1  Nengazen, pemineǥa nu is pengemuyù ku he egkezumahan te zag-es.

2 Pemineǥa nu is kebuyù ku te tavang diyà te kenikew, he Megbevayà he hadì ku,

su ziyà a te kenikew ebpengemuyù.

3 Emun meselem ed-endamen ku is gehinawa ku te kebpengemuyù diyà te kenikew.

Ne emun ebpekepasad e en, ne edteǥazan ku is tavak nu te hangyù ku.

4 Sikew is tutuu he Megbevayà, ne kenè nu igkelipey is mezaat he ulaula;

kenè nu edewaten is lalung he menge etew.

5 Kenà ebpekeuvey kenikew is menge mepelevawen;

egkepeukan nu is langun he ebaal te mezaat.

6 Edezeetan nu is menge teruen

ne egkeepesan nu is menge etew he ebpenhimatey te etew wey is menge men-aakal.

7 Iyan, siak mulà, ebpekeseled a ziyà te valey nu he segradu

su ǥeina te utew a kenikew mibmahal.

Ne zutun ku sikew ed-ezapa te ked-azap duma te zekelà he kedtahud kenikew.

8  Nengazen, tenged te mahabet is menge kuntada ku,

giyahi-a kenikew sumalà te ketazeng nu.

Pekeleduwi nu kediey is utew hustu he paaǥi nu su wey ku iyan mesunud.

9 Kenà egkeseriǥan is lalag te menge kuntada ku,

su iyan dà tuyù dan is kedezaat te zuma he etew.

Is menge lalag dan igkepetug-iring te neebriyan he leveng he edsengew is kemahù din.

Is menge egkeǥiyen dan ne pudu limbung.

10 Megbevayè ku, siluti nu is menge kuntada ku.

Deyzey ke egkeuney sikandan te mezaat he menge tuyù dan.

Iselikwey nu sikandan tenged te utew subra is menge salè dan,

su mibpekidsukulè dan kenikew.

11 Piru berakat he mebmelipayen is langun he menge etew he ziyà med-aput te kenikew.

Deyzey ke ebpekeuruhuy sikandan te kegkelipey zan.

Ilikey nu te kezeetan is menge etew he mibmahal kenikew

su para mebmelipayen sikandan tenged dutun.

12 Edtuvazan nu, Nengazen, is menge metazeng.

Is kebmahala nu kandan ne iyan nehimu he kelasag dan he kenà egkezeetan.