1 Sikiyu is menge lumunè ku te inged, pemineǥa niw is menge penurù ku.

2 Ebpenuruen ku sikiyu pinaaǥi te menge sempità.

Edtudtulen ku keniyu is in-eles he menge ketutuanan dengan

3 he netuenan tew en,

su midtudtul kenitew te menge kepuun tew.

4 Kenè tew heini id-eles te menge vatà;

edtudtulen tew heini ziyà te edsunud he menge lapis te kevuwazan.

Edtudtulan tew sikandan te ǥehem te Nengazen wey te egkengein-inuwan wey zait he edeliǥen he menge vaal zin.

5 Mibeǥayan din te kesuǥuan is menge etew ziyà te Israel he menge kevuwazan ni Jacob.

Ne insuǥù din diyà te menge kepuun tew he ipenurù dan heini ziyà te menge anak dan,

6 su para metueni heini te ebpekesunud he lapis te kevuwazan,

ne igkepenurù dan daan heini ziyà te menge anak dan.

7 Ne pinaaǥi kayi edsarig sikandan te Megbevayà,

ne kenè dan egkelipatan is mibpemeelan din ne edtumanen dan is menge suǥù din.

8 Ne kenà sikandan egkeiring te menge kepuun dan he menge supekiru, kenà menge metinumanen, kenà melig-en is kedsarig dan te Megbevayà, wey kenè dan mepezumdumahan kandin.

9 Is menge sundaru he menge kevuwazan ni Efraim, minsan neǥumeenan sikandan te menge panà, nemelaǥuy sikandan dutun te timpu te tebek.

10 Wazè dan tumana is kebpekid-uyun dan te Megbevayà;

wazè dan sunuza is kesuǥuan din.

11 Midlipatan dan is egkein-inuwan he menge vaal zin he impeehè din kandan.

12 Egkein-inuwan is mibeelan te Megbevayà diyà te Zoan he sakup te tanà he Ehipto,

ne naahà haazà te menge kepuun tew.

13 Midtevì din is daǥat ne impevayè din sikandan;

diyè din isavuk te pesikilizà te nezalandalan he tanà is wahig he henduen be te menge elavat.

14 Emun maandew, egiyahan din sikandan pinaaǥi te ǥapun,

ne te mezukilem, ne pinaaǥi te kerayag te hapuy.

15 Impeveka zin is menge vatu ziyà te sibsivayan ne midtudà puun dutun is wahig he henduen be te ziyà ebpuun te serebseb,

umbe kenà alang-alang he wahig is imbeǥey zin kandan.

16 Impetudè din puun dutun te vatu is wahig,

ne henduen be haazà te ziyà ebpuun te zekelà he wahig he edtudà.

17 Piru is menge kepuun tew, mibpedayun dan mulà he ebaal te salà diyà te kandin.

Dutun te sibsivayan midsukulan dan is Utew Lavew he Megbevayà.

18 Midtivevè dan gezami is Megbevayà pinaaǥi te kebuyù dan te ampey zan he keenen.

19 Mid-insultuwan dan is Megbevayà pinaaǥi te kegkaǥi zan te, “Kenè kiw vuwa igkepekaan te Megbevayà kayi te sibsivayan.

20 Tutuu iyan he hein midtabpì din sikan is batu ne migawas is wahig,

piru egkeveǥayan kiw zin be zaan buwa te supas wey usa is menge etew zin?”

21 Umbe, nepauk is Nengazen te kegkezineǥa zin kandan.

Iring te hapuy is pauk din te menge tig-Israel he menge kevuwazan ni Jacob.

22 Su wazè dan kedtuu kandin, ne wazè dan medsarig he edlibriyen din sikandan.

23 Piru minsan pa te iyan haazà, midsuǥù din is langit he med-abri,

24 ne mibpeud-uzanan din sikandan te keenen he egngezanan te ‘manna’.

Imbeǥey zin kandan is keenen he ebpuun te langit su wey zan mekaan.

25 Sikandan is menge etew zà duen, nekekaan dan te keenen te menge velinsuǥuen.

Ne impezahar te Megbevayà heini he keenen diyà te kandan.

26 Impepengeramag te Megbevayà te keramag he ebpuun te edsilaan wey edsenlepen pinaaǥi te ǥehem din.

27 Ne mibpantad is menge tagbis he impeuzan-uzan din diyà te kandan.

28 Impelugtanè din haazà diyà te ebpekeliǥuy te menge tulda zan duen te kampu zan.

29 Umbe, nekekaan sikandan ne nengahantey zan,

su imbeǥey te Megbevayà kandan is egkesuatan dan.

30 Ne zutun te ebpetakè en sikandan egkaan,

31 nepeukan sikandan te Megbevayà.

Mibpenhimetayan din is tig-Israel he menge vetan-en he memeupiya is kedlelawa wey memezesen.

32 Piru minsan pa te neseǥazan dan heini is langun he egkein-inuwan he mibpemeelan te Megbevayà, wazè dan med-engked he ebaal te salà wey wazè dan medtuu kandin.

33 Umbe, migègaanan din tepusa is menge untung dan pinaaǥi te netik-ew he kezeetan.

34 Ne hein mibpenhimetayan din is duma kandan,

ne is duma zuen te nengesamà, midsendit dan ne midangep dan diyà te kandin ne zekelà is suat dan te tavang din.

