Mattiu
Na-kel-uri-an tovoi aMattiu totosi
Ase itos nalob̃ulat egai?
Nǝvanuan lotokad namitisau hǝn nasoruan siGot lunau ke, aMattiu tovi esua len ahai susur tosǝŋavur pisan toru siYesu, gai itosi.
AMattiu itos nalob̃ulat egai hǝn nǝsa?
Itosi hǝn b̃ikel uri mai naJu gail ke aYesu tovi aKristo, aGot totabtabuh lan, aGot tokel gati len na-kel-gati-an ta sutuai.
AMattiu itosi m̃os ase?
Itosi m̃os naJu gail, alat a Jutea.
Nǝsa evisi len nalob̃ulat egai?
Len nalob̃ulat egai, aMattiu ikel na-kel-uri-an tovoi husur natohan pipihabǝlan aGot len nǝmav. Ib̃ol husur nǝpasian siYesu, nap̃usanan san, nǝmatan san mai na-le-mǝhat-an san dan nǝmatan.
Nalob̃ulat egai ehusur as galito?
Ehusur aYesu len nǝmauran san, ehusur aJon Baptais, ehusur ahai susur siYesu gail, mai aPita tovi galit sua.
Natgalenan evisi ŋais?
Nalob̃ulat egai ikel ur nǝsa tovisi len nasihau 6 B.C. vǝbar A.D. 30.
Len nalob̃ulat egai aMattiu itos gat nǝbathuyah siYesu hǝn b̃ip̃arp̃ar ke aYesu evi kiŋ len nǝpasusan siTevit tovi kiŋ ta sutuai. Evi kiŋ aGot tokel gati mai alat aIsrael ta sutuai. Ale evi Kristo, aMessiah, aGot totabtabuh lan hǝn b̃ilav kuv nǝvanuan san gail dan nǝsaan salito. AMattiu ikel ur natit isob̃ur aYesu togole. Isor husur nǝsa ahai kelkel ur gail lotokele ta sutuai, ale len aYesu na-pǝhav-utaut-an galen lotokele lusarpoh. Len nalob̃ulat egai aMattiu itos gat nasoran erim hǝn nap̃usanan siYesu, lumaiegai:
Nasoran san 1 (5.1–7.29)
Nasoran san 2 (10.5–11.1)
Nasoran san 3 (13.1-52)
Nasoran san 4 (18.1-35)
Nasoran san 5 (24.1–25.46)
Imaienan, aMattiu itos nalob̃ulat egai hǝn naJu lǝb̃ikad nadǝlomian len aYesu, aGot totabtabuh lan hǝn b̃evi Kristo, hǝn b̃eil a m̃o hǝn galito, b̃evi kiŋ salito.
1) Nǝbathuyah mai nǝpasian siYesu (1.1–2.23)
2) Natgalenan lotoutaut hǝn aYesu hǝn nauman san (3.1–4.11)
3) AYesu etub̃at hǝn nauman san (4.12-25)
4) Na-kel-uri-an aYesu tokele len naṽehuh (5.1–7.29)
5) AYesu igol namerikel isob̃ur (8.1–9.34)
6) AYesu esǝvat ahai susur lotovi 12 van (9.35–11.1)
7) AYesu ep̃usan husur natohan pipihabǝlan aGot len nǝmav (11.2–13.52)
8) AMattiu itos husur nǝvanuan gail lotokad nadǝlomian tokǝkereh (13.53–15.20)
9) Nagilen nauman siYesu len naut a Kalili (15.21–18.35)
10) AYesu iyar tur len naut gail tarhǝwisel Jortan, evi Jerusalem (19.1–20.34)
11) Nauman siYesu len naut a Jerusalem (21.1–25.46)
12) Lutah gat aYesu (26.1-56)
13) Lukot hǝn aYesu, lugol imat len nǝhai balbal (26.57–27.66)
14) AYesu ile mǝhat dan nǝmatan (28.1-20)
1
Nǝbathuyah siYesu
(Luk 3.23-38)
1 Egai evi na-tos-gati-an sua hǝn nǝbathuyah siYesu Kristo, topat len nǝpasusan siTevit, topat len nǝpasusan siApraham:
2 AApraham evi atǝman aIsak.
AIsak evi atǝman aJakop,
tovi atǝman aJutah mai aṽan aJutah gail.
3 AJutah evi atǝman aPeres mai aSerah, analaru tovi aTamar.
APeres evi atǝman aHesron.
AHesron evi atǝman aRam.
