1 Sikiyu is menge metazeng,

ugyab kew tenged te kegkelipey niw.

Sikiyu is nengungubpaan te hustu he paaǥi,

deliǥa niw su mezait sikandin he edeliǥen!

2 Deliǥa niw is Nengazen pinaaǥi te alpa.

Tukari niw is Nengazen te zuma pa he menge pezaǥing he zuen din menge kuwirdas.

3 Kentahi niw sikandin te veǥu he kanta;

tukari niw sikandin te meupiya,

ne ugyab kew tenged te kegkelipey niw.

4 Su tutuu is lalag te Nengazen,

ne egkeseriǥan is langun he ebeelan din.

5 Egkasuat is Nengazen he ebaal te metazeng wey hustu.

Egkaahà kayi te tivuuk he kelibutan is gaǥew zin.

6 Pinaaǥi te lalag te Nengazen,

nehimu is langit: andew, bulan, wey menge vituen.

7 Midtingeb din is wahig te zaǥat he henduen be te intaǥù diyà te gerepun etawa insavuk diyà te budiga.

8 Is langun he etew kayi te kelibutan ereg he edtahud te Nengazen.

9 Su migkaǥi zà sikandin ne nehimu en is kelibutan.

Mibmandù dà sikandin ne nehimu is langun.

10 Edèdeetan te Nengazen is pelanu te menge nasyun,

ne kenè din idtuǥut he medlampus is menge tuyù dan.

11 Piru is kandin mulà he menge pelanu ne ebpedayun te wazà pidtemanan;

is kandin he menge ketuyuan kenà egkaawà taman te taman.

12 Utew zeyzey is nasyun he iyan Megbevayè din is Nengazen.

Utew zeyzey is menge etew he migaked te Nengazen.

13 Puun diyà te langit edtengtengan te Nengazen is langun he menge etew.

14 Diyà sikandin te ubpeey zin ne edtengtengan din is langun he ed-ubpà kayi te kelibutan.

15 Iyan sikandin mibeǥey te isip diyà te langun he menge etew,

ne netuenan din is langun he ebpen-ul-ulahan dan.

16 Is hadì kenà ebpekezaag te tebek tenged dà te kezakel te menge sundaru zin.

Is sevaha he sundaru kenà ebpekeǥawas he libri puun te tebek tenged dà te kezesen din.

17 Kenà tenged te menge kudà is kebpekesiguru te kebpekezaag te tebek.

Kenà ebpekelibri is kezesen dan.

18 Ebentayan te Nengazen is menge edtahud kandin,

he edsarig te kebmahala zin kandan.

19 Iyan sikandin edlibri kandan te kemetayen wey ed-uyag kandan emun timpu te vitil.

20 Edtaǥad kiw zuma is kedsarig te Nengazen.

Iyan sikandin edtavang wey ebpengalang kenitew.

21 Egkelipey kiw tenged kandin.

Su edsarig kiw ziyà te kandin te waǥas he Megbevayà.

22  Nengazen, deyzey ke kenà egkaawà is kebmahala nu kenami,

iring te edsarig key ziyà te kenikew.