1 Gamomamdi dahaxi ba am gabaguang. Ne daxanga tela te. Binabu bungina gamomamdi dahaxi buk, amtum gahau hatumingua ba amtam ganimam tam gawauyu long sabangga Atens. 2 Baing tam gasoxi Timoti mala ranguang. Ina riamam hatuminga haringinama saing waxata rangua Urana ba baxanga ulek xaiyua mana Kristo. Am gasoxi bu haringiang xaung bu hauliang ba ali haringina maluxuʼm hatumingaim haringina, 3 bu sanga mana hatumingaim haringindi xungdi mari te maluxuʼm tubaikkadi li daxapkang. Ang gaxabia xai sibuna mauxangandi bila ba daxap kira bing disu mana Urana murunganoa. 4 Maxung sibuna, bungina am gawa ranguang waleu, am gabala balang ba bagula taxap salaga. Baing sok bila ba. Ang gaxabia xai sibuna baing. 5 Mana namua naga, bungina gamogua haxi buk, bing ngasoxi Timoti bu suli mana hatumingaim haringina. Nam Lipu Tubaikkama tubang, saing oxatadi am gatuxu mang dahanggalang olang.

6 Ne hata sibuna li Timoti goxoya ranguang ma, saing baxanga namtam haruanga xaiya ba ahatum haringinauyu saing muruim sibuna mana lipudiyu. Balamtam ba bungingbunginalo ahatum muli mam saing gamoimdi diyaha sibuna mam, saing muruim sibuna ba abaguam muli, bila am xaunau murumam sibuna ba am gabaguang muli. 7 O riamam hatuminga haringinam mana, am gawa ne mauxangang xumana daxapkam, saing lipudi disina salaga nam. Ning hatata am galungu ba ahatum haringina, binabu haruanga ba haringiam sibuna. 8 Alaba libu hatumingamamdi dimaxana, namua na am gaxabia ba ali haringina ataga rangua Toxoratamona. 9 Am gaharua xai sibuna mala rangua Urana mang baru? Haruangamam xai sibunam diraxap. Namua na am gayaha buk mang Urana maxania. 10 Xaidap yambong am gasabu haringina ba am gabaguang muli xaung ba am gasahi hatumingaim haringing hataindi diraxapkuyu.

11 Amtum gaxusunga Tibura Urana xaung Toxoratamona kiria Yesu ba tang dahamaringia daxangua bu am gama ranguang. 12 Am gaxusunga ba Toxoratamona libu kuboluima ang muruim sibuna mana riaim hatuminga haringinamdi tubu, xaung muruim sibuna mana lipu longgalo xauna, laing kubolua ba baxagi saing matuxuyana mang, bila amtum murumam sibuna mang. 13 Baing am gaxusunga Toxoratamona ba haringia hatumingaimdi bu anaxu mana Urana daxanganoa ing ganina, laing Toxoratamona kiria Yesu goxoya ma xaung uleginam maringindi. Bila balau bungina ali Tibura Urana maxania, bagula baguang bila lipuxindi saing bagula kuboluim diandi duwa te.