4 ARam evi atǝman aAmminatap.
AAmminatap evi atǝman aNahson,
tovi atǝman aSalmon.
5 ASalmon evi atǝman aPoas, anan tovi Rahap.
APoas evi atǝman aOpet, anan tovi aRut.
AOpet evi atǝman aJesse.
6 Ale aJesse evi atǝman aTevit tovi kiŋ.
Ale aTevit evi atǝman aSolomon,
anan tovi asoan aUriah a m̃o.
7 Ale aSolomon evi atǝman aRehopoam.
Ale aRehopoam evi atǝman aApijah.
Ale aApijah evi atǝman aAsa.* Nalob̃ulat galevis ta sutuai luke Asaf lǝsake Asa.
8 Ale aAsa evi atǝman aJehosafat.
Ale aJehosafat evi atǝman aJoram.
Ale aJoram evi atǝman aUsiah.
9 Ale aUsiah evi atǝman aJotam.
Ale aJotam evi atǝman aAhas.
Ale aAhas evi atǝman aHesekiah.
10 Ale aHesekiah evi atǝman aManasseh.
AManasseh evi atǝman aAmon.
Ale aAmon evi atǝman aJosiah.
11 Ale aJosiah evi atǝman aJekoniah
mai aṽan gail len nǝboŋ
lotomap̃ip̃iriah vi Papilon.* 2Ki 24.12-16
12 Husur nǝmap̃ip̃iriahan vi Papilon:
aJekoniah evi atǝman aSealtiel,
ale aSealtiel evi atǝman aSeruppapel.
13 Ale aSeruppapel evi atǝman aApiut,
tovi atǝman aEliakim.
Ale aEliakim evi atǝman aAsor.
14 AAsor evi atǝman aSatok.
Ale aSatok evi atǝman aAkim.
Ale aAkim evi atǝman aEliut.
15 Ale aEliut evi atǝman aEleasar.
Ale aEleasar evi atǝman aMattan.
Ale aMattan evi atǝman aJakop.
16 Ale aJakop evi atǝman aJosef tovi asoan aMeri,
topas aYesu, lotokisi hǝn aKristo, aGot totabtabuh lan.
17 Imagenan, tub̃at len aApraham vǝbar aTevit ikad naur lotovi 14 p̃isi, ale tub̃at len aTevit vǝbar nǝmap̃ip̃iriahan vi Papilon ikad naur lotovi 14 am, ale tub̃at len nǝmap̃ip̃iriahan vi Papilon vǝbar aKristo, aGot totabtabuh lan, ikad naur lotovi 14 tǝtas.
AMeri ipas aYesu
(Luk 2.1-7)
18 Nǝpasian siYesu Kristo evisi magegai. Anan aYesu, aMeri ikel gati ke tilah mai aJosef, be a tahw hǝn arb̃ib̃on, isab̃i ke etian, aNunun aGot togole. 19 Husur ke ahaṽut san, aJosef tovi nǝvanuan tonor, nǝboŋ tosǝsǝloŋ hǝn aMeri totian, emǝtahun b̃igol nahurun aMeri b̃isa, ŋa isab̃ sǝhoti len nǝnauan san ke teriŋ aMeri, be emǝtahun avan ideh b̃elǝboii. 20 Nǝboŋ tonau natgalenan sal, aŋel sua siNasub̃ evisi hǝni len nab̃ǝb̃er. Ike, “Josef anatun ulum̃an siTevit, sagemǝtahw hǝn gǝb̃esǝhar aMeri hǝn b̃evi asoam̃, bathut natǝtai totian hǝni, aNunun aGot gatolavi maii. 21 Alitenan dereh tipas anatun ulum̃an balai, ale geriŋ nahǝsan aYesu lan, husur gai tilav kuv nǝvanuan san gail dan nǝsaan salit balai.”
22 Natgalen p̃isi evisi hǝn b̃igol nǝsa aGot tokele len nabuŋon ahai kelkel ur b̃isarpoh. Ike:
23 “Mǝteris! Navensus dereh tetian,
ale tipas anatun ulum̃an,
ale lekis nahǝsan aImmanuel,”
namilen tovi
“AGot itah mai gadito.”* Isa 7.14, 8.8, 10
24 Nǝboŋ aJosef tolele, igol nǝsa aŋel siNasub̃ tokel maii. Esǝhar aMeri tovi asoan 25 be sagol naitian maii van vǝbar nǝboŋ topas anatun ulum̃an sua. AJosef eriŋ nǝhes Yesu lan.