2
Awa Uur Fateul Pentikos Naa Bun Isin
1 Sain Pentikos naa* Naa anĩ are, Pasa naa bunem naa fifti ilele di, wõ yedig. isi di, idi ganan modoũ tekelei bun, guru de dibodon. 2 Idi an dibod mog, kaisã bagai, ait yau totol ado gugu redig gen, saa ilun tamal isi fen, fõ aab ino yalen. 3 Idi ereb yã bale gen isi di, dile mog, fara furu feid, idi mugu mugu tetedin ibodon. 4 Age fe di, idi ganan Awa Uur Fateulem aura fiyẽdi di, gariya dino, od fire fire bunem wogõ den, Awa Uurem fiyẽdi di, age difen.
5 Sain anĩ bun, Juda tamo Negur nigin momoi den idi, teneub ganan bun temeleid disi, Jerusalem dibodon. 6 Sain idi ait anĩ karĩ de fen, tamo kayau musei idi nene de fen, guru difen, ere nigin, idi mugu mugu dogo neid od bun wogõ den anĩ karĩ den. 7 Idi fatuk bagai terẽ de fen, diron, “Tamo od wogõ def eneidi ganan, Galili temeleid sã de? 8 Naig fe di, ada mugu mugu, idi neda od bunem wogõ de di, karĩ tauf? 9 Ada fire firen temelada, Patia, Media, Elam kantri, Mesopotamia, Judia distrik, Kapadosia, Pontus, Asia provins, 10 Frigia, Pamfilia distrik, Isip kantri ado Libia distrik tunĩ Sairini taun non. Amã tunĩ Rom kantri temelamã, Juda temeleid ado haiden Juda neid momoiya bun falei maun, 11 Krit nuyo ado Arabia distrik. Ada mugu mugu neda od bun, Negur kabĩ odug age fen anĩ wogõ de di, karĩ tauf.” 12 Idi terẽ de nene de fen, abob toti difen, “Eĩ ere gariya nigin?”
13 Anĩ ere, tunĩ idi weli difiyeĩd diron, “Idi wain fatuk domõ.”
Pita Tamo Kayau Meleid Bun Wogõ Yen
14 Pita aposel ilewen geid difar fen, ait odugem tamo kayau wogõ fiyẽdin, “Juda tamo kayau ado ã ganan Jerusalem ubodõgef, utorõg len, aya ã enei faded ayeĩf, kee releg fen, aya wogõ auf anĩ karĩg. 15 Ã kisi gef, tamo eneidi wain domõ gef, age fiya sã, gama eĩ nain kilok bonimei! 16 Anĩ ere, eĩ are Profet Joel eig ye wogõ yen:
17 “ ‘Negur irok, idikeleya naa bun,
aya neu Awa Uur, tamo kayau ganan bun gõ afalauf.
Age afe di, ãgenei kesu, kayau momoul ado, profet od wogõ douf,
ãgenei tamo gaũ meleid bun seleulã kurã fouf,
ãgenei tamo tubau dimĩdiyouf.
18 Neu ferfer tamo ado kayau geid buneg,
aya neu Awa Uur naa anĩ bun gõ afalaisi di,
idi profet od wogõ douf.
19 Aya saa ilun, memelik fire fire afelnẽdiyouf,
tenebur ein uris anodiyouf.
Naud, yã ado, kaau tubutubuya wõ youf.
20 Odug nẽ Naa odug fula fiya medeĩya ado, fau to isi mog,
gaa gugum kele fen,
ogõ naud gen wõ youf.
21 Age fe di, aib taka ĩ, Odug yana yale iweignẽf are,
Odug ĩ kel yalouf.’† Joel 2:28-32
22 “Israel tamo kayau, od enei karĩg, ã aug keleĩ, Negur ã atun, Jesus Nasaret tamal bunem memelik, ereb urug bagai ado, uris inodin, anĩ bunem Jesus ĩ Negurem sur fiyen anĩ, Negur ã ifelnein. 23 Tamo enei nigin, Negurem ereb ereb wõya sã mog, yogon keleĩ ado kisi bunem, ĩ ã imeĩ bun inon, age fe di, ã tamo sesenem disenneĩ di, ĩ laa fouf nigin, aa tetek bun tuti nem ũgen. 24 Anĩ ere, Negur ĩ laa bun tamal turĩ fe di, mata kel fã yen, laa nẽ darau bun tamal yalelnen, ere nigin, laa anim ĩ irounẽya kisi feleya sã. 25 Are Dawid ĩ nigin iron:
“ ‘Odug sain faimud malau bun ifar mog, ailedig.
