4
Nebukadnesa Mip Mana Xai Tela
1 Xaitamoxi Nebukadnesa sina haruangua mala rangua numanuma longgalo, bakbak longgalo xaung mugixing longgalo duwa mana titi longgalo. Bung ba:
Gamoimdi duwa mosiu sibuna!
2 Ngabo ba axabia mana axamang haringing xangxana Urana Eta Loam Sibuna libu manga.
3 Tahixi mana axamang haringindi libudi,
axamandi libudi haringing sibuna!
Yonggaxinoa bagula wa bungingbunginalo,
wa xaitamoxi hatata ila bungingbunginalo.
4 Nga Nebukadnesar, ngarung mosiu numagu xaitamoxiamia, ngawa xai xaung xaligigu xumana. 5 Ne yambong tela ngamip baing ngamaxuwa haringing sibuna. Ngakinu uxaingia saing axadi ngabagu mibingia ngamaxuwa manadi baing. 6 Binabu ngatabina ba daxap Babilon lipu xabianga maringinam longgalo dima maxagia bu dibaxanga mibingagu namuxinoa nanga. 7 Lipu sintukkamdi, lipu tuakkamdi, lipu hatung suxinganamdi* kimbo Kaldiadi. xaung lipu tingungamdi dima rangua nga, baing nganaxuya mibingagua nadi. Ning sanga ba dibaxanga namuxinoa nanga te. 8 Disup baing ina naga Danyel ma maxagia, saing nganaxuya mibingagua na. (Ngasina yaya Beltasasa na bila urana ngayua awana. Ngaxabia ba xap hatuminga xai rangua uranadi duwa eta lo.)
9 Ngaharua ba, “Beltesasa, ung lipu mugamugangam mana lipuxigu xabiangamdi. Ngaxabia ba oxop hatuminga xai rangua uranadi duwa eta lo, xaung axamang hisangam longgalo dahaxi maung te. Binabu ubaxanga nanga mibingagu namuxinoa. 10 Ngakinu uxaingia baing ngamip bila li. Ngabagu baing la ba xai maxaxaya sibung tela wa lia titi hataing longgalo. 11 Xaiya sok sabanga xaung haringina, haing eta lo laing uxunoa tuxu sabalunia, bu lipu titiam longgalo sanga ba dibagu. 12 Londi gumangiding, marandi dibaxagi sanga'm lipu longgalo daxang. Asaxa abungindi diyagua yonggaxinia, xaung mangdi ditongtongia numadi etua mana rimandi. Axamang longgalo daxap angingua rangua xaiya ba.
13 “Ngakinu uxaingia ngamipkuyu, baing ngabagu baing la ba Urana uleginam tela, lipua ba lipu wasangam tela, ri ma sangua long xaiya. 14 Wagi sabanga ba, ‘Atui xaiya ba mari saing abagati! Ahasia londi saing ating marandi olang olang mauli! Axu asaxadi diyagua yonggaxinia mala xaung mangdi dirung mana rimandi mala. 15 Ne ayunga namua xaung oxaxandi duwa titia, tatubangdi duwa taxiya. Agoxi xaung raxu ain bras taxiya namuya.
“ ‘Bagula langina mana hinaxaga, xaung wa rangua asaxadi raxangia. 16 Bagula hatumingang lipuxama xugia, xap hatuminga asaxama laing bunging† kimbo niani. Maxixinga 23, 25, 32 xauna. 7 disup mana to.
17 “ ‘Haruanga li Urana uleginamdi dahabingia. Adi Urana iniadi dibaxanga suxuyangua, bu lipu longgalo daxabia ba Urana Eta Loam Sibuna wa etua mana yongga longgalo duwa titia. Sinadi na lipu gaxarea mogudi, heku yadingdi sabanga kimbo xoliana.’
18 “Nga xaitamoxi Nebukadnesa, ngamip bila ba. Tauna Beltasasa, ubaxanga namuxinoa nanga, namua na ngaxola mana lipuixigu xabianga maringinam tela yonggaxigia ba libu. Ne ung sanga ba, namua na oxop hatuminga xai rangua uranadi duwa eta lo.”
Danyel Baxanga Mibingua Namuxinoa
19 Baing Danyel (duxu ba Beltasasa) hatumingang mauxang sibuna bunging monga. Maxuwa mana mibinga namuxinoa. Baing xaitamoxi(a) harua ba, “Beltesasa, labu umaxuwa mana mibingua xaung namuxinoau tai.”
