1 Jña¹ nčhoa¹-ni³no³ cjoa⁴jchan¹ cjoa⁴si³. A³ tsi² tsa² tsˀe⁴ cjoa⁴tsjoa³ xi³ ma³me³-le⁴ ni⁴ma⁴-no³, coi³ xi³ vi³xcan¹-jin³ yao³-no³. 2 Ma³xin²-ta³con²³ jon², to⁴nca³ tsin²-no³. Ni²cˀaon³, to⁴cjoa⁴xin²ta³con² ti¹ti²-nio³, to⁴nca³ li²jme³ xi³ njen⁴-no³. Ni²jchaon¹³, vi³xcaon²³, to⁴nca³ tsin²-no³ jme³ xi³ me³-no³ nca³ tsi²coi³ ni²jao¹³. 3 Ni²jao¹³, to⁴nca³ li²coi³ tjoe¹-no³, chˀao³ tjin¹ xi³ ni²jao¹³ jme¹-ni³ nca³ si⁴chjen¹-si¹nio³ xi³ tˀa³tsˀe⁴ cjoa⁴tsjoa³-no³. 4 Jon² xi³ xˀion⁴³, xi³ ya¹nchjon¹³, xi³ qui³njion²³ ntia⁴²-le⁴ Ni³na¹, a³ tsi² tsa² ˀyao³ nca³ je² xi³ mi²yo⁴-le⁴ cjoa⁴son³-ˀnte³ co²ntran⁴-le⁴ Ni³na¹ ni¹. To⁴ˀya³-ni³ xi³ me³-le⁴ si¹mi²yo⁴ cjoa⁴son³ˀnte³, co²ntran⁴-le⁴ Ni³na¹ ma³. 5 A³ ni²cja³ˀai³tsjen³-nio¹³ nca³ je² xon⁴ Escritura to⁴ya⁴³-ni³ cˀoi⁴tso²: Je² Espíritu xi³ ti¹jna³jin³ntsjai² ni⁴ma⁴-na¹ tjao²que³-na¹ jo³ sa³ˀnta³ ma³chi⁴ni⁴-ni¹. 6 To⁴nca³ je² Ni³na¹ tsjoa¹ xi³ nqui²sa⁴ tse³ cjoa⁴nta³. Coi³ cjoa⁴ cˀoi⁴tso²-ni³: Ni³na¹ vˀe²jna³ta²ja³-le⁴ xi³ ncˀa³con³, tsjoa¹-le⁴ cjoa⁴nta³ je² xi³ i³nta³jin³con³. 7 Ti⁴tjo³son²-lao⁴³ Ni³na¹. Ti⁴yo³ta²ja³-lao⁴³ je² nai⁴², cˀoa⁴-sˀin² coa⁴nca³ tˀa³xin²-ni³no³. 8 Ti⁴čhian³tˀa³-lao⁴³ Ni³na¹, cˀia⁴ cˀoa⁴-ti⁴ je² si⁴²čhian³tˀa³-no³ nca³ jon². Xi³ cho⁴ta⁴jao¹³, ti⁴tsjao³ ntsao⁴³, cˀoa⁴ jon² xi³ jao² vˀao²-ta³con²³ ti⁴tsjao³ ni⁴ma⁴-no³. 9 Ti⁴cjao¹jion³, ti⁴vao³, chi¹ˀntao¹³. Je² cjoa⁴vi³jno²-no³ ca²ta³vˀa³ntjai²ya³ nca³ chi¹ˀntiao¹³. Je² cjoa⁴tsjoa³-no³ cjoa⁴va³ ca²ta³ma³. 10 Ca²ta³fa³ˀa³jen³-no³ nqui³xcon⁴ Nai³-na¹. Cˀoa⁴ je² cˀoa⁴sje³je³ya³-no³.

11 ˀnti¹ntsˀe³, a³li² chˀao³-jin² ˀmi²-lao⁴³ xi²nquio⁴³. Je² xi³ chˀao³ tso²-le⁴ ntsˀe⁴, xi³ ve³sin³ ntsˀe⁴, je²-vi⁴ chˀao³ tso²-le⁴ cjoa⁴te¹xo³ma³, ve³sin³ cjoa⁴te¹xo³ma³. Tsa² ji³ ˀya³sin³ cjoa⁴te¹xo³ma³, li²coi³ ni²tjo³soin²³ cjoa⁴te¹xo³ma³-ve⁴, jo³-ni³ tsa² xca²le⁴ chˀa²sjai³ yao³-li⁴. 12 To⁴jnco³ ma³-ni³ je² xi³ tsjoa¹ cjoa⁴te¹xo³ma³, xi³ ma³-le⁴ vˀa³sje³ntjai², cˀoa⁴ ti⁴je²-ni³ xi³ ma³-le⁴ si¹cha³jin³ cho⁴ta⁴. ˀya¹-ni³ nca³ ji³ nca³ ˀya³sin³ xi³ cja⁴ˀai¹ cho⁴ta⁴.

13 Coe⁴-ni³ ntˀai⁴ jon² xi³ vi³xon¹³: Ntˀai⁴-vi⁴ cao⁴ nchaon³-li⁴ cjoian¹ na⁴xi⁴na³nta¹tse³ jan¹, jnco³ no¹ ya⁴ coi⁴yoa³², cˀoa⁴ coi⁴nta¹ tso³jmi², coi⁴njen⁴son²-na¹. 14 A³li²coi³ ˀyao³ jme³ xi³ coan⁴ nchaon³-li⁴ jnqui³-li⁴. Jme¹-ni³ve⁴ cjoa⁴vi³jna³chon³-no³. Ña³qui³ cjoa⁴qui²xi⁴-ni¹ nca³ jon² jo³-ni³ tsa² yo³jvi³ xi³ vˀa³tsen³ jnco³ tjo², sa³sa³ cha³-ni³. 15 To⁴sa³ cˀoi⁴coi⁴xon¹³: Tsa² je² Nai³-na¹ me³-le⁴, tsa² coi⁴yo³choan³², cˀoa⁴sˀian⁴² je²-vi⁴ a³xo⁴ cˀoa⁴sˀian⁴² xi³ cja⁴ˀai¹. 16 To⁴nca³ ntˀai⁴-vi⁴ nˀo²sje³ncˀao³ yao³-no³ xi³ tˀa³tsˀe⁴ cjoa⁴ncˀa³ta³con²-no³. Chˀao³ tjin¹ nca³yi³je³ jo³-sˀin² nˀo²sje³ncˀao³ yao³-no³. 17 Je² xi³ ma³-le⁴ nca³ nta³ sˀin¹, to⁴nca³ tsi² tsa² cˀoa⁴sˀin¹, je² xi³ tjin¹-le⁴ je¹.