1 मी प्रेम आणि न्यायाचे गीत गाईन;

हे परमेश्वरा, मी स्तुती गाईन;

2 मी सुज्ञतेच्या मार्गाने चालेन.

अहा, तू माझ्याकडे कधी येशील?

मी माझ्या घरात सचोटीने चालेन.

3 मी आपल्या डोळ्यासमोर अनुचित गोष्ट ठेवणार नाही;

अनाचाराचा मी द्वेष करतो;

तो मला बिलगणार नाही.

4 हेकेखोर लोक मला सोडतील;

मी वाईटाशी निष्ठावान राहणार नाही.

5 आपल्या शेजाऱ्याची गुप्तपणे निंदानालस्ती करणाऱ्याचा मी नाश करीन.

जो कोणी गर्विष्ठ चालीरीतीचा आणि उर्मट वागणूकीचा आहे त्याचे मी सहन करणार नाही.

6 देशातले विश्वासू यांनी माझ्याजवळ बसावे म्हणून माझी नजर त्यांच्यावर राहील;

जो सचोटीच्या मार्गाने चालतो तोच माझा सेवक होईल.

7 कपट करणारे लोक माझ्या घरात राहणार नाहीत;

लबाडाचे माझ्या डोळ्यापुढे स्वागत होणार नाही.

8 देशातल्या सर्व वाईटांचा मी रोज सकाळी नाश करत जाईन;

वाईट करणाऱ्या सर्वांना मी परमेश्वराच्या नगरातून काढून टाकेन.