1 “Kenè niw pemuhata is Nengazen he Megbevayè niw te vaka etawa kerehidu he zuen din sazir, su utew mezaat is ked-isipa zin kayi.

2 “Penenglitan duen sevaha he maama etawa vahi he meǥinged diyà te sevaha zuen te menge inged he ibeǥey keniyu te Nengazen he Megbevayè niw he nezekepan he mibaal te vaal he mezaat is ked-isip duen te Nengazen he Megbevayè niw. Su midsupak din is paaǥi te Nengazen te kebpekid-uyun keniyu 3 wey midsupak te suǥù din pinaaǥi te ked-azap din te selakew en he ed-ezapen etawa andew etawa vulan etawa menge vituen. 4 Emun egkezineg niw heini kinahanglan he ebpurungan niw edsusiya. Ne emun tutuu he ebeelan diyà te Israel haazà is utew mezaat he vaal, 5 ne uwita niw haazà is mibaal ziyà te pultahan te inged niw ne penulenga niw te vatu taman te kebpatey zin. 6 Egkehimu he edhimetayan is etew emun egketuenan he nekesalà sikandin pinaaǥi te kebpenistiǥus te zezuwa etawa tetelu he menge tistiǥus, iyan, emun sevaha zà is ebpenistiǥus ne kenà egkehimu he edhimetayan. 7 Haazà is menge tistiǥus iyan edhuna edtuleng kandin te vatu, ne edsunud is kezekelan. Kinahanglan he id-awè niw haazà is mezaat he vaal pinaaǥi kayi.

8 “Penenglitan duen kasu ziyà te kurti niw he mehitenged te kedhimatey, kedtebek etawa kebpememuǥel he utew mereǥen he edisisyunan. Ne iyan beeli niw is, uwita niw heeyan he kasu ziyà te lugar he ebpilien te Nengazen he Megbevayè niw 9 he zutun is menge memumuhat he menge kevuwazan ni Levi wey is menge zatù he ebpengindatù dutun he timpu, ne iyan sikandan edisisyun dutun he kasu. 10 Kinahanglan he edewaten niw is disisyun he midhimu zan diyà te lugar he ebpilien te Nengazen. Tumana niw is langun he egkeǥiyen dan diyà te keniyu. 11 Ke hengkey is egkedisisyunan dan he pinesikad te kesuǥuan, ereg he edsunuzen niw. Kenè niw supaka is egkeǥiyen dan keniyu. 12 Is etew he kenà edawat te disisyun te zatù etawa memumuhat he ebpenilbi te Nengazen he Megbevayè niw zutun he timpu ereg he edhimetayan. Kinahanglan he id-awè niw heini he mezaat he vaal ziyà te Israel. 13 Ne ke egkezineg heini te langun he etew, ne egkahandek dan, ne kenè dan en human edsupak.

14 “Emun ebpekeseled kew en duen te tanà he ibeǥey keniyu te Nengazen he Megbevayè niw wey egkaangken niw en heini ne zutun kew en he meǥinged, egkaǥi kew te, ‘Ebpilì kiw te hadì he ebpengulu kenitew iring te menge nasyun diyà te peliǥuy kenitew.’ 15 Kinahanglan he iyan niw ebpilien he hadì is etew he mibpilì te Nengazen he Megbevayè niw, wey kinahanglan he zuma niw he Israilihanen. Kenè kew pilì te kenà Israilihanen. 16 Kinahanglan he kenà ebpekehebeten te hadì niw is menge kudè din wey kenè din ipelikù diyà te Ehipto is menge etew zin te kebpemasa te menge kudà, su is Nengazen he Megbevayè niw migkaǥi ziyà te keniyu te kenè kew en likù diyà. 17 Kinahanglan he kenà mahabet is esawa zin su kela ke iniyuǥi zin is Nengazen wey kinahanglan he kenà sikandin med-angken te zekelà he selapì wey vulawan.

18 “Emun ebpinuu en sikandin diyà te pinuuwè din te kedhadì, kinahanglan he egkupya ziyà te etuvangan te menge memuhat he menge kevuwazan ni Levi kayi he menge kesuǥuan te para mismu kandin. 19 Kinahanglan he edtipiǥan din heini wey layun din ebesaha seled te tivuuk he untung din su para mekeistudyu te kedtahud te Nengazen he Megbevayè din ne egkepurung din egkesunud is langun he menge lalag kayi he menge kesuǥuan wey menge sulunuzen. 20 Pinaaǥi te layun din kebesaha kayi ne kenà sikandin ebpekepahambug he edhuna sikandin he meupiya te zuma zin he menge Israilihanen, ne kenà sikandin ebpekesupak te menge suǥù te Nengazen. Emun edtumanen din heini is langun ne ebpekahadì sikandin wey is menge kevuwazan din diyà te Israel te meluǥayad he timpu.