1 Deliǥa is Nengazen!

Peselemati sikandin su meupiya sikandin;

wazà pidtemanan te ǥaǥew zin.

2 Wazà minsan hentei he wazà kurang te kedseysaya zin wey kedeliǥa zin te nezumahan te ǥehem he menge vaal te Nengazen.

3 Utew zeyzey is etew he ebaal te hustu wey metazeng seled te langun he timpu.

4  Nengazen, elin a kenikew tentenuzi emun edtevangan nu is menge etew nu;

ne libriya a zaan ke edlibriyen nu sikandan,

5 su wey e zaan mekesaǥad te keuswagan te pinilì nu he nasyun,

su wey e zaan mekaambit te kelipey zan ne ebpekezalig a kenikew duma kandan.

6 Nekesalè key iring te menge kepuun dey;

utew mezaat is mibeelan dey.

7 Hein diyà te Ehipto is menge kepuun dey, wazè dan seǥipaa is egkein-inuwan he menge vaal nu.

Wazè dan tentenuzi is kepipira nu ipaahà kandan he kebmahala nu kandan,

ne midsukul zan kenikew hein diyè dan te Zaǥat he Meriǥà.

8 Piru midlibri nu sikandan para te zengeg nu wey te kebpaahà kandan te ǥehem nu.

9 Midsuǥù te Nengazen is Daǥat he Meriǥà he medtevì su wey meluwisi is egkezalandalan he tanà;

ne migiyahan din sikandan te kedlayun dutun te zaǥat he iring te ziyè dan medhipanew te disirtu.

10 Midlibri zin sikandan puun te ǥehem te menge kuntada zan.

11 Ne nekedlikuey is wahig ne nengelened is menge kuntada zan

ne wazà minsan sevaha he nelibri kandan.

12 Umbe, midtuuwan dan is menge saad din ne migkanta zan te kedalig kandin.

13 Piru meǥaan dà ne nelipatan dan en is mibeelan din,

ne wazè en sikandan medtaǥad te sambag din.

14 Migezaman dan is Megbevayà hein diyà sikandan te sibsivayan tenged te utew zan kegkesuat te keenen.

15 Umbe, imbeǥey zin kandan is mibuyù dan,

piru impaaǥi zin daan diyà te kandan is daru he inmeluya zan.

16 Diyà te kampu zan diyà te sibsivayan nesina sikandan ki Moises wey ki Aaron. Si Aaron mibpili he ebpenilbi te Nengazen.

17 Umbe, mibeka is tanà ne neulug dutun si Datan wey si Abiram wey is menge pemilya zan.

18 Wey zuen daan hapuy he midtutung duen te menge sumusunud kandan he menge lalung daan.

19 Hein diyà te Horeb is menge Israilihanen mibaal zan te vulawan he vaka ne mid-azap dan haazà.

20 Inliwè dan dà is mekeǥeǥehem he Megbevayè dan te ledawan te tudu he vaka he ebpenabtab dà te sagbet.

21-22 Midlipatan dan is Megbevayà he midlibri kandan wey mibaal te mekeǥeǥehem wey egkein-inuwan he menge vaal ziyà te Ehipto he tanà te menge kevuwazan ni Ham, wey sikan is baal zin diyà te Zaǥat he Meriǥà.

23 Edezeetan en pezem te Megbevayà is menge etew zin ke wazà mebpeteliwazà si Moises is suluǥuen din he midhangyù he eǥena zin is pauk din ne kenè din leusa te edezaat sikandan.

24 Ne wazè pa sikandan medseled duen te meupiya he tanà su wazè dan medtuu te saad te Megbevayà.

25 Mibegulbul sikandan diyà te menge tulda zan,

ne wazè dan mebpezumazuma te Nengazen.

26 Umbe, nenangdù is Megbevayà he ebpenhimetayan din sikandan dutun te sibsivayan,

27 ne ibpeyapat din is menge kevuwazan dan diyà te zuma he menge nasyun,

ne zutun sikandan ebpematey.

28 Ne mibpevayàbayà sikandan te ed-ezapen he si Baal ziyà te Buvungan te Peor,

ne migkaan sikandan te impemuhat diyà te menge minatey.

29 Midhimu zan is igkepauk te Nengazen he iyan is mezaat he menge vaal zan,

umbe nehitavù diyà te kandan is bangkit.

30 Piru mibpeteliwazà si Finehas,

umbe neengked haazà is bangkit.

31 Mid-isip si Finehas he metazeng dutun te mibeelan din,

ne edtentenuzan heini te menge etew taman te taman.

32 Ne hein diyè daan is menge Israilihanen te serebseb te Meriba, midhimu zan gihapun is igkepauk te Nengazen,

ne utew ingkesemuki ni Moises is menge vaal zan.

33 Tenged te midhimu zan is ibmezaat te isip ni Moises, ne nekekaǥi sikandin te menge lalag he kenè din pezem ereg he egkeǥiyen.

34 Wazà penhimetayi te menge Israilihanen is menge etew ziyà te Canaan he iyan pezem insuǥù kandan te Nengazen.

35 Nekidsevaha pa ganì sikandan te menge tig-Canaan,

ne mid-iring dan te vetasan kayi he menge etew.

36 Mid-azap dan is menge ed-ezapen kayi he menge etew, ne iyan haazà nekeveǥey kandan te kezeetan.

37 Impemuhat dan is menge anak dan diyà te menge mezaat he mulin-ulin

38 he menge ed-ezapen te menge tig-Canaan.

Ne tenged dutun te kebpenhimetayi zan te menge anak dan he wazè pa hanew,

midremerikan dan is tanà he Canaan,

39 wey ragkes en daan is keugelingen dan.

Ne heeyan is baal zan, iyan paaǥi te kedluivi zan te Megbevayà,

iring dan te vahi he midselselaan din is esawa zin.

40 Umbe, nepeukan te Nengazen is menge etew he ǥaked din,

ne ingkeremerik din sikandan.

41 Imbeǥey zin sikandan diyà te menge nasyun he menge kuntada zan,

ne nezizalem sikandan te keǥehem dan.

42 Midaagdaag sikandan wey mid-uripen te menge kuntada zan.

43 Kemezakel en sikandan libriya te Megbevayà,

piru mibpedayun sikandan te kedsupak kandin,

umbe midezeetan sikandan tenged te salè dan.

44 Piru ebpemineǥen gihapun sikandan te Megbevayà ke ebpengumew zan,

ne edtevangan din gihapun sikandan te menge kelised dan.

45 Midtentenuzan te Megbevayà is kebpekid-uyun din kandan,

ne tenged te utew zin kebmahala kandan, nahalin is isip din ne kenè din en sikandan edsilutan.

46 Ne mibpengelinteuwan din he mehizuwi sikandan te menge mibihag kandan.

47 Libriya key, Nengazen he Megbevayè dey,

ne kuwaa key puun te zuma he menge nasyun.

Ne umana key tiǥuma ziyà te tanè dey,

su para mekepeselamat key wey mekezalig key te kegkewaǥas nu.

48 Edeliǥen is Nengazen he Megbevayà te Israel te wazà pidtemanan.

Is langun he menge etew edtavak te, “Amen!”

Deliǥa is Nengazen!