1 Dutun he timpu, midsuǥù te Megbevayà diyà te Israel is menge ebpeneuven he si Haggai wey si Zacarias he apù ni Iddo te kegkaǥi te menge lalag din diyà te menge Judio ziyà te Juda wey Jerusalem. 2 Nemineg kandan si Zerubabel he anak ni Shealtiel wey si Jeshua he anak ni Jozadak. Umbe midlaus dan is kebenguna zuen te valey te Megbevayà diyà te Jerusalem ne midtevangan sikandan dutun te zezuwa he ebpeneuven te Megbevayà.

3 Piru wazè en meuǥet, ne nekeuma ziyà te Jerusalem si Tatenai he gubirnedur te prubinsya zini layun te Eufrates, si Shetar Bozenai, wey is menge zuma zan. Mid-insaan dan is menge Judio te, “Hentei is midsuǥù keniyu te ked-uman kebangun kayi te valey?” 4 Mid-insè dan daan te, “Hentei is menge ngazan te menge etew he midterebahu kayi?” 5-7 Piru mibentayan te Megbevayà is menge pengulu te menge Judio, umbe midisisyun si Tatenai, si Shetar Bozenai, wey is menge zuma zan he menge upisyal te prubinsya he dini layun te Eufrates he kenè dan en ibpeengkezan is kebenguna zuen te valey te Nengazen taman te egketudtulan sikandan te menge lalag ni Hadì Darius mehitenged kayi wey ke hengkey is tavak din.

Iyan heini taǥù te surat he impeuwit dan diyà te ki Hadì Darius:

“Minahal he Hadì Darius,

“Berakat he meupiya is kebpekesavuk nu.

8 “Ibpehibelu zey kenikew, Mahal he Hadì, he midhendiyè key te prubinsya he Juda, diyà te ebengunan te valey te mekeǥeǥehem he Megbevayà. Dezekelà he menge vatu is egemiten te kebenguna zuen te simbahan, ne is menge verengbeng din midteuzan te menge trusu su wey mebmelig-en. Mesigudu sikandan he edterebahu, umbe meǥaan is kebenguna zan kayi. 9 Mid-insaan dey is menge pengulu zan ke hentei is midsuǥù kandan te ked-uman kebangun duen te valey te Megbevayà. 10 Ne in-insè dey zaan is menge ngazan dan su wey zey ikepetueni kenikew ke hentei is menge pengulu te kebenguna zuen te valey te Megbevayà.

11 “Iyan heini tavak dan kenami: ‘Menge suluǥuen key te Megbevayà diyà te langit wey kayi te kelibutan, ne ed-umanan dey ebenguna is baley te Megbevayà he mibangun dengan te sevaha he mekeǥeǥehem he hadì te Israel. 12 Ne ǥeina te mibaal is menge kepuun dey te ingkepauk te Megbevayà diyà te langit, mibey-anan din sikandan he mesakup ni Nebucadnezar te Kildiyanhen he hadì te Babilonia. Ne midrundus ni Nebucadnezar heini is baley te Megbevayà ne mibihag din is menge kepuun dey pehendiyà te Babilonia. 13 Piru hein nehuna he tuig te kedhadì ni Cyrus diyà te Babilonia, mibmandù sikandin he ed-umanan ebenguna is baley te Megbevayà. 14 In-ulì din is menge vulawan wey menge pelata he menge gelemiten diyà te valey te Megbevayà. Heini he menge gelemiten migkuwa zengan ni Nebucadnezar ziyà te valey te Megbevayà diyà te Jerusalem ne intaǥù din diyà te simbahan diyà te Babilonia. Insarig ni Hadì Cyrus heini he menge gelemiten diyà te ki Sheshbazar he iyan mibpilì din he gubirnedur ziyà te Juda. 15 Migkaǥi sikan is hadì diyà te ki Sheshbazar te ed-umanan ebenguna is baley te Megbevayà diyà te Jerusalem diyà te nehuna he mibengunan duen, ne idtaǥù dutun sikan is menge gelemiten kayi. 16 Umbe, midhendiyà si Sheshbazar te Jerusalem ne impetukud din is menge pundasyun duen te valey te Megbevayà. Ne taman en guntaan is kebenguna kayi te valey te Megbevayà ne wazè pa heini mepasad.’

17 “Guntaan, Mahal he Hadì, ipesusi nu is menge surat he impetaǥù te menge hadì te Babilonia ke tutuu ve he insuǥù ni Hadì Cyrus is ked-umana kebenguna zuen te valey te Megbevayà diyà te Jerusalem. Ne ipetueni nu kenami ke hengkey is disisyun nu mehitenged kayi.”