1 Jesús ti¹jna³ jnco³ ˀnte³, ti¹vˀe¹tsˀoa³. Cˀia⁴ nca³ je³tˀa³-le⁴, jnco³ cho⁴ta⁴-le⁴ qui³tso²-le⁴: Señor, ta⁴co²ya³-na³jin⁴ jo³-sˀin² cˀoe¹tsˀoai³⁴-jin⁴, jo³ nca³ qui³sˀin³ Juan nca³ tsa³ca³co¹ya³-le⁴ cho⁴ta⁴-le⁴. 2 Jesús qui³tso²-le⁴: Cˀia⁴ nca³ vˀe²tsˀoao³, cˀoi⁴ ti⁴xon¹³: Nˀai³-na⁴jin⁴ xi³ ti³jnai³ ncˀa³jmi³, ca²ta³ˀya³xcon¹ jan³ˀain¹-li⁴. Ca²tji³nčhoa¹ cjoa⁴te¹xo³ma³-li⁴. Cˀoa⁴ca²ta³sˀin¹ jo³-sˀin² nca³ me³-li², jo³-ni³ ya⁴ ncˀa³jmi³ cˀoa⁴-ti⁴sˀin² i⁴ son³ˀnte³. 3 Tˀai²-na³jin⁴ nio⁴xti²la⁴ xi³ ni⁴čhjin³ nca³ nchaon³ ma³chjen¹-na³jin⁴. 4 Ti⁴cha³tˀa³-na³jin⁴ je² je¹-na⁴jin⁴, nca⁴ cˀoa⁴-ti⁴ jin⁴-jin⁴ ni²cha³tˀa³-lai⁴jin⁴ je² nca³tsˀi³ xi³ qui³tjen⁴-le⁴ tsain⁴-jin⁴. Cˀoa⁴ a³