Aposel Pol bung xailongdi mala rangua Kristo Lipuxindi duwa long sabangga Tesalonaika. Tauxu xailong luwa li ba,
2 Tesalonaika
Namua Pol Bung Mala Na Tesalonaikadi
Pol wa Korin saing bung xailongga li bila sobak 6 kimuya mana bung muga mala rangua Tesalonaikadi. Tesalonaikadi diyunga hatumingading haringindi te, ne Pol bung bu haringiadi bila libu muga. Baing bung tubatubaik teladi muli mana baraxinta bagula sok bungina Kristo goxoya ma. Bung xailongga li bila niani AD 51.
Haruanga Tuandi
• Haruanga mugamugangam (1:1-2)
• Sabunga haruanganoa ila rangua Tesalonaikadi (1:3-12)
• Tubatubaikdi (Hataina 2)
• Walinga daxanganoa mana lipu hatuminga haringinamdi (3:1-15)
• Haruanga kimuam (3:16-18)
1
Haruanga Mugamugangam
1 Nga Pol, ngagabu Sailas Timoti tang.* Sailas Timoti tang—Lipu luwa ba dahaxa mauli rangua Pol, saing tang dahauli ba ungguti Tesalonaika sabunganoa.
Amtum gabung xailongga li mala ranguang lipu sabungamdi awa long sabangga Tesalonaika, ang gataga rangua Tibura Urana xaung Toxoratamona Yesu Kristo.
2 Am gasabu ba Tibura Urana xaung Toxoratamona Yesu Kristo tang atiding dimoti mang xaung tang dilibu gamoimdi duwa mosiu.
Haruanga Xai Sibuna Xaung Sabunga
3 Riamam hatuminga haringinam mana, bungingbunginalo amtum gaharua xai sibuna na Urana mang. Maring mana am galibu bila ba, namua na hatumingaim haringina tubutubu mala, saing kuboluim muruim sibuna mang sok sabanga xaidap taining tainina. 4 Binabu am ba am gayaha sibuna ba am gaiti yaimdi Urana lipuxing sabungamdi duwa long taining tainina maxadingia. Am gabaxanga nadi mana ali haringina baru xaung ahatum haringina baru liwe mana salaga xaung tubaikkadi axapdi.
5 Lilingaima xaung hatumingaim haringina maluxuʼm mauxanganadi ba dahatanga Urana suxuyanganoa bing maring. Baing ina naga, Urana bagula harua ba ang sanga mana Yonggaxinoa, axa abaxanga mana ba binabu axap salaga baing. 6 Urana kubolundi dimaring, binabu bagula haxuya salaga na adi disina salaga nang, 7 saing bagula sina yaguangua nang mana salaga axap ba, xaung amtum xauna. Axadi li bagula disok bungina Urana hatanga Toxoratamona Yesu masok long xaiya ma. Bagula ma xaung yap luliang sabanga xaung uleginam haringindi. 8 Bagula sina salaga na lipudi hauxading mana Urana, ding disu mana Toxoratamona kiria Yesu uleging xaiyua te. 9 Bagula daxap salak subingang teguam bungingbunginalo, xaung bagula duwa halianga mana Toxoratamona xaung haringingang sabanga ralanam. 10 Bagula libu bila ba bungina goxoya long xaiya ma mana xaidabinoa bu lipudi diti yanoa mana axadi libudi mana lipuxindi, xaung bu adi dahatum haringina mana ba dihixi mana axadi libudi. Baing bagula awa ranguadi, namua na ahatum haringina mana haruanga am gabaxanga nang ba.
11 Amtum gatuxu hatuminga baguba, binabu am gasabusabu mang. Am gaxusunga ba ang sanga ba ahatanga na Urana kiria ba ang sanga mana walingua wagiang mana ba. Xauna am gaxusunga ba haringinganoa bagula hauliang ba alibu kubolu xai longgalo muruim mana alibudi ba, xaung axadi hatumingaim haringindi diyuang ba alibudi. 12 Am gasabu bila ba bu Toxoratamona kiria Yesu bagula xap yaya sabanga mana axadi libudi mang, xaung bu sina yaya sabanga nang xauna. Axadi bagudi li bagula disok namua na Urana kiria gabu Toxoratamona Yesu Kristo tang atiding dimoti mang.
*1:1 Sailas Timoti tang—Lipu luwa ba dahaxa mauli rangua Pol, saing tang dahauli ba ungguti Tesalonaika sabunganoa.