11
Numa Maxaxayam Sibuna Babel
1 Muga lipu titiam longgalo xuading taininau, haruanga tela te. 2 Lipudi dila dila duwa karagia, baing disok mana goma sabanga tela wa titia Sinar, saing dirung la ba.
3 Baing daharua na ding ba, “Ama, tatongtongia birikdi, tataudi yabia bu daharing.” Binabu ditongtongia axamandi birigia. Ditongtongia saingia te. Baing ditaga birikdi mana kolta. Ditaga mana simen te. 4 Saking daharua ba, “Ama, tatongtongia long sabanga tela nakira xaung numa maxaxayam tela haing mala laing sok taxa sabalunia. Bila balau bagula ramramora sabanga, nam tasup mala mana titi longgalo hataing hataina.”
5 Baing Toxoratamona ri ma ba bagu long sabangga xaung numa maxaxaya lipu titiamgadi ditongtongia. 6 Baing Toxoratamona harua ba, “Lipadi li bakbak taininau xuading taininau. Nabu dungguti ba dilibu bila li, bing bagula dilibu axamang longgalo dahau hatumingadinga ba dilibudi. 7 Ama, tari mala bu talibudi dahasuxi mana xuadinga bu daxabia riadingdi xuadingdi te.”
8 Binabu Toxoratamona utudi saing disup mala mana titi longgalo hataing hataina, saing disauya oxatua mana long sabangga ba. 9 Namua naga duxu long sabangga ba Babel* Mana Hibru xuana, yaya Babel bibinganoa bila haruanga marang tela, namuxinoa ba libu hasuxi.. Namua na Toxoratamona libu lipu titiam longgalo dahasuxi mana xuadinga. Baing utudi saing disup mala mana titi longgalo hataing hataina.
Siem Bakbagindi Laing Ebram
10 Siem bakbagindi bila li.
Niani luwa kimuya mana silinga sabangua, Siem nianindi 100, baing xapsaxi Arpaksat. 11 Kimuya mana xapsaxi Arpaksat, Siem wa niani 500 muli saing garang teladi muli, haing xaung lup.
12 Arpaksat nianindi 35, baing xapsaxi Sela. 13 Kimuya mana xapsaxi Sela, Arpaksat wa niani 403 muli saing garang teladi muli, haing xaung lup.
14 Sela nianindi 30, baing xapsaxi Eber. 15 Kimuya mana xapsaxi Eber, Sela wa niani 403 muli saing garang teladi muli, haing xaung lup.
16 Eber nianindi 34, baing xapsaxi Pelek. 17 Kimuya mana xapsaxi Pelek, Eber wa niani 430 muli saing garang teladi muli, haing xaung lup.
18 Pelek nianindi 30, baing xapsaxi Reu. 19 Kimuya mana xapsaxi Reu, Pelek wa niani 209 muli saing garang teladi muli, haing xaung lup.
20 Reu nianindi 32, baing xapsaxi Seruk. 21 Kimuya mana xapsaxi Seruk, Reu wa niani 207 muli saing garang teladi muli, haing xaung lup.
22 Seruk nianindi 30, baing xapsaxi Nahor. 23 Kimuya mana xapsaxi Nahor, Seruk wa niani 200 muli saing garang teladi muli, haing xaung lup.
24 Nahor nianindi 29, baing xapsaxi Tera. 25 Kimuya mana xapsaxi Tera, Nahor wa niani 119 muli saing garang teladi muli, haing xaung lup.
26 Tera nianindi 70, baing xapsaxi Ebram, Nahor xaung Haran.
Ebram Bakbagindi
27 Tera bakbagindi bila li.
Tera xapsaxi Ebram, Nahor xaung Haran. Baing Haran xapsaxi Lot. 28 Bungina Tera wauyu, Haran mati yabania Ur, mana Kaldia titidinga. 29 Ebram Nahor tang diyau. Ebram haininoa yanoa Sarai, saing Nahor haininoa yanoa Milka, Haran nanuhanginoa. Haran Milka Iska tang tibuna. 30 Ne Sarai wa xuhi, garan te.
31 Tera xap garanoa Ebram, longanoa Sarai (Ebram haininoa), xaung garang ranggina Lot (Haran garanoa), saing gabudi diyunga long sabangga Ur wa Kaldia titidingia, saing dibo ba dila titia Kenan. Ne dila daxanga lia disok mana longga Haran, saing dirung la ba. 32 Tera nianindi 205, baing mati mana longga Haran.