Beltesasa haxuya ba, “Lipu sabanga, xai sibuna nabu axamandi disok mana mibingama bagula daxap bixuaimdi, bing sangau! Baing tegu. 20 Ubagu xai sabanga tela. Sok sabanga xaung haringina. Haing eta lo laing uxunoa tuxu sabalunia, bu lipu titiam longgalo sanga ba dibagu. 21 Londi gumangiding, marandi dibaxagi sanga'm lipu longgalo daxang. Asaxa abungindi diyagua yonggaxinia, xaung mangdi ditongtongia numadi etua mana rimandi. 22 O Xaitamoxi, xaiya ba bing ung baing! Yama sok sabanga. Usok haringina. Bila yam sabanga haing eta lo laing tuxu sabalunia, saing yonggaxima ila mana titi subinganoa.
23 “O Xaitamoxi, ubagu lipu wasangam tela ri ma sangua long xaiya. Urana uleginama ba harua ba, ‘Atui xaiya ba mari saing ahanggalangia. Ne ayunga namua xaung oxaxandi duwa titia, tatubangdi duwa taxiya. Agoxi xaung raxu ain bras taxiya namuya. Bagula langina mana hinaxaga, xaung wa rangua asaxadi raxangia, laing bungina tuwa tuwa hiliadinga disup mana to.’
24 “O Xaitamoxi, mibinga namuxinoa bila li. Urana Eta Loam Sibuna baxanga ba axadi li bagula disok maung, O Xaitamoxi. 25 Bagula disukaung mala sangua lipudi saing bagula uwa rangua asaxa abungindi. Bagula oxong tatubang(a) bila bulmakaudi, saing bagula langim mana hinaxaga. Bunging tuwa tuwa hiliadinga bagula disup maung to, baing bagula ubagu uxabia Urana Eta Loam Sibuna wa etua mana yongga longgalo duwa titia, saing sinadi na lipu gaxarea mogudi. 26 Ning xai namua xaung oxaxandi duwauyu titia. Alali namuxinoa bing bagula oxop yonggaxima muli bungina ubagu uxabia ba Urana long xaiyama wa etua mana axamandi. 27 O Xaitamoxi, ngaxusungaung ba ulungu haruangagua, ulibu bila li: Usauya kubolum diandi saing ulibu kubolu maringindi. Uyamu kubolumadi didoa saing usinga lipu haxugindi. Nabu ulibu bila ba, bola uwa xaiyu.”
Mibinga Aningonoa
28 Baing ina naga, axadi li disok mana Xaitamoxi Nebukadnesa. 29 Sobak 12 disup, baing xaitamoxi(a) haxa etua mana numang urong ubung gomana Babilon. 30 Baing harua ba, “Babilon long sabanga xai sibuna baru! Mana haringingagu ngatongtongia ba wa longga ngarung mana bu hatanga haringingagu sabanga xaung yagu sabanga.”
31 Haruanganoa sup teguyu, baing waxutu tela sok sangua long xaiya, harua ba, “Xaitamoxi Nebukadnesa, ulungu suxuyanga to. Yonggaxima sup maung. 32 Bagula disukaung mala sangua lipudi saing bagula uwa rangua asaxa abungindi. Bagula oxong tatubang(a) bila bulmakaudi. Bunging 7 bagula disup maung to, baing bagula ubagu uxabia Urana Eta Loam Sibuna wa etua mana yongga longgalo duwa titia, saing sinadi na lipu gaxarea mogudi.”
33 Hata sibuna li haruangadi ba disok. Disuka Nebukadnesa mala sangua lipudi saing xang tatubang(a) bila bulmakaudi. Sangganoa langina mana hinaxaga laing toxolondi dimaxaxaya bila buntuk buxandi saing rimang guandi dimaxaxaya bila mang guandi.
34 Bungina baguba sup, baing nga Nebukadnesa ngabagu mahaing mana long xaiya, saing hatumingagua galanga muli. Baing ngaiti Urana Eta Loam Sibuna yanoa. Ngasina yaya sabanga na lipua wa bungingbunginalo.
Wa etua mana axamandi bungingbunginalo,
saing yonggaxinoa subingan te.
35 Lipu titiam longgalo axamang olang,
tawa bila ina te.
Libu ing murunganoa
mana bakbak sabalunama
xaung mana lipudi duwa titia.
Lipu tela sanga ba bili te
kimbo su haruangua na bila li te: “Baruta ulibu bila ba?”
36 Bungina ngaxap hatuminga xai muli, baing ngaxap yagua sabanga xaung haringingagua muli ba ngawa etua mana yonggaxigu xai sibuna li. Lipuxigu hatuminga sinaikkamdi xaung yongga yanamindi dima disai haulingua rangua nga muli. Baing ngahabatia ngawa xaitamoxi muli. Baing yagua haringinganoa dali mugamuganganoa. 37 Hatata nga Nebukadnesa, ngayaha mana Xaitamoxi long xaiyama saing ngaiti yanoa saing ngasina yaya sabanga na. Kubolung longgalo dimaring xaung daxai, saing sanga ba tatua lipuadi diti ding.