1 Ereg he edeliǥen is Nengazen he iring te vatu he endilungè ku.

Iyan sikandin midlumbad kedì te kebpekidtebek.

2 Iyan sikandin beliǥeǥawen he Megbevayè ku wey melig-en he elesà.

Iyan sikandin eputè ku wey menluluwas ku.

Iyan sikandin kelasag ku ne ziyà a te kandin ebuyù te pengalang.

3 He Nengazen, hengkey ves is menusiyà? Maan is utew nu sikandin igkeseeng?

Menusiyè dà sikandin, maan is kenè nu egkehimu te ed-awà sikandin diyà te isip nu?

4 Is etew, iring dà sikandin te keramag su meǥaan dà egkaawà is untung din,

ne is menge andew zin ne iring dà te alung he edlavey zà.

5 He Nengazen, puwasi nu is langit ne vulus ka.

Semsama nu is menge vuntud wey med-evel.

6 Gemita nu is menge kilat he iring te panè nu su wey mengekepelaǥuy is menge kuntada ku ne mekedsusuwey zan.

7 Puun diyan te langit, kewaa a kenikew wey luwasa a puun te ǥehem te menge kuntada he lumelengyawà he memezesen su iring dan te meseleg he zalem.

8 Wazà tutuu he egkeǥiyen dan.

Ne minsan edsesapà sikandan, ne tarù is egkeǥiyen dan.

9 Egkantahan ku sikew, Megbevayè ku, duma te keduyug te alpa.

10 Kenikew he ketau he mekezaag is menge hadì ne midluwas nu si David te kemetayen.

11 Luwasa a te ǥehem te menge kuntada he lumelengyawà, he kenà egkaǥi te tutuu ne edtarùtarù minsan ebpengulivet.

12 Berakat he is menge anak dey he maama, te vetan-en dan pa ne meiring sikandan te pinemula he mehinuvù.

Henduen ded daan is menge anak dey he vahi su iyan maan meiringi zan is menge tukud he mekempet diyà te turuǥan.

13 Berakat he mepenù is menge budiga zey te langun he kelasi te neraǥun.

Berakat he med-anak te mahabet is menge kerehidu zey ziyà te vevesukà.

14 Ne mekergahi is menge vaka zey te zekelà he menge pruduktu.

Berakat he kenè key en surunga te menge kuntada zey ne kenè key en mevihag.

Ne verakat he wazè en maan menge sineǥawan te egkeseeng diyà te menge zalan dey.

15 Utew zeysey is menge etew he egkeiring kayi is ked-ubpè dan.

Deyzey is menge etew he nekekilala wey midtuu te tutuu he Megbevayà he Nengazen.