1 He Megbevayà, ipedsusuwey nu en is menge kuntada nu.

Berakat he mekepelaǥuy sikandan.

2 Segseǥa nu sikandan iring te evel he idlayap te keramag.

Dezeeti nu is menge lalung diyà te etuvangan nu,

iringa nu te kendilà he egketunew te hapuy.

3 Piru is menge metazeng, ed-ugyab sikandan te kegkelipey ziyà te etuvangan nu.

4 Kentahi niw is Megbevayà,

kentahi niw sikandin te menge kedalig.

Deliǥa niw sikandin is ed-untud te ǥapun.

Is ngazan din iyan is Nengazen;

mebmelipayen kew ziyà te etuvangan din.

5 Is Megbevayà he ziyà ed-ubpà te segradu he valey zin,

ed-elimahan din is menge ilu ne edlevanan din is menge valu he vahi.

6 Ebeǥeyan din te pemilya sikan is egketawantawan

ne melipayen is menge vihag he edlibriyen din.

Iyan, is menge mesinupaken mulà, diyà sikandan ebpekeubpà te meinit he lugar he memaza is tanà duen.

7 He Megbevayà, hein mibpenguluwan nu is menge etew nu te kedhipanew ziyà te sibsivayan,

8 nehuyung is tanà wey mid-uzan

su geina te nekeuma ka, is Megbevayà te Israel.

Impezayag nu is keugelingen nu ziyà te Sinai.

9 Ne wazà kurang te uzan he imbeǥey nu,

umbe nepurung mahames is memaza he tanà he imbeǥey nu ziyà te menge etew nu.

10 Ne zutun med-ubpà is menge etew nu,

ne tenged te keupiya nu mibeǥayan nu is menge pubri he menge etew te egkinehenglanen dan.

11 Nenelaan ka, Nengazen,

ne impenudtul haazà te mahabet he menge vahi:

12 “Nemelaǥuy is menge hadì wey is menge sundaru zan,

ne is menge azen dan mibahin te menge vahi he tig-Israel.

13 Minsan sikan is mibpetaǥak diyà te tudil te menge kerehidu nekezawat te vahin he menge ledawan he merepatik,

he is menge pakpak dan mid-epizan te pelata ne mid-epizan te lunsey he vulawan is purù dutun te pakpak dan.”

14 Hein impedsusuwey te Megbevayà he Mekeǥeǥehem sikan is menge hadì,

henduen sikandan te menge ayis he midtanà diyà te Buntud he Zalmon.

15 Utew mekempet is Buntud he Bashan; mahabet is menge vuvungan dutun.

16 Maan is nesina heini te vuntud he mibpilì te Megbevayà he iyan ed-ubpaan din te wazà pidtemanan?

17 Nekeuma is Nengazen diyà te valey zin he ebpuun diyà te Sinai duma te linibu he menge kerwahi zin.

18 Hein mibpeketikang sikandin, mahabet he menge vihag is mid-uwit din,

ne midawat din is menge gasa he ebpuun diyà te menge etew,

minsan is ebpuun diyà te mesinupaken kandin.

Ne kayi te kenitew ed-ubpà is Nengazen he Megbevayà.

19 Ereg he edeliǥen is Nengazen he Megbevayà he menluluwas tew,

su andew-andew edtevangan kiw zin te menge prublima tew.

20 Is Megbevayè tew, Megbevayà he edlibri.

Iyan sikandin Nengazen he Megbevayà he edlibri kenitew te kemetayen.

21 Kenà duwazuwa he ebekbeken te Megbevayà is ulu te menge kuntada zin he kenà ed-engked te kebaal te salà.

22 Migkaǥi is Nengazen te,

“Ibpelikù ku is menge kuntada ku he ebpuun diyà te Bashan;

ibpelikù ku sikandan ebpuun diyà te zizalem te zaǥat,

23 su ebpenhimetayan sikandan ne edtekutakan niw is lengesa zan

ne edtulungan heini ebpendilai te menge asu niw.”

24 He Megbevayà wey Hadì ku, egkaahà te langun is kedsilibraha te menge etew nu te kezeeǥan nu pinaaǥi te kedhendiyè dan te valey nu.

25 Edhuna is ebpemenganta, ne ebpehuziyan is ebpemenduyug te kanta,

ne ziyà te pid-elangan dan iyan is menge raǥa he ebpezaǥing te menge tamburin.

26 Ne ibensag dan is lalag he edhenduen te,

“Deliǥa niw is Megbevayà ke edtiǥum kew!

Sikiyu is langun he kevuwazan ni Israel, deliǥa niw is Nengazen!”

27 Edhuna is deisey he tribu ni Benjamin,

ne iyan edtinundug is menge pengulu te Juda duma is menge grupu zan,

ne edtinundug kandan is menge pengulu te Zebulun wey Naftali.

28 He Megbevayà, ipeehè nu is gehem nu iring te mibeelan nu ziyà te kenami zengan.

29 Tenged te valey nu ziyà te Jerusalem ed-uwit is menge hadì te ǥasa zan kenikew.

30 Dewaya nu heeyan is nasyun he iring te kumekaid he langgam diyà te meribpesen.

Dewaya nu zaan is menge nasyun he iring te menge tudu he vaka duma te menge nati

taman te edluhud sikandan ne idhalad dan diyà te kenikew is menge pelata zan.

Ipedsusuwey nu is menge etew he igkelipey zan is kebpekidtebek.

31 Ebpesakup kenikew is menge tig-Ehipto.

Ne egkengelagewlagew is menge tig-Etiopia te kebeǥey te ǥasa ziyà te kenikew.

32 Sikiyu is menge sakup te menge ginhedian kayi te kelibutan, kentahi niw is Megbevayà.

Kanta kew te kedalig te Nengazen

33 he ed-untud te kezaan he langit.

Pemineǥa niw is ebpenriǥungriǥung he laǥeng din.

34 Ipezayag niw is kegkemekeǥeǥehem te Megbevayà he edhadì te Israel.

Is langit ebpaahà te kegkemekeǥeǥehem din.

35 Ebpendeǥubduven ki is ed-etuvang te Megbevayà te Israel ziyà te segradu he ubpeey zin.

Ebeǥayan din te ǥehem wey zesen is menge etew zin.

Dait he edeliǥen is Megbevayà!