35 Neisip dan he iyan endilungè dan wey edlibri kandan is Utew Lavew he Megbevayà.

36 Piru kenà diyà ebpuun te ǥehinawa zan is kedeliǥa zan kandin su menge teruen sikandan.

37 Kenà meheǥet is gehinawa zan diyà te kandin;

kenè dan metinumanen te kebpekid-uyun kandan.

38 Minsan pa te iyan heini, hihizuwen gihapun kandan is Megbevayà.

Mibpesaylu zin sikandan te menge salè dan ne wazè din sikandan dèdeeti.

Layun din ed-eǥena is pauk din kandan minsan utew en sikandin egkepauk.

39 Midtentenuzan din he menge etew zà sikandan, he iring te keramag he edlavey zà su ebpematey sikandan.

40 Diyà te sibsivayan, layun dan edsupaka wey ebeǥayi te seeng is Megbevayà.

41 Layun dan egezami is Megbevayà;

ebeelan dan is igkeepes te Waǥas he Megbevayà te Israel.

42 Midlipatan dan is gehem din he impeehè din hein midlibri zin sikandan te kegkeiza kandan te menge kuntada zan,

43 ne midlipatan dan sikan is egkein-inuwan he mibeelan din diyà te Zoan he sakup te tanà he Ehipto.

44 Midhimu zin he lengesa sikan is edtudà he menge wahig te menge tig-Ehipto, umbe wazà egkeinum dan.

45 Mibpehurepunan din sikandan te utew subra he langew para merasey sikandan;

impelepew zin is gerabi he menge vakbak he nekezezaat te menge pinemula zan.

46 Impekaan din te terapan is menge pinemula zan wey menge abut dan.

47 Mibpendèdeetan din is menge perasan dan wey menge kayu zan he sikemur pinaaǥi te ǥiyew.

48 Mibpenhimetayan din is menge uyaǥen dan pinaaǥi te ǥiyew wey kilat.

49 Tenged te utew zin kegkepeuki kandan,

midsuǥù din is duma zuen te menge velinsuǥuen din te kedezaat kandan.

50 Wazè din eǥena is pauk din;

wazè din sikandan libriya te kemetayen,

kekenà, mibpenhimetayan din sikandan pinaaǥi te mezaat he menge hitavù.

51 Mibpenhimetayan din is langun he penganey he menge anak he maama diyà te Ehipto,

he iyan kes menge kevuwazan ni Ham.

52 Impeǥawas din puun te Ehipto is menge etew zin he iring te menge kerehidu he migiyahan din diyà te sibsivayan.

53 Midumahan din sikandan, umbe wazà sikandan mahandek.

Piru nengelened mulà diyà te zaǥat is menge kuntada zan.

54 Mid-uwit din sikandan diyà te tanà he mibpilì din;

diyà te menge vuntud he mid-aǥew zin pinaaǥi te ǥehem din.

55 Midsegseg din sikandan pehendiyà te meziyù te menge etew zin,

ne mibahinbahin din haazà is tanà.

Mibehinan is kada tribu te Israel su para maangken dan haazà,

ne zutun din sikandan ipeubpà.

56 Iyan, migezaman dan is Utew Lavew he Megbevayà,

su midsupak dan sikandin ne wazè dan tumana is menge suǥù din.

57 Iring te menge kepuun dan, mibpekeziyuan dan wey midluivan dan is Megbevayà.

Ne iring sikandan te nevadtì he panà su kenà sikandan egkeseriǥan.

58 Midhimu zan he mepauk wey mebpengelikud kandan is Megbevayà pinaaǥi te kebangun dan te menge simbahan diyà te metikang he menge lugar

wey te ked-azap dan te zuma he menge ed-ezapen.

59 Netuenan te Megbevayà heini is mibeelan te menge tig-Israel,

umbe nepauk sikandin ne mid-iniyuǥan din en sikandan.

60 Mid-ewaan din sikan is tulda zin diyà te Shilo he iyan ubpeey zin kayi te kelibutan.

61 Intuǥut din he maaǥew te menge kuntada sikan is Kavan te Kebpekid-uyun he simbulu te kegkemekeǥeǥehem din wey kegkelavew zin.

62 Nepeukan din is menge etew he ǥaked din,

umbe mibpenhimetayan din sikandan pinaaǥi te tebek.

63 Mibpeminsulan is menge vetan-en he menge maama kandan,

umbe wazè en ebpekeesawa te menge raǥa zan.

64 Nemematey te tebek is menge memumuhat dan,

ne is nengevalu he menge esawa zan ne wazè en mekelalew para kandan.

65 Piru nehitavù he henduen be te neelimukawan is Nengazen;

neiring sikandin te mezesen he etew he mibmevurut tenged te vinu.

66 Midsegseg din is menge kuntada zin;

ne wazà pidtemanan is kegkepeel-elezi zin kandan.

67 Wazè din pilia is tribu ni Efraim he menge kevuwazan ni Jose.

68 Su iyan din mibpilì is tribu ni Juda wey is Buvungan he Zion he utew zin minahal.

69 Dutun din benguna is baley zin, ne iring heini te langit wey tanà su taman te taman is kelig-en kayi.

70-71 Si David is mibpilì te Megbevayà he egkehimu he suluǥuen din.

Perevantey zà si David te menge kerehidu, piru impeuswag din su midhimu zin si David he hadì te Israel he iyan kes menge etew he ǥaked din.

Umbe igkepetug-iring gihapun si David te perevantey te menge kerehidu,

72 ne tinutuuwà is ked-etura zin te menge tig-Israel

ne mibpurungan din sikandan penguluwi.