1 Ne midtavak si Job te, 2 “Iyan diyà te isip niw he iyan kew zà metau ne wazè en egkesamà he metau emun ebpatey kew en. 3 Piru metau a zaan iring keniyu; kenè kew lavew kediey. Netuenan ku zaan heini is langun he mibpengaǥi niw. 4 Nehimu a he egkeengitan te menge emiǥu ku minsan metazeng a wey wazà kedì igkesawey, wey minsan edtevaken dengan te Megbevayà is menge kebpengemuyù ku. 5 Is menge etew he iring kedì, te zuen din elentusen he henduen be te egkepiley en, ed-un-undahan te menge etew he ebpeeyehey zà. 6 Piru is menge tulisan wey is menge etew he ebaal te igkepauk te Megbevayà, melinawen mulà is kebpengungubpaan dan, minsan is kebpekegaga zan, ne iyan ed-isipen dan he megbevayè dan.

7-8 “Istudyu ka pinaaǥi te kebpeniid te minsan hengkey he kelasi te zuen din gehinawa: is ebpemenhipanew, is ebpemenlayang, is ebpemenanap, wey is ebpemenlayewlayew. 9 Su sikandan is langun, netau kayi te mibeelan te Nengazen. 10 Diyà te velad din is untung etawa gehinawa te langun he linimbag ragkes is etew. 11 Emun is dilà te etew egketau ke hengkey is metaam etawa mezaat he keenen, is telinga te etew egketau zaan ke hengkey is meupiya etawa mezaat he menge lalag. 12 Mezakel is netuenan te meǥurang en he etew, su emun ebmeluǥayad is untung te etew, ebmahabet daan is egketuenan din.

13 “Piru Megbevayè dà is duen din ketau he egkezumahan te ǥehem, ne iyan dà sikandin duen din tutuu he kedsavut ke hengkey is ereg he ebeelan. 14 Wazà ebpekeped-uliey te egevaan din, wey wazà ebpekepeǥawas te ebpirisuwen din. 15 Emun edsebpengan din is uzan, ebmemaza is tanà, emun ebpesegdanen din is uzan, edalem ne egkezeetan is tanà. 16 Mezesen sikandin wey mezeeǥen, su zizalem te ǥehem din is ebpenlimbung wey is edlimbungan. 17 Ed-ewaan din is ketau te menge sumesambag, wey edhimuwen din he tulebung is menge meghuhukum. 18 Id-awè din is menge hadì puun te kegkahadì dan wey ibpevihag din sikandan. 19 Id-awè din is menge memumuhat wey is menge etew puun diyà te ketengdanan he ebpekeveǥey kandan te ǥehem. 20 Ibpepereremek din is egkeseriǥan he menge sumesambag, wey id-awè din is hustu he kedsavut te menge meǥurang. 21 Edsudien din is nevantug he menge etew, ne id-awè din is gehem te gehemanen he menge etew. 22 Ibpeǥawaǥawa zin is menge in-eles, ne ibpemerayag din is merusirem. 23 Edhimuwen din he gehemanen wey ebmeluag is menge nasyun, piru edaaǥen din wey edezeetan din heini. 24 Edhimuwen din he tulebung is menge pengulu zan, wey edtezinen din sikandan diyà te sibsivayan. 25 Ebpemekekaapkaap sikandan diyà te merusirem wey egkengetevereg he henduen be te egkengelangut.”