1 “Emun egkeehè niw he ebpekaawà is baka etawa kerehidu te zuma niw, ne kenè niw heini vey-ani kekenà, uwita niw ziyà te teǥiǥaked. 2 Piru emun meziyù is ed-ubpaan te teǥiǥaked etawa wazè niw mekilala is teǥiǥaked, uwita niw ziyà te keniyu haazà is uyaǥen ne taǥad kew te kebpekeuma te teǥiǥaked he ebpen-ahà duen. Ne iveǥey niw heini ziyà te kandin. 3 Ne iring daan kayi is beeli niw ke zuen asnu etawa manggad wey minsan hengkey he azen he egketazin te zuma niw. Kenè niw heini vey-ani.

4 “Emun egkeehè niw is asnu etawa vaka te zuma niw he nepiley ziyà te zalan, kenè niw heini vey-ani. Uǥupi niw is teǥiǥaked te kebpehitindeg kayi.

5 “Is bahi kenà mebivisti te visti he para te maama, ne is maama ne kenà mebivisti te visti he para te vahi, su egkeepesan te Nengazen he Megbevayè niw is ebaal kayi.

6 “Emun ebpekeehè kew te salag te tagbis diyà te uvey te zalan, diyà te kayu etawa tanà, he edlekupan duen te iney haazà is menge pispis din etawa menge impis din, ne kenè niw kuwaa haazà is iney zuma te menge pispis din etawa impis din. 7 Egkehimu ke egkuwaan niw is menge pispis etawa menge impis, piru kinahanglan he ibpaawè niw is iney, su para mebmeupiya is kebpekesavuk niw wey para mebmeluǥayad is untung niw.

8 “Emun ebevaley kew, kinahanglan he edteuzan niw te alang is ebpekeliǥuy zuen te patag he atep niw, su para wazè niw televaken emun duen ebpatey he egkeulug puun te atep niw.

9 “Kenè kew mebpemula te selakew en he pinemula ziyà te pemuleey niw te paras. Su emun ebeelan niw heini, ne egkeǥaked te valey te Nengazen is beǥas te menge impemula niw ragkes en is beǥas duen te impemula niw ziyà te pemuleey niw te paras.

10 “Emun ed-eradu kew ne kenè niw ipebperisà is baka wey is asnu. 11 Kenè kew mebivisti te hinavel he impedsahug is dezuwa he kelasi te helevelen.

12 “Pikiti niw te zayandayan is heepat he suyuk te melayat he samput niw.

13 “Penenglitan, mid-esawa te maama is bahi, ne kegkepasad te kebpeuvayè dan, ne nepeukan dutun te maama haazà is esawa zin 14 ne mibutbutangan din. Ke sikandin te, ‘Netuenan ku pinaaǥi te kedhileveti ku te esawa ku he zuen en nehuna he nekehilavet kandin.’ 15 Ne medhendiyà is menge ginikanan dutun te vahi te ebpemendumala te inged he ziyà te pultahan te inged. Ne med-uwit sikandan te tuus he wazè pa zuma he nekehilavet duen ta anak dan. 16 Ne megkaǥi is amey zutun te vahi ziyà te ebpemendumala te, ‘Impeesawa ku is anak ku kayi he etew ne ǥuntaan nepeukan din is anak ku. 17 Ne mibutbutangan din is anak ku pinaaǥi te kegkaǥi te zuen en nehuna he nekehilavet te anak ku te wazè dan pa meked-esawa. Piru heini zed is tuus he wazè pa zuma he nekehilavet te anak ku.’ Ne zutun ibpeehè dan te ebpemendumala is dempas te hizeǥaan dutun te teleesawa he nengelengesahan. 18 Ne edekepen dutun te ebpemendumala haazà is maama ne edsilutan dan. 19 Edselaan dan sikandin te 100 he vuuk he selapì ne ibeǥey haazà diyà te amey te vahi, su mibpeel-elezan din is sevaha he Israilihanen he wazè pa mehileveti te zuma. Kinahanglan he kenè din suwayi haazà is bahi mintras uuyag pa sikandin.

20 “Piru emun tutuu is egkeǥiyen dutun te maama su wazà egkaahà he tuus he wazè pa zuma he nekehilavet dutun te vahi, 21 ne ed-uwiten haazà is bahi diyà te etuvangan te valey te amey zin ne edtulengen sikandin te vatu te menge maama zutun te inged taman te kebpatey zin. Su mekeeled-eled he vaal is mibeelan din diyà te Israel pinaaǥi te kebpehilavet dutun te ziyè pa sikandin ed-ubpà te valey te amey zin. Kinahanglan he id-awè niw heini he mezaat he vaal ziyà te keniyu.

22 “Emun egkezekepan is sevaha he etew he edhilavet te vahi he zuen din esawa ne kinahanglan he edhimetayan sikandan is dezuwa. Kinahanglan he id-awè niw heini he mezaat he vaal puun te Israel.

23 “Emun edhilavet is sevaha he etew te vahi he hapit en ed-esewaa, ne ziyà haazà mehitavù te sevaha he inged, 24 ne uwita niw haazà is dezuwa ziyà te pultahan te inged ne edtulengen sikandan te vatu taman te kebpatey zan. Edhimetayan haazà is bahi su minsan diyà sikandin te inged ne wazà mebpetavang pinaaǥi te kebpengulahi. Edhimetayan haazà is maama tenged te midhilevetan din is bahi he hapit en ed-esewaa. Kinahanglan he id-awè niw heini he mezaat he vaal ziyà te keniyu.

25 “Piru emun midlayug dutun te maama haazà is bahi he hapit en ed-esewaa diyà te gawas te inged, ne iyan dà edhimetayan sikan is maama. 26 Kenè niw mulà menuwa sikan is bahi, su wazà sikandin mekesalà te ereg he idhimetayi kandin. Heini he kasu iring ded te kasu te etew he midlusuzan din is duma zin ne midhimetayan din. 27 Geina te ziyà leyuǥa haazà is bahi te ǥawas te inged. Minsan ebpengulahì pa sikandin is ebpetavang ne wazà gihapun ebpeketavang su wazà ebpekezineg.

28 “Emun egkezekepan is sevaha he maama he midlayug din is raǥa he kenè pa ed-esewaan, 29 kinahanglan he ibpevayad haazà is maama te 50 he vuuk he pelata ziyà te amey te vahi. Ne kinahanglan he ed-esewaan din haazà is bahi su mibpeǥes din man, ne kinahanglan he kenè din edsuwayan mintras uuyag pa sikandin.

30 “Kinahanglan he kenà hileveti te anak is esawa te amey zin. Su egkepeel-elezan haazà is amey.