1 Deliǥa is Nengazen!

Ereg he edeliǥen ku is Nengazen.

2 Edalig a kandin seled te tivuuk he untung ku.

Egkanta a te kedalig te Megbevayà mintras uuyag e pa.

3 Kenè niw iyan seriǥi is mekeǥeǥehem he menge etew wey minsan hentei,

su kenè dan ebpekeluwas keniyu.

4 Ebpekelikù sikandan diyà te tanà ke ebpatey zan en.

Ne zutun ebpekeengked sikandan he ebpelanu.

5 Utew zeyzey is etew he iyan edtavang kandin kes Megbevayà he ed-ezapen ni Jacob,

ne iyan edseriǥan din is Nengazen he Megbevayè din,

6 su haazà he edseriǥan, ne iyan sikandin kes Nengazen he nenlimbag te langit, tanà, daǥat, wey te langun he taǥù kayi.

Iyan heini kes Nengazen he engayan he edseriǥan te wazà pidtemanan.

7 Is kedhukum din ne edapig diyà te menge edèdaaǥen.

Wey iyan sikandin ebeǥey te keuyaǥan te langun he egkinahanglan kayi.

Ibpelingkawas din is menge vihag,

8 ebpekaahà is menge lakap he ebewian din,

midlig-enan din is menge meluya,

mibmahal zin is menge metazeng,

9 ebentayan din is menge langyew,

edtevangan din is menge ilu wey menge valu he vahi,

iyan, ebengkaǥen din mulà is paaǥi te menge lalung.

10 Sikiyu is menge meǥinged diyà te Zion, is Nengazen he Megbevayè niw iyan sikandin kes edhadì te wazà pidtemanan.

Deliǥa is Nengazen.