1 “Purungi niw sunuza is langun he menge suǥù he ibeǥey ku keniyu ǥuntaan, su para mebpedayun is kegkeuyag-uyag niw wey ebmahabet kew, wey egkaangken niw sikan is tanà he impenangdù te Nengazen he ibeǥey zin diyà te menge kepuun niw. 2 Tentenuzi niw ke mibmenumenu te Nengazen he Megbevayè niw is kegiyahi zin keniyu zuen te hipanew niw ziyà te sibsivayan seled te 40 he tuig. Midhimu zin heini su para kenè kew mekepelavew, wey te kegezam keniyu su para metueni ke hengkey is netaǥù diyà te ǥehinawa niw, ke edtumanen niw ve is menge suǥù din etawa kenà. 3 Midhimu zin he kenè kew mekepelavew pinaaǥi te kebpesaǥad keniyu te kegkevitil, ne zutun mibeǥayan kew zin te ‘manna’–kelasi te keenen he sikiyu wey is menge kepuun niw wazè pa mekeǥezam kayi puun pa te nehuna he timpu. Midhimu heini te Nengazen su impenurù din keniyu he kenà iyan dà igkeuyag te etew is keenen, kekenà, elin is kada lalag he egkeǥiyen te Nengazen. 4 Seled te 40 he tuig wazà mezaan is menge visti niw wey wazà lupangi is menge paa niw te kehipanew niw. 5 Kinahanglan he ed-is-isipen niw he is amey ebmensuwen din is anak din, ne is Nengazen he Megbevayè niw ne ebmansu zaan keniyu.

6 “Umbe tumana niw is menge suǥù te Nengazen he Megbevayè niw. Pengungubpaan kew he sungkad te menge paaǥi zin wey tehuza niw sikandin. 7 Su ed-uwiten kew te Nengazen he Megbevayè niw ziyà te meupiya he tanà, he zuen duen edtudà he menge wahig wey menge teheb diyà te menge suǥud wey ziyà te menge vuvungan. 8 Heini he tanà duen kayi menge trigu, barli, paras, higus, pumigranata, ulibu, wey teneb. 9 Kenè kew egkeewaan te keenen kayi he tanà ne kenè kew egkekurangan te minsan hengkey. Kayi he tanà ebpekekuwa kew te menge putew he henduen dà te ebpengamì kew zà te vatu, ne dekelà daan is brunsi ziyà te menge vuntud. 10 Emun ebpekekaan kew en te minsan hengkey he egkesuatan niw, ne zeliǥa niw is Nengazen he Megbevayè niw tenged te kebeǥayi zin keniyu te utew meupiya he tanà.

11 “Mebpekevantey kew he kenè niw melipati is Nengazen he Megbevayè niw wey kenè niw mesupak is menge suǥù din wey is menge sulunuzen he ibeǥey ku keniyu ǥuntaan. 12 Emun egkepezaharan kew en te keenen wey ebpekevangun kew en te meupiya he menge valey he egkeubpaan niw, 13 wey ebmahabet en is menge uyaǥen niw, selapì niw, bulawan niw, wey zuma he menge azen niw, 14 mebpekevantey kew he kenè kew mekepahambug wey kenè niw melipati is Nengazen he Megbevayè niw he mibpeǥawas keniyu puun te Ehipto he zutun kew pen-uripena. 15 Migiyahan kew zin diyà te meluag wey mekahahandek he sibsivayan he zuen duen edhereg he menge uled wey menge venayew. Ne wazà wahig kayi he lugar, piru mibeǥayan kew zin te wahig he ebpuun te vatu. 16 Diyà te sibsivayan, ebeǥayan kew zin te ‘manna’–keenen he wazà hanew zuen te menge kepuun niw. Midhimu heini te Nengazen para kenè kew mekepelavew wey te kegezam keniyu su wey mebmeupiya is kebpekesavuk niw te huziyan he timpu. 17 Su kela ke megkaǥi kew te, ‘Pinaaǥi te kedì he ǥehem wey zesen naangken ku heini is langun he ketiǥeyunan.’ 18 Piru tentenuzi niw he iyan is Nengazen he Megbevayè niw mibeǥey keniyu te ebilidad he insepian niw, ne mibeelan din heini su para metuman din is kebpekid-uyun din keniyu he impenangdù din diyà te menge kepuun niw. Ne edtumanen din en heini ǥuntaan.

19 “Piru ebpetizeenan ku en sikiyu ǥuntaan he emun edlipatan niw is Nengazen he Megbevayè niw, ne edsunud kew te zuma he menge ed-ezapen ne ed-ezapen niw wey ebpenilbiyan niw sikandan, kenè en ebperis he egkengezeetan kew. 20 Guntaan mibpendèdeetan te Nengazen diyà te etuvangan niw is menge etew ziyà te menge nasyun, ne emun kenè kew ebpezumazuma te Nengazen he Megbevayè niw ebpendezeetan kew zin daan.