Ĩ aya imau biyalem ibodok nigin,
aya to kumĩ au fen, terẽ auf.
26 Anĩ nigin, neu wau seref fen, sigorou seli abidig,
aya, ereb Negur aya bun biya age fouf anĩ tari afedig,
27 ere nigin, õ neu malaukanon to utornẽ di, bouwau laa neid modoũ bun ibodõf,
õ ogon Fateuleg to utorõ di, bura lauf.
28 Õ mata bun ileya nẽ naab ufelna fen,
õ malã bun kulĩya barikã wiyauf.’‡ Sam 16:8-11
29 “Turau tar, aya ã yaor arokeneik, tubuda Dawid ĩ laa fe di, mũ difen. Yogon matmat, ada atun naa enei bun fau ibodok. 30 Anĩ ere, ĩ profet taka, anĩ nigin, ĩ keleĩ, Negur wau kuturol fen, Dawid yogon ibor nẽ tubu tar bun tamal taka, yogon king nẽ sia bun inenẽf nigin irokenen. 31 Dawid ĩ ereb fau wõya sã mog, anĩ tetunem ile fen, Kristus mata kel fã youf nigin eig ye wogõ yen, ‘Ĩ laa neid modoũ bun to ibodõf, ĩ bouwag to bura lauf,’ yen. 32 Negur Jesus enei turĩ fe di, ĩ mata kel fã yen anĩ, amã ganan mailen. 33 Negur ĩ ima biyalem yalesnẽ di, Jesus ĩ, Tama bun Awa Uur Fateul Negur afeneĩf yen anĩ yale fen, fi felen, are ã gama ulegef ado karĩ gef anĩ. 34 Dawid saa ilun to iselen, anĩ ere, ĩ iron,
“ ‘Negur neu Odug irokenen:
“Imau biya melem ubod mog,
35 ogon kiwai tar
ogon ye inoya nẽ sawa anodiyouf.” ’§ Sam 110:1
36 “Anĩ nigin, Israel tamo kayau ganan enei keleĩ bagai youf, Jesus enei ã aa tetek bun ukesigen anĩ, Negur yogo, Odug ado Kristus inenen.”
37 Tamo kayau od enei karĩ de fen, idi waud gudũ fe di, Pita aposel tunĩ ganan geid dirokenẽdin, “Turamã tar, amã naig mafouf?”
38 Pita solof irokenẽdin, “Ã mugu mugu wauĩ falei wog fen, Jesus yana bunem naan iguneĩ di, ãgenei mosor nigin weder tu kalauf, ago ge di, ege luwa are Awa Uur Fateul walogouf. 39 Promis od are ãgenei, ãgenei kesu tar ado, idi gerõ difaref ani ganan neid, are Odug neda Negur iweignẽdiyouf anĩ ganan neid.”
40 Age ye fen, Pita od musei bun, idi wedereid irou fen, totol irokenẽdin, “Ã aug isenneĩf nigin, tamo kayau sane sain enei bun tamal urab uraileg.” 41 Yogon od dalen idi naan igunẽdin, age dife di, naa anĩ bun, tri tausen tamo kayau age fiya, idi neid bun tobol difen.
Momoiya Tamo Kayau Neid Uyu Kũ Fiya
42 Idi aposel neid ifelnẽdiya, uyu kũ fiya, saaf weim yõya, kosẽya bun, idi neid kisi adok dino fen, age difen. 43 Tamo kayau ganan terẽ de inid ifitin. Age dife di, aposel idi, uris ado memelik musei dinon. 44 Momoiya tamo kayau ganan weim dibod ken, safineid ganan gadõ difedig. 45 Safineid na nigin sur difeid fen, taka ĩ lau fef anĩ difenẽdig. 46 Naa ganan idi toku waud tekelei fen, tempel modoũ bun guru difedig. Idi dogo neid fõ fõ bun, kulĩya ado waud adok an yen ken, weim saaf dõdig. 47 Idi Negur yana dalesedig, tamo kayau ganan, idi nigin biya difiyẽdidig, age dife di, Odug naa ganan bun, tamo kayau kel gei feid fen, idi neid bun tobol fedig.