1 An³ li²coi³ coan³-na³ nca³ tsa³cja²cao⁴-no³, ntsˀe³², jo³-ni³ tsa² je² xi³ nta³ si¹tjo³son²-le⁴ Espíritu Santo. To⁴nca³ tsa³cja²cao⁴-no³ jo³-ni³ tsa² xi³ to⁴cho⁴ta⁴son³ˀnte³, jo³-ni³ tsa² xi³ to⁴ˀnti¹xti³ tˀa³tsˀe⁴ Cristo. 2 Qui³si³cˀi³-no³ nta¹chi³qui³. Li²coi³ tso³jmi² xi³ ta²ja³ qui³tsjoa³-no³, nca⁴ cje³ coan³-jin²sa³no³, ni⁴ntˀai⁴-jin² ma³-no³, 3 nca⁴ to⁴jo³ cˀoa⁴mao³ jo³-ni³ tsa² cho⁴ta⁴son³ˀnte³. Ti¹jna³jin³-no³ cjoa⁴chi⁴ni⁴, cjoa⁴cho³va²ti³ya³-ni³, cˀoa⁴ ncjin² ya³ ma³-nio³. A³ tsi² tsa² jo³-ni³ cho⁴ta⁴son³ˀnte³ mao³, cˀoa⁴ ma³nquin¹cao⁴³ yao³-no³ jo³-ni³ tsa² cho⁴ta⁴son³ˀnte³. 4 To⁴cˀia⁴²-ni³ nca³ tjin¹ xi³ cˀoi⁴coi⁴tso⁴: An³ tsˀe⁴ Pablo nia¹³, cˀoa⁴ je² xi³jnco³: An³ tsˀe⁴ Apolos nia¹³, a³ tsi² tsa² to⁴xquia⁴ cho⁴ta⁴son³ˀntao³. 5 ˀya¹-ni³ tso²cˀoa⁴ Pablo. Cˀoa⁴ ˀya¹-ni³ Apolos. Cho⁴ta⁴ xi³ si¹xa¹-le⁴ Ni³na¹, xi³ to⁴tˀa³tsˀe⁴ nca³ cˀoa⁴-sˀin² coan³cjain¹-no³. Cˀoa⁴-sˀin² Nai³-na¹ qui³tsjoa³-le⁴ xa¹ nca³ jnco¹jnco¹. 6 An³ tsa³cˀe³ntje²³, Apolos tsa³cˀe¹jten⁴nqui³-le⁴ na³nta¹, to⁴nca³ Ni³na¹ xi³ qui³si³jcha¹. 7 Ni⁴je²-jin² xi³ vˀe¹ntje² xi³ chji¹-le⁴, ni⁴je²-jin² xi³ na³nta¹ vˀe¹jten⁴nqui³-le⁴, to⁴nca³ Ni³na¹ xi³ si¹jcha¹. 8 Je² xi³ vˀe¹ntje², cˀoa⁴ je² xi³ na³nta¹ vˀe¹jten⁴nqui³-le⁴, to⁴nco¹son² ma³, nta³ tsa² cˀoai⁴-le⁴ jnco¹jnco¹ je² chji¹-le⁴ jo³-sˀin² coan³ xa¹-le⁴. 9 Nca⁴ jin⁴-jin⁴ to⁴jnco³ ni²xa¹coai⁴-jin⁴ Ni³na¹, cˀoa⁴ jon² nio¹³ ˀnte³-le⁴ jña³ nca³ si¹xa¹ Ni³na¹, cˀoa⁴ jon² nio¹³ ntˀia³-le⁴ xi³ vˀe¹nta³ Ni³na¹.

10 Jo³-sˀin² qui³tsjoa³-na³ cjoa⁴nta³ Ni³na¹, jo³-ni³ je² xi³ nˀion¹ nta³ ma³-le⁴ vˀe¹nta³ ntˀia³, an³ xi³ tsa³cˀe³jna²³ xjao¹ja⁴ma⁴, cˀoa⁴ nqui²jnco³ xi³ vˀe¹nta³son². Jnco¹jnco¹ ca²ta³si¹coi²nta⁴ jo³-sˀin² nca³ vˀe¹nta³son². 11 Ni⁴ˀya³-jin² xi³ coan⁴-le⁴ cˀoe⁴²jna³ nqui²jnco³ xjao¹ja⁴ma⁴ cao⁴-ni³ tsa² je² xi³ je³ti¹jna³ xi³ coi³ Jesucristo. 12 Tsa² ˀya³-ni³ xi³ cˀoe⁴²nta³son²-ni³ xjao¹ja⁴ma⁴-vi⁴ taon⁴si³ne², taon⁴čhoa³, la⁴jao⁴chji¹ xi³ na⁴sca¹ cjoan³, ya¹, li⁴ji⁴, xca⁴, 13 xa¹-le⁴ nca³ jnco¹jnco¹ coan⁴tsen³. Je² ni⁴čhjin³-ve⁴ si⁴²cˀa³tsen³ nca³ cao⁴ lˀi¹ coan⁴tsen³-ni³. Je² lˀi¹-ve⁴ xi³ sco¹tˀa³ xa¹-le⁴ nca³ jnco¹jnco¹ jo³ cjoan³. 14 Tsa² jnco³ xi³ xa¹-le⁴ sˀe⁴jna³, xi³ cˀoa⁴-sˀin² tsa³cˀe¹nta³son², cˀoai⁴-le⁴ chji¹-le⁴. 15 Tsa² jnco³ xi³ xa¹-le⁴ coi⁴ti⁴, cha⁴ chji¹-le⁴, to⁴nca³ je² cho⁴ta⁴-ve⁴ coi⁴tjo³ntjai²-ni¹, to⁴nca³ jo³-ni³ xi³ coi⁴tjo³jin³-ni³ lˀi¹. 16 A³ tsi² tsa² ˀyao³ nca³ jon² xi³ ntˀia³-le⁴ Ni³na¹ ˀmi²-no³, cˀoa⁴ je² Espíritu Santo xi³ tsˀe⁴ Ni³na¹ ti¹jna³jin³ ni⁴ma⁴-no³. 17 Tsa² jnco³ xi³ si¹qui³tson¹ je² ntˀia³-le⁴ Ni³na¹, Ni³na¹ si⁴²qui³tson¹ nca³ je², nca⁴ ntˀia³-le⁴ Ni³na¹ tsje³-ni¹, jña³-le⁴ xi³ coio³ nca³ jon². 18 Ni⁴ˀya³-jin² xi³ ti⁴je² ca²ta³vˀe¹na⁴cha⁴-ni³le⁴ yao³-le⁴. Tsa² ˀya³-ni³ve⁴ jin³-no³ nca³ jon² xi³ to⁴si¹cja³ˀai³tsjen³jin³ nca³ chji⁴ne⁴ i⁴ son³ˀnte³-vi⁴ ntˀai⁴-vi⁴, sca¹ya³ ca²ta³ma³-le⁴, jme¹-ni³ nca³ ña³qui³ chji⁴ne⁴ coan⁴-si¹ni³. 19 Je² cjoa⁴chji⁴ne⁴-le⁴ son³ˀnte³-vi⁴ cjoa⁴sca¹ ni¹ xi³ tˀa³tsˀe⁴ Ni³na¹, nca⁴ cˀoa⁴-sˀin² tji¹tˀa³: Je² xi³ tsoa⁴ cho⁴ta⁴chji⁴ne⁴ ti⁴cˀia⁴-ni³ nca³ sˀin¹ cjoa⁴ma²ña⁴-le⁴. 20 Nqui²jnco³cˀa² tji¹tˀa³: Nai³-na¹ ve³ nca³ je² cjoa⁴fa³ˀai³tsjen³-le⁴ cho⁴ta⁴chji⁴ne⁴ tsi²jme³ chji¹-le⁴. 21 Cˀoa⁴-sˀin² ni⁴jnco³-jin² xi³ ca²ta³vˀa³sje³je³ya³ cho⁴ta⁴, nca⁴ nca³yi³je³ tsaon⁴³ nio¹³. 22 Tsa² Pablo, tsa² Apolos, tsa² Cefas, tsa² je² son³ˀnte³-vi⁴, tsa² cjoa⁴vi³jna³chon³, tsa² cjoa⁴vi³ya³, tsa² je² xi³ ntˀai⁴, tsa² je² xi³ cjoa⁴ˀai¹, nca³yi³je³ tsaon⁴³ nio¹³. 23 Cˀoa⁴ jon² tsˀe⁴ Cristo nio¹³, cˀoa⁴ Cristo tsˀe⁴ Ni³na¹ ni¹.