni Bicri. Miduma zin si Joab wey is menge sakup din, is menge vantey ni David he menge Kiritnen wey menge Pilitnen, wey is langun he menge memevurut he menge sundaru. 8 Hein diyè dan en te zekelà he vatu ziyà te Gibeon, neumahan sikandan ni Amasa. Ne si Joab, nekeyuyunipurmi ne edseseluniket te ispada. Hein egkeuvayan din en si Amasa, ne mid-el-elesan din hulevuta is ispada zin. 9 Migkeǥiyan din si Amasa te, “Egkemenumenu ke en suled?” Ne migewezan din te kewanan he velad din is sumpà ni Amasa, su uvag kun edhazek kandin. 10 Wazà mekevantey si Amasa he ziyà te ǥivang ni Joab is ispada. Ne midsundang ni Joab diyà te ǥetek ne nekeyakat diyà te tanà is bituka zin. Ne segugunà minatey sikandin, ne wazè en meumani mesundang ni Joab. Ne midlaus si Joab wey is suled din he si Abishai su edleyasen dan si Sheba. 11 Duen sevaha he sakup ni Joab ne midhitindeg dutun te minatey he lawa ni Amasa, he migkaǥi ziyà te menge sakup ni Amasa te, “Emun diyè kew edapig te ki Joab wey ki David, ne sunud kew en ki Joab!” 12 Nekesesavuk is lawa ni Amasa zutun te teliwazà te zalan he nepurung melupit te lengesa zin. Kada zuen ebayà dutun he ebpekaahà kandin ne edteren su ed-ahà. Ne hein netuenan heini te sakup ni Joab, ne miguyud din haazà is minatey he lawa ni Amasa puun dutun ne ziyè din uwita te vevesukà, ne midtembunan din te malung. 13 Hein naawè en dutun is lawa ni Amasa te dalan, ne nemenlaus dan is langun he edsunud ki Joab he edlayas ki Sheba.

14 Midhendiyà si Sheba te langun he tribu te Israel su edtiǥumen din is langun he menge kezuzumahi zin. Ne midsunud kandin is menge kezuzumahi zin, ne mid-amur-amur zan diyà te Abel Bet Maaca. 15 Hein netuenan heini ni Joab wey te menge sakup din ne midhendiyè dan te Abel Bet Maaca ne midlingutan dan heini. Ne midtembuan dan te tanà is kilid te verengbeng su para mekeawè dan, ne midnenenayan dan te edrundus haazà is berengbeng.

16 Duen dutun sevaha he vahi he uluwanen te seled te inged ne migkulahì din is menge sakup ni Joab te, “Pemineg kew kedì! Keǥiyi niw si Joab he medhendini te kedì su egkesuat a he ebpekidlalag kandin.” 17 Ne midhendiyà si Joab te kandin, ne mid-insà haazà is bahi te, “Iyan ke ve si Joab?” Midtavak si Joab te, “Uya.” Migkaǥi haazà is bahi te, “Datù, pemineǥa nu is egkeǥiyen ku kenikew.” Midtavak si Joab te, “Ne en, ebpemineg a.” 18 Migkaǥi haazà is bahi te, “Duen sevaha he erubasa he egkaǥi te, ‘Emun egkesuatan niw he mehusey is menge samuk niw, ne vuyù kew te sambag diyà te inged he Abel.’ 19 Sevaha a te menge ebpenganduy he mebpedayun is kelinew te Israel. Piru sikew, maan is egkesuatan nu te edrundus is inged he ǥaked te Nengazen?” 20 Midtavak si Joab te, “Kenè ku egkesuatan te edrundus is inged niw! 21 Kenè dey heeyan tuyù. Iyan dey edleyasen si Sheba he anak ni Bicri he ebpuun diyà te vuvungan te Efraim. Iyan heini midsukul ki Hadì David. Iveǥey niw sikandin kenami ne ed-awè key kayi te inged niw.” Migkaǥi haazà is bahi te, “Idtimbag dey ziyà te kenikew is ulu zin puun kayi te seled te verengbeng.”

22 Ne zutun mibeyaan dutun te vahi is menge meǥinged dutun te inged ne midtudtulan din sikandan te planu zin. Mibpungelan dan te ulu si Sheba ne intimbag dan diyà te ki Joab. Ne segugunà impezaǥing ni Joab is budyung ne mid-awè dan dutun te inged duma is menge sakup din ne mid-ulì dan. Ne midlikù si Joab diyà te Jerusalem.

23 Iyan egalen te menge sundaru te tivuuk he Israel, si Joab. Is pengulu te tigbantey ki David he menge Kiritnen wey menge Pilitnen, iyan si Benaya he anak ni Jehoyada. 24 Ne is edumala te menge uripen he ebpeǥesen te kedterebahu ne iyan si Adoniram. Ne iyan midseriǥan te menge libru te ginhedian din si Jehoshafat he anak ni Ahilud. 25 Ne iyan sikritaryu te hadì si Sheva. Is lavew he memumuhat ne si Zadok wey si Abiatar. 26 Ne si Ira he tig-Jair iyan keugelingen ni David he memumuhat.