1 “Sikami is menge etew, ne mevavè dà is untung dey ne mahabet is ebpekerasey kenami. 2 Iring key te vulak he ebekar ne kenà egkeuǥet ne egkeǥangu en, wey iring te alung he segugunà egkahanew. 3 Ne maan is ebpekeventayan nu is etew, Nengazen? Ne egkesuatan nu pa sikandin te edhukum. 4 Duen be etew he wazà kurang is kegkelumpiyu zin? Wazà! Su is langun, neetew he meremerik. 5 Imbanglis nu en ke sengemenu keluǥayad is untung te etew. Ne kenè din egkepesubrahan is timpu he inteǥana nu kandin. 6 Umbe, kenè nu en lisliseza is etew, bey-ani nu en sikandin he ebpekepeeyehey zaan iring te terebahanti he ebpekepasad te terebahu.

7 “Emun edtempezen is kayu, egkehimu pa he egkeuyag wey ed-uman edtuvù. 8 Minsan metesan en is dalid din wey egkeǥangu en is tued din, 9 emun egkevinyaǥan heini ebpeneringsing pa he iring is tuvù din te veǥu he pinemula. 10 Piru is etew mulà he ebpatey, ne egkaawè en is langun he zesen din. Kegkevidtew te ǥehinawa zin ne iyan en haazà ketepusan din. 11 Iring te edeisey is wahig diyà te zaǥat wey egkemezahan is wahig he edtudà, 12 is etew ebpatey, ne kenè en ebpekeenew etawa kenè en egkepukew te lipezeng din mintras duen pa langit.

13 “He Nengazen, deyzey ke id-eles a kenikew ziyà te lugar te menge minatey taman te egkaawà is pauk nu, ne edteleenen nu is timpu he edtentenuzan a kenikew zutun he lugar. 14 Emun ebpatey is etew egkeuman pe be sikandin egkeuyag? Piru ed-entusen ku is tivuuk he timpu te kebpekaantus ku taman te egkeuma is timpu te kegkepasad kayi. 15 Emun timpu te ked-umew nu kedì, Nengazen, edtavak a. Tentenuzi a kenikew is linimbag nu. 16 Minsan pa ke ebentayan nu is menge vaal ku, piru kenè nu en mulà isipa is salè ku. 17 Henduen dà te idtaǥù nu heini ziyà te teleǥuey su wey mekeeles ne kenè nu en egkaahà. 18 Piru iring te egketempag is buntud wey egkengeulug is menge vatu puun te kelendiǥan, 19 wey iring te egkehilis is batu te kegketulungi zuen kegketudai te wahig wey egkevanlas is tanà tenged te utew mereǥes he uzan, egevaan nu zaan is perateng te etew. 20 Layun nu edaaǥa is etew ne ebpatey sikandin, ne ebeǥuwen nu is kegkeveeli kandin emun ebpatey en sikandin. 21 Kenè din en egketuenan ke ebeǥayan be te zengeg is menge anak din etawa ebpendezeisayen. 22 Iyan din dà neǥezam is kandin he kegkesekiti wey kegkeseeng.”