1 Tjercu tsihmucacun naja Nina Nahmi naja. Hisca chja me xi quihndi rë me ngayaan. Peru hacuiin tu suvá chja ni me ta cjuaquixi jain xi quihndi rë me ngayaan. Peru xuta tsehen ne, hvíin me xi quihndi rë Nina ngayaan ta, tsëhë xi hacuiin xuta rë Nina me. 2 Ngayaan tsan ne, quihndë ne, quihndi rë Nina ngayaan. Peru cjëë cumachaya naja mé xcusun xuta cuma ngayaan xi cuma ngascan. Peru ha hyan ta, hya xi cuinduva Cristu ne, cuma ngayaan sacuaha me vëhë ta, tsëhë xi hya ne, chan jain me hacutjin xi jyihi me. 3 Yëjë ni xuta xi tivetahacacun me Cristu ne, sahmi tyjahi suvá me xahasen rë me, sacuatjin tyjahi xahasen rë Cristu.

4 Peru yëjë ni xuta xi hinchajñi ngajñi rë cjuatsehen ne, hatuxa hndiin me tsëhë cjua xi cavitexa Nina. Ta xi hacuiin nuhyaan tsëhë cjua xi cavitexa Nina ne, vëhë xi hmí cjuatsehen. 5 Peru ha hyun ta Cristu ne, canduva me nguehe ngasunhndë, xi cjuahaxin me yëjë ni jyë́ naja. Hane me vëhë ne, hatuxa tsajin camahani jyë́ rë me. 6 Vëhë xi yëjë ni xuta xi cjui nduju me cojo xi macjain rë me Jesucristu ne, ha quihndë tsajin hinchajñi me ngajñi rë cjuatsehen. Peru yëjë ni xuta xi hinchajñi cuaha me ngajñi rë cjuatsehen ne, me vëhë xi hatuxa cavijniircu me hacutjin cjuatacun rë Jesucristu, hacuaha hacuiin xuta rë Jesucristu me.

7 Ngayujun ni tsan ne, nechun cuidadu xi tsajin yo cuindacha nuju. Xuta xi hatuxa hinchajñi me ngajñi rë cjuandaja ne, me vëhë xi tyjahi xahasen rë me, sacuatjin tyjahi xahasen rë Cristu. 8 Peru xuta xi hatuxa hinchajñi me ngajñi rë cjuatsehen ne, tsëhë xitsehen matitjun me ta, tsëhë xi xitsehen matitjun jan ne, hatuxa hisca ntsacu cavetsihin ne, sahmi cjuatsehen. Vëhë xi canduva Quihndi rë Nina ta, tsëhë xi meje tsicjëya me yëjë ni cjuatsehen xi sahmi xitsehen matitjun jan.

9 Xuta xi camá me quihndi rë Nina ne, tsajin hinchajñi me ngajñi rë cjuatsehen ta, tsëhë xi yaha me cjuatacun rë Nina. Hatuxa cumaji xinchajñi me ngajñi rë cjuatsehen ta, tsëhë xi quihndi rë Nina me. 10 Suvá tsejen yo xi quihndi rë Nina, hacuaha suvá tsejen yo xi quihndi rë xitsehen. Ta tu yo ni xi tsajin hinchajñi ngajñi rë cjuandaja, tu yo ni xi tsihmaaicacun xicjin ne, hacuiin quihndi rë Nina.

11 Cjua rë Nina xi canuhyun hisca ntsacu cavetsihin ne, cuitjin chja: meje rë xi nihmutacun xingueen. 12 Mijí rë xi nihña sacuatjin casahmi cha Caín ta cha vëhë ne, quihndi rë xitsehen cha, hacuaha catsiquehen cha hntsë cha. Peru ¿há hyun mé ngatsë rë xi cuatjin catsiquehen cha hntsë cha ni? Catsiquehen cha hntsë cha ngatsë rë cjuaxin ta, tsëhë xi yëjë ni xi casahmi cha ne, hatuxa suvá cjuatsehen, hane xi casahmi hntsë cha ne, hatuxa suvá cjuandaja.

13 Vëhë xi hacuiin cjuercun nuju tsan, hya xi choho scuëë nuju xuta tsehen. 14 Ngayaan ne, nihmutacun xingueen. Hane cuatjin matsejen xi ha cavetjunxen tsëhë ngajñi rë cjuatsehen, caviseen ndiya rë cjuandaja. Peru yo xi tsihmaaicacun xicjin ne, hincha cuaha ngajñi rë cjuatsehen. 15 Yëjë ni xuta xi choho vëë xicjin ne, tangun me cojo xuta xi tsiquehen xicjin. Hane ha hyun ta, yëjë ni xuta xi tsiquehen xicjin ne, tsajin rë me cjuahñu xatsë. 16 Cristu ne, ngatsë rë xi tsihmucacun naja me ne, joho ni rë me xi catsiquehen xuta me. Cuatjin camatsejen xi hmí cjuahmutacun. Hane hacuatjin ngayaan ne, meje rë xi ningatehen xi tsiquehen naja xuta, sa xi cuatjin mameje rë, ngatsë rë xi nihmutacun xingueen. 17 Ngayaan xi tjin chinë tjin hyun ne, sa xi tsajin naja cjuayumatacun hya xi ma chaya naja xi tjin ngu xingueen xi tsajin mé sinë me tsajin mé cuihi me ne, cuatjin matsejen ta tsajin camahani cjuahmutacun rë Nina cahntsua xahasen naja. 18 Mijí rë xi tu cuinújan ni xi nihmutacun xingueen tsan ta meje rë xi nihña cjuandaja, cojo sa xi cumatsejen xi tjin jain naja cjuahmutacun cojo xingueen.

19 Sa xi cuatjin nihña ne, vëhë matsejen xi tsëhë Nina xi cjuaquixi jain ngayaan, hacuaha vëhë xi cumangutacun tu ya ni ni hya xi chjahyan rë me cjuandaja rë me. 20 Hane ha ndasa xahasen naja cuinchajyë naja xcun Nina xi choho nihña ne, peru mijí rë xi cumacjintacun ta, tsëhë xi Nina ne, hitsë sa jyë me cojo cjuatacun rë me xi cumá rë xahasen naja ta, tsëhë xi me vëhë ne, vëë me yëjë ni cjuatacun. 21 Ngajan xi sa xi tsajin mé cuinchajyë naja xahasen naja ne, hacuiin cumacjintacun hya xi chjahyan rë me cjuandaja rë me. 22 Hane me vehe ne, sua naja me yëjë ni xi chjahyan rë me ta, tsëhë xi tinihña yëjë ni hacutjin xi cavitexa me, hacuaha tsëhë xi yëjë ni xi chuya rë me ne, cuatjin tinihña. 23 Cjua xi cavitexa naja Nina ne, cuitjin chja: meje rë me xi catamacjain naja Jesucristu, Quihndi rë me, hacuaha meje rë me xi nihmutacun xingueen. Cuatjin cavitexa me. 24 Hane yëjë ni xuta xi vihndë cjua xi cavitexa Nina ne, tjin tangun cjuatacun rë me cojo Nina, hacuaha Nina ne, jiya cahntsua xahasen rë me. Ngayaan ne, hyan xi jiya Nina cahntsua xahasen naja ta, tsëhë xi casua naja me Hasen rë me.