49
Yekop Sina Guxama Na Garang Lupdi
1 Baing Yekop wagi garandi ma saing harua ba, “Agugunia taxiya nga bu ngabaxanga nang axamandi bagula disok mang kimu.
2 “Ang Yekop garang mana, agugunia alungu to. Alungu tibuim Isrel haruanganoa xai.
3 “Ruben, ung garagu matuaua,
ung haringingagua, hayauxingama hatanga haringingagua muga.
Yama wa mugamuga, haringingama wa mugamuga.
4 Ne uhalunglung bila lang silingama, binabu bagula uwa mugamuga muli te,
namua na uhaing mana tibum uxainganoa,
ukinu rangua hainigua, udongdongia yaungagua bila ba.✡ Unggutinga (Stat) 35:22
5 “Simion Libai tang maxang taininau,
Waxangiding sabangadi dituxudi dilibu doa mana lipu teladi.
6 Labu hatumingagu taininau mana haruangading dianau tai,
labu ngagabudi mana guguniangadingdiu tai.
Namua na mana atiding disala tang dung lipudi mati,
saing tang duxuxu bulmakaudi kiding waxuwaxundi mana murungadinga ing ganina.
7 Ngabo ba daxap doa mana atiding salianoa, namua na haring buk,
xaung mana gamiangadinga, namua na doa buk!
Bagula ngalibudi dutu ding mauli liwe mana Yekop bakbaginoa
xaung duwa olang olang mauli mana titia Isrel.
8 “Yuda, ung ba, sabangamdi kixingimdi bagula diti yama.
Rimama bagula tuxu bixuamdi waxudingtuandi.
Bagula tibum garang lupdi dituru disina yaya naung.
9 Yuda, ung bila layon tutubing tela,
Garagua, ung asaxa oxong masup, umesa ula ba.
Bila layon haringina urung mari ukinu.
Gaxarea sanga ba haringiaina ba tautitiung?✡ Titinga (Namba) 24:9; Hatanga Masok 5:5
10 Tuki xaitamoxiama sanga ba sup mana Yuda garandi te,
bagula taining tainina tuxu yanama tukinoa,
laing lipua (naga) tuki (wa) inia sok
saing numanumadi dila hawa mana.
11 Yuda wain marandi bagula dibaxagi buk,
bu sanga ba goti donkinoa wain xania,
saing yunga donki tutubinoa ba xang longindi xauna.
Nabu muruna, sanga ba damia imangindi mana wain.
12 Maxandi bagula disabuxa namua na waining xumana,
Waindi bagula dusa namua na nung kau suing langing xumana.
13 “Sebulun bagula wa tek rubinia
saing mata xaidi bagula duwa la ba mana wagadi.
Bagula titing ragunoa ila bila long sabangga Saidon.
14 “Isakar bila donki haringing tela,
kinu titia liwe mana tambingdi.
15 Bungina bagu titinoa xai mana yaguangua baru
xaung xai mana rung mana baru,
bagula xating tuandi bu xoxi axamang mauxangamdi,
saing bagula tuxu oxatua mana teladi bila lipu oxata olanggama.
16 “Dan bagula suxuya bakbagindi mauxangadingdi,
bila Isrel bakbagindi yanamiding teladi dilibu.
17 Dan bagula wa bila moxa tela hisa daxanga rubinia.
Bungina lipu haungingamdi diluki etua hosidi dima,
bagula gaxu kiding tambongdi
bu lipua rung hosia bagula xung mari ubunia.
18 “Toxoratamona, ngata ragunga mana oxop nga muli.
19 “Baing Gad, bagula lipu hanaunggamdi dima dahaunggana,
ne bagula xugia mala saing xudi haungganadi.
20 “Aser angianoa bagula dau sibuna,
saing bagula xauxau anginga xaidi sanga mana xaitamoxidi.
21 “Naptali bila diya* diya—Diya asaxa sabanga monga. Monindi salamiding. hagaxana luki mauli mana ing murunganoa,
bila diya hagaxana hayau gara gumangindi.
22 “Yosep bila wain xana ua xai sibuna,
bila wain xana wa lang maxang rubinia,
rimandi dahaing mala etua mana gamgamingua.
23 Lipu ruanggamdi dahaunggana haringing sibuna,
atiding disala mana binabu dahang mana.
24 Ne Yosep taguxa ruanginoa te,
rimandi gagaxungadingguyu,
namua na Yekop Urana Haringing Sibuna inia haringia rimania,
namua na Lipu Sipsip Wasanganama, Sianga Mana Isrel, hauli,
25 Yosep, tibum Urana inia, ina ung haulingama.
Urana Haringing Sibuna sina guxamdi naung,
guxamgadi diri sabalunia ma,
guxamgadi dahaing suania ma,
guxamgadi bila gara xumana oxopsaxidi.
26 Guxamgadi nga tibum ngasinadi naung
didali guxamgadi dima mana bimbi mugauamdi,
didali guxamgadi dima mana xaxagang bungingbunginaloamdi.
Guxamgadi longgali bagula daxap Yosep,
lipua wa yanama liwe mana sabangandi.
27 “Benyamin bila koma abungina sing saha asaxadi.
Buraragina xang asaxadi ungdi ba.
Bungbung tuxu sinak mana axadi xapdi ba.”
28 Adi li Isrel bakbaging 12. Haruangadi bagudi li tibuding harua nadi bungina sina guxamdi nadi. Sina guxama nadi sanga mana ding taining tainina.
Yekop Matianoa
29 Sup, baing tabinadi ba, “Haxek sibuna bagula ngala ngakinu rangua bakbagigudi. Akimang nga rangua mugangagudi mana guhia wa mana Epron titinoa, lipu Hitam. 30 Guhia ba Makpela, haxek mana longga Mamre mana titia Kenan, guhia ba Ebraham gim xaung titia rangua Epron lipu Hitam bu wa gobagoba (yabanoa).✡ Unggutinga (Stat) 23:3-20 31 La ba dikimang Ebraham haininoa Sara tang, la ba dikimang Aisak haininoa Rebeka tang, saing la ba ngakimang Lea.✡ Unggutinga (Stat) 25:9-10, 35:29 32 Titia xaung guhia wa mana, Ebraham gim rangua Hitdi.”
33 Yekop tabina garandi bila ba, baing iti kindi uxaingia muli, yaganganoa sup saing kinu rangua mugangandi (matiadi yabadingia).✡ Aposel 7:15
✡49:9 Titinga (Namba) 24:9; Hatanga Masok 5:5
*49:21 diya—Diya asaxa sabanga monga. Monindi salamiding.
✡49:30 Unggutinga (Stat) 23:3-20
✡49:31 Unggutinga (Stat) 25:9-10, 35:29