1 Kenè key iyan ereg he ebeǥayan te zengeg, Nengazen, kekenà, iyan ka,

tenged te kebmahala nu kenami wey te kebmetinumanen nu.

2 Maan is mid-insultuwan key te zuma he menge nasyun pinaaǥi te kegkaǥi te, “Hendei en is Megbevayè niw?”

3 Diyà te langit is Megbevayè dey ne ebeelan din ke hengkey is egkesuatan din.

4 Piru is kandan he menge megbevayà menge pelata zà wey vulawan he mibeelan te etew.

5 Duen dan menge vèbà, piru kenè dan ebpekekaǥi;

duen dan menge mata, piru kenè dan ebpekaahà.

6 Duen dan menge telinga, piru kenè dan ebpekezineg;

duen dan menge izung, piru kenè dan ebpekahazek.

7 Duen dan menge velad, piru kenè dan ebpekeǥawed;

duen dan menge paa, piru kenè dan ebpekehipanew,

ne minsan is laǥeng ne kenè ta egkezineg diyà te kandan.

8 Is mibaal kayi te kenà tutuu he menge megbevayà wey sikan is midsarig kandan, ne egkeiring daan kandan te wazè dan pulus.

9-10 Sikiyu is menge etew te Israel, ragkes en is menge kevuwazan ni Aaron, sarig kew te Nengazen.

Iyan sikandin edtavang wey ebpengalang keniyu.

11 Sikiyu is langun he edtahud te Nengazen, sarig kew ziyà te kandin.

Iyan sikandin edtavang wey ebpengalang keniyu.

12 Edtentenuzan kiw te Nengazen, ne edtuvazan kiw zin.

Edtuvazan din is menge etew te Israel ragkes en is menge kevuwazan ni Aaron.

13 Edtuvazan din is langun he edtahud kandin dekelà se zeisey is pid-etawan dan.

14 Berakat he ipemezakel kew te Nengazen wey is menge kevuwazan niw.

15 Berakat he tuvazi kew te Nengazen he midlimbag te langit wey te kelibutan.

16 Gaked dà te Nengazen is langit piru imbeǥey zin mulà te menusiyà is kelibutan.

17 Kenà iyan edalig te Nengazen is nemematey en,

su kenè en sikandan ebpekekaǥi,

18 kekenà, iyan kiw is menge uuyag pa edalig kandin guntaan wey taman te taman.

Deliǥa is Nengazen.