4
Nalotuan len nǝmav
1 Nǝboŋ tokǝmaienan tonoŋ, nokǝta, noris nabopita tosǝŋav len nǝmav, ale nadoldol notosǝsǝloŋ hǝni a m̃o, nǝwalan han tohum nǝtrampet, ikel mai ginau ke, “Gegǝm a mǝhat gegai, ale dereh neṽusan gaiug hǝn natit gail lǝb̃imasvisi a tahw len natgalenan.”
2 Vǝha-sua ŋai aNunun aGot iwol hǝn ginau, ale noris nab̃iltihai bǝtbǝtah sua topat len nǝmav, noris avan sua tobǝtah lan! 3 Atenan tobǝtah ei, nǝnahǝnah han ebilbil hum nǝvat jaspa mai nǝvat karnelian. Ale ikad nanivaniv tom̃ial kǝsan, garu len nǝhai bǝtbǝtah hum nǝvat emeralt.* Hǝn naves 2-3, ris Eze 1.26-28, 10.1. Jaspa: evi nǝvat sua gǝsalǝboi gǝb̃ekǝta tur lan, nǝtau han tomial o tokǝsan o toyaŋyaŋ; karnelian: evi nǝvat tobisibis; emeralt: evi nǝvat tokǝsan be tomasil. KelV 21.19-20. 4 Nǝhai bǝtbǝtah tovi 24 ludar visi, ale nǝvanuan totibau lotovi 24 lobǝtah len gail. Nǝvanuan galenan lovi haṽut lotoil a m̃o lotosun nahurabat topǝhw, mai len nǝkadulito lukad nǝkraun nagol hum sekiŋ. 5 Ale nǝkabil ikabil mai nab̃iliurur ekurut len nab̃iltihai bǝtbǝtah rivuh. Ikad nam̃ial tomǝlevru lotopaŋ wunwun a m̃o len nab̃iltihai bǝtbǝtah enan. Nam̃ial galenan lovi aNunun aGot tomǝlevru.* Exo 19.16; Eze 1.13; Zec 4.2 6 A m̃o len nab̃iltihai bǝtbǝtah ehum tokad nab̃iltimetduŋduŋ hǝn nakǝlas tobilbil masil hum nǝvat kristal.† Nǝvat kristal evi nǝvat tomasil hum nakǝlas sǝkad nǝtau ideh.
Dar vis nab̃iltihai bǝtbǝtah len nǝtarhǝt tovat han, ikad natit tovat lotomaur, lotobaŋ mǝtalito a m̃o mai a tahw.
7 Natit nametǝkav tomaur esum̃an nalion, na-vǝha-ru-an hǝn natit lotomaur esum̃an natuhb̃uluk, na-vǝha-tor-an hǝn natit lotomaur nǝhon esum̃an nǝhon nǝvanuan, ale na-vǝha-vat-an hǝn natit lotomaur esum̃an naikel tomǝlah.‡ Hǝn naves 6-7, ris Eze 1.5-10, 22, 10.14. Naikel evi nǝman namǝsav totibau tohum nǝbal be totibau sǝhori. 8 Natgalen ṽisusua lukad nǝhabǝlalito tomǝlevtes lotobaŋ mǝtalito a mǝhat mai pipite. Lǝsǝŋavŋav, be len nalennǝyal mai nalenmariug luke,
“Gai tovi Got kitin, gai tovi Got kitin, gai tovi Got kitin,
Nasub̃ aGot aB̃iltidaŋan,
ategaii tovi gai ta sutuai tia, tovi gai gagai,
mai tovi gai b̃egǝm sal.”* Eze 1.18, 10.12; Isa 6.2-3
9 Nǝboŋ natit tovat lotomaur lotosal suh nǝyalyalan sitenan tobǝtah len nab̃iltihai bǝtbǝtah, nǝboŋ lotoputsan nahǝsan, nǝboŋ lotosipa vi tǝban gai tomaur vi sutuai vi sutuai, 10 nǝvanuan totibau lotovi 24 luteh bathurien ategaii tobǝtah len nab̃iltihai bǝtbǝtah, ale lulotu hǝn ategaii tomaur vi sutuai vi sutuai. Loriŋ nǝkraun nagol salito a m̃o len nab̃iltihai bǝtbǝtah, luke,
11 “O Nasub̃, aGot sinamito! Inor hǝn gǝb̃ikad nǝ-sal-suhi-an hǝn nǝyalyalan sam̃.
Inor hǝn gǝb̃ikad na-putsan-nahǝsam̃-an mai nab̃iltidaŋan.
Husur gaiug goum hǝn natit p̃isi,
ale bathut nalǝŋonian sam̃, goum hǝn gail, gugol losuh, lukad nǝmauran.”
*4:3: Hǝn naves 2-3, ris Eze 1.26-28, 10.1. Jaspa: evi nǝvat sua gǝsalǝboi gǝb̃ekǝta tur lan, nǝtau han tomial o tokǝsan o toyaŋyaŋ; karnelian: evi nǝvat tobisibis; emeralt: evi nǝvat tokǝsan be tomasil. KelV 21.19-20.
*4:5: Exo 19.16; Eze 1.13; Zec 4.2
†4:6: Nǝvat kristal evi nǝvat tomasil hum nakǝlas sǝkad nǝtau ideh.
‡4:7: Hǝn naves 6-7, ris Eze 1.5-10, 22, 10.14. Naikel evi nǝman namǝsav totibau tohum nǝbal be totibau sǝhori.
*4:8: Eze 1.18, 10.12; Isa 6.2-3