30
1 Retsel bagu ba hayau gara tela na Yekop te, baing bagulinga mana hamunganoa. Binabu harua na Yekop ba, “Usina garadi nanga! Tegu bing ngamati.”
2 Yekop atin disala mana Retsel, saing harua ba, “Ngawa Urana te! Ina naga soxauti gamoma ba!”
3 Baing harua ba, “Bagu Bilha hainigu oxata olanggamga li. Ukinu rangua, bu hayau gara tela bu ngaxapkuti. Bila balau bagula nga xauna ngaxap bakbaga masok.”
4 Binabu Retsel sina haining oxata olanggama Bilha na bila haininoa. Baing Yekop kinu rangua, 5 saing gamona saing hayau gara lup tela na. 6 Baing Retsel harua ba, “Urana suxuya kubolugua saing harua ba maringina. Lungu xusungagua saing sina gara lup tela nanga.” Binabu uxu yanoa ba Dan.* Mana Hibru xuana, Dan waxungtuanoa bila haruanga marang tela namuxinoa suxuya kubolua saing harua ba maringina.
7 Retsel haining oxata olanggama Bilha gamona muli saing hayau gara lup tela muli mana Yekop. 8 Baing Retsel harua ba, “Malimaligua rangua hamungagua haringing sibuna, saing ngadali baing.” Binabu uxu yanoa ba Naptali.† Mana Hibru xuana, Naptali waxungtuanoa bila haruanga marang tela namuxinoa malimali.
9 Lea bagu ba sup mana hayauxingua, baing xap haining oxata olanggama Silpa saing sina na Yekop bila haininoa. 10 Baing Lea haining oxata olanggama Silpa hayau gara lup tela na Yekop. 11 Baing Lea harua ba, “Kubolu dalingam xap nga baing!” Binabu uxu yanoa ba Gad.‡ Gad namuxinoa kubolu dalingam xap.
12 Baing Lea haining oxata olanggama Silpa hayau gara lup tela muli na Yekop. 13 Baing Lea harua ba, “Gamogua yaha sibuna! Haingdi bagula duxu nga ba haing yahangam.” Binabu uxu yanoa ba Aser.§ Aser namuxinoa yaha.
14 Tauna, bunging wit xauyanganam sok, baing Ruben ila umangia saing bagu mandirek marang teladi,* Mandirek Inglis xuana, ne mana Hibru xuana duxu ba dudaim. Mana bungina baguba dahatum ba nabu daxang, bagula haulidi ba gamoding. saing xapdi ma rangua bauna Lea. Baing Retsel harua na Lea ba, “Garama madirek marandi ba, sanga ba usina teladi nanga?”
15 Ne Lea harua na ba, “Oxop ayuagu masup! Sanga maung te? Bagula oxop garagua mandirek marandi xauna?”
Retsel harua ba, “Sangau. Sanga ba Yekop kinu ranguaung hatata yambong, nabu uhakhaxuya garam mandirek marandi nanga.”
16 Bungbung Yekop goxoya umangia ma, baing ina naga Lea sok mala gugunia daxangia saing harua ba, “Bing uma ukinu rangua nga hatata yambong. Namua na ngagimgung mana garagua mandirek marandi.” Binabu Yekop kinu rangua (mana) yambongga baguba.
17 Urana lungu Lea sabunganoa, saing gamona muli saing hayau gara lup luwadi luwadi hiliadinga na Yekop. 18 Baing Lea harua ba, “Urana sina giminaga nanga namua na ngasina hainigu oxata olanggama na ayuagu.” Binabu uxu yanoa ba Isakar.† Mana Hibru xuana, Isakar waxungtuanoa bila haruanga marang tela namuxinoa giminak.
19 Baing Lea gamona muli, saing hayau gara lup 6 na Yekop. 20 Baing Lea harua ba, “Urana sina yahanga xai nanga. Hatata ila bagula ayuagu iti yagua, namua na ngahayau gara lup 6 na.” Binabu uxu yanoa ba Sebulun.‡ Mana Hibru xuana, Sebulun waxungtuanoa bila haruanga marang tela namuxinoa iti yaya.
21 Kimuya monga Lea hayau haing nanung tela saing uxu yanoa ba Daina.
22 Baing Urana hatumia Retsel muli saing lungu sabunganoa, saing hauli ba gamona. 23 Gamona saing hayau gara lup tela, saing harua ba, “Urana unia memeyagua ba.” 24 Uxu yanoa ba Yosep,§ Yosep namuxinoa sina tela muli. saing harua ba, “Ngasabu ba Toxoratamona sina gara lup tela muli nanga.”
Yekop Morundi Bakbagidingdi Ditubu
25 Retsel hayau Yosep masup, baing Yekop harua na Laban ba, “Unai mana ngagoxoya muli mala mana nga sibugu yabagua xaung titigua. 26 Unai mana hainigudi xaung garagudi ngatuxu oxatama manadi ba digabu nga bu ngala, namua na uxabia ba ngatuxu oxatama xai.”
27 Ne Laban harua na ba, “Nabu uhatum xai manga, bing usauya nga te. Ngatuxu tuak saing ngaxap xabianga ba Toxoratamona sina guxama nanga namua na uwa rangua nga.” 28 Baing Laban harua muli ba, “Umogu gimingagima, saing bagula ngagim.”
29 Yekop harua na ba, “Ung sibum uxabia ngatuxu oxatama haringina baru, xaung morumdi bakbagidingdi ditubu baru bungina ngawasa manadi. 30 Muga morumdi xumana buk te, ne hatata titingandi ditubu sibuna, saing Toxoratamona sina guxama naung long baruamta ngawa mana. Ning hatata raxata manga? Bungintabi sanga ba ngahauli nga sibugu bakbagigua?”
31 Laban xusunga ba, “Ubo ba ngasina baraxinta naung?”
Haxuya ba, “Heku mana usina axamang tela nanga. Ne, nabu ulibu bila li manga, bagula (ngahaxang xaung) ngawasa mana murumdiyu. Hatumingagua bila li. 32 Unai mana hatata ngala ngasuxuya murum longgalo, saing bagula ngaunia sipsip baruamtadi mugiximugixindi, sipsip tutubing baruamtadi dimutuxu xaung meme baruamtadi mugixigixindi. Bagula duwa giminagigua. 33 Bila balau, kimuya bunging bungina usuli mana morudi usinadi nanga mana giminagigua, bagula uxabia ba maxuna ngasu mana haruangagua. Meme baruamtadi mugixigixindi te duwa liwe mana ngayuadi, kimbo sipsip tutubing baruamtadi dimutuxu te, bagula uxabia ba ngahanaidi.”
34 Laban harua ba, “Sangau. Talibu bila uharua ba.” 35 Ne xaidapka baguba Laban unia meme moning longgalo mugixigixindi, xaung meme hagaxang longgalo mugixigixindi, adi longgalo hataindi dusa, xaung sipsip tutubing longgalo dimutuxu, saing tadi garang lupdi rimadingia bu duwasa manadi. 36 Baing ta ganangana bila xaidap luwa hiliana haxanganoa liwe maina xaung Yekop. Ne Yekop wasa mana Laban morundi bakbagidingdi duwauyu.
37 Baing Yekop taxiti xaiyadi talia, poplar xaung plen* Poplar xaung plen xaiyadi duwa yabaria te. Mana Hibru xuana yadingdi libne xaung armon. Ludingdi dusa. rimadingia, saing suki sanggading teladi bu hatanga rimading luding usamandi masok maxixinga maxixinga. 38 Baing rang xaidi rimading kisingamdi mahaing mana mina nungingamdi, bu duwa morudi bakbagiding maxadingia bungina dima dinung. Bungina bakbagidingdi sobagiding hagatangama sok saing dima ba dinung, 39 dahagata xaidi rimadingdi maxadingia. Baing ina naga, dahayau gara mugixigixindi. 40 Yekop hata tutubinadi sangua Laban bakbagindi saing tadi halianga. Ne bunging hagatangama xugia iniadi mala ba dibagu Laban morung mugixigixindi xaung morung mutuxundi. Bila balau libu bakbagindi disok ditubu, saing tadi rangua Laban morundi te. 41 Bunging bungina hagaxang haringindi duwa mana bunging hagatangama, Yekop bagula rang xai rimandi mali mana minadi asaxadi maxadingia bu dahagata haxek manadi. 42 Ne adi haringing teguamdi, tadi la ba te. Bila balau haringing teguamdi duwa Laban iniadi, ne haringindi duwa Yekop iniadi. 43 Baing ina naga, Yekop xalingindi ditubu sibuna. Sipsibing memeng bakbagindi disok sabanga, haining lipuxing oxata olanggam xumana, xaung kamel donki iniadi xumana.
*30:6 Mana Hibru xuana, Dan waxungtuanoa bila haruanga marang tela namuxinoa suxuya kubolua saing harua ba maringina.
†30:8 Mana Hibru xuana, Naptali waxungtuanoa bila haruanga marang tela namuxinoa malimali.
‡30:11 Gad namuxinoa kubolu dalingam xap.
§30:13 Aser namuxinoa yaha.
*30:14 Mandirek Inglis xuana, ne mana Hibru xuana duxu ba dudaim. Mana bungina baguba dahatum ba nabu daxang, bagula haulidi ba gamoding.
†30:18 Mana Hibru xuana, Isakar waxungtuanoa bila haruanga marang tela namuxinoa giminak.
‡30:20 Mana Hibru xuana, Sebulun waxungtuanoa bila haruanga marang tela namuxinoa iti yaya.
§30:24 Yosep namuxinoa sina tela muli.
*30:37 Poplar xaung plen xaiyadi duwa yabaria te. Mana Hibru xuana yadingdi libne xaung armon. Ludingdi dusa.