1 Migkaǥi pa is Nengazen he MEGBEVAYÀ te, “Is beyeey pehendiyà te seled he lama he ebpekesinaru ziyà te edsilaan, kinahanglan he siradu seled te heenem he andew he iyan timpu te kedterebahu, piru ed-ebriyan heini emun Andew te Kedhimeley wey emun Pista te Kebpuun te Hayag. 2 Is pengulu ziyà ebayà te veyeey he ebpekesinaru ziyà te edsilaan, ne edhitindeg sikandin diyà te avey zuen te pultahan dutun te ebpemuhat is menge memumuhat te pemuhat he edtutungen wey te pemuhat din he para te meupiya he kedepità. Dutun te pultahan ed-azap is pengulu ne kegkepasad kayi egawas sikandin, piru haazà is pultahan kenà edlekevan te taman te mezukilem. 3 Kada Andew te Kedhimeley wey kada Pista te Kebpuun te Hayag, is menge etew te Israel, ne med-azap daan kedì dutun te egkesineruwan te ǥemawan. 4 Kada Andew te Kedhimeley, mebpemuhat is Pengulu kayi te kedì te sevaha he meǥurang en he kerehidu he meemahan wey heenem he nati he kerehidu he wazè din sazir he ibpemuhat he edtutungen. 5 Is pemuhat he para gasa he idlapik duen te meǥurang en he kerehidu, ne liwazà te saku he herina, piru sumalè en is egkeusatan duen te pengulu he kezekelà te herina he idlapik din duen te kada nati he kerehidu. Is kada liwazà te saku he herina he idlapik din duen te menge pemuhat he kerehidu, mebpemuhat daan sikandin te sengegelun he lana te ulibu.

6 “Kada Pista te Kebpuun te Hayag mebpemuhat is pengulu: sevaha he turiti he vaka, sevaha he meǥurang en he kerehidu, wey heenem he nati he kerehidu he meemahan he pudu wazè dan sazir. 7 Is pemuhat he para gasa he idlapik duen te pengulu ziyà te turiti he vaka wey ziyà te meemahan he kerehidu he meǥurang en ne tig liwazà te saku he herina, piru sumalè en is egkesuatan din he kezekelà te herina he idlapik din diyà te kada nati he kerehidu. Te kada tengà te saku he herina he idlapik din te menge pemuhat he uyaǥen, mebpemuhat daan sikandan te sengegelun he lana ha ulibu. 8 Emun edseled is pengulu su ebpemuhat, kinahanglan he ziyà sikandin ebayà te varkun te veyeey, ne zutun daan sikandin megawas.

9 “Emun ed-ezapen a ziyà he valey ku te menge etew te Israel zutun te timpu te menge pista, is edseled he ziyà ebayà te veyeey he zapit te zizaya kinahanglan he ziyà mebayà te veyeey he zapit te zivavà emun egawas en, ne is edseled diyà te zivavà kinahanglan he ziyà egawas te zizaya. Wazà medseled wey megawas he zutun ded ebayà te imbayè din te kedseled din, kinahanglan he ziyà sikandin mebayà te zivaluy emun diyà sikandin mebayà te zivaluy zutun te kedseled din. 10 Edredsà kandan is pengulu te kedseled wey kegawas.

11 “Dutun te timpu te nekedseselekawà he menge pista, is pemuhat he para gasa he idlapik te turiti he vaka wey te meǥurang he kerehidu, tig liwazà te saku he herina piru sumalè en is egkesuatan duen te ebpemuhat ke sengemenu kezekelà is idlapik din he herina ziyà te kada nati he kerehidu. Is kada liwazà te saku he herina he idlapik din te pemuhat he uyaǥen, lepiki zin te sengegelun he lana te ulibu. 12 Emun ebpemuhat is pengulu te pemuhat he edtutungen etawa pemuhat he para te meupiya he kedepità he keugelingen he suat is kebpemuhata zuen, ebpuwasan para kandin is beyeey he ebpekesinaru ziyà te edsilaan, ne ebpemuhat sikandin te menge pemuhat he iring te kebpemuhat din emun Andew te Kedhimeley. Ne emun ebpekeǥawas en sikandin edlekevan en haazà is pultahan.

13 “Kada meselem, kinahanglan he zuen ibpemuhat kayi te kedì he kerehidu he menge senge-tuig is keǥurang din he wazè din sazir he pemuhat he edtutungen. 14 Idlapik kayi te kerehidu is pemuhat he para gasa he heepat he kilu he herina, wey senge litru he lana te ulibu he para idsahug te herina. Heini he sulunuzen is mehitenged te pemuhat he para gasa kinahanglan he edtumanen taman te taman. 15 Umbe kada meselem, kinahanglan he zuen ibpemuhat kayi te kedì he kerehidu, herina, wey lana te ulibu he andew-andew he pemuhat he edtutungen.”

16 Mibpedayun pa megkaǥi is Nengazen he MEGBEVAYÀ te, “Emun ebeǥey ziyà te sevaha te menge anak din is pengulu, te tanà he ebpuun diyà te nepengevilin din, heeyan he tanà iyan dà ebpekaangken duen is menge kevuwazan din taman te taman. 17 Piru emun diyè din ibeǥey heini te sevaha te menge suluǥuen din, egkaangken heini zutun te suluǥuen taman dà te midtail he Tuig te Kebeǥey te Bayàbayà wey Ked-ulì. Dutun he tuig id-ulì din haazà is tanà diyà te pengulu. Iyan dà is menge anak te pengulu egkehimu he ebpekaangken te tanè din taman te taman. 18 Is pengulu, kinahanglan he kenè din penguwaa is tanà te menge etew. Emun ebeǥey sikandin te tanà diyà te menge anak din, kinahanglan he kandin dà he tanà is iveǥey zin, su wey kenà mewezai te tanà is menge etew ku.”

19 Hein nepasad haazà miduma a zuen te etew ziyà te segradu he ruǥu te menge memumuhat he ebpekesinaru ziyà te zivavà. Diyè key mebayà te pultahan he kilid te veyeey. Dutun impeehè din kedì is sevaha he lugar he zapit te edsenlepan dutun he menge ruǥu. 20 Migkeǥiyan e zin te, “Kayi he lugar edlutù is menge memumuhat te pemuhat he vayad te salà, pemuhat he para idlumpiyu, wey pemuhat he para gasa. Kayi zan heini edlutua su wey zan melikayi is ked-uwita zuen te menge pemuhat diyà te ǥawas he lama. Pinaaǥi kayi kenà ebpekezezaat te menge etew is kegkesegradu zuen te menge pemuhat.”

21-22 Ne midume e zin diyà te ǥawas he lama, ne impeehè din kedì is heepat he suyuk kayi. Diyà te kada suyuk duen ku naahà he zeisey he lama he 68 he ǥiek is keleyatan din ne 50 he ǥiek is keluaǥan din. Neked-iiring is kezekelà kayi he menge lama. 23 Is kada sevaha kayi, neliǥuy te mevavà he verengbeng he menge vatu ne ziyà te kilid dutun te verengbeng he zuen duen tetevunà. 24 Ne migkaǥi haazà is etew kayi te kedì te, “Iyan heini avu he kayi edlutua te menge ebpemenilbi ziyà te valey te Nengazen is menge pemuhat te menge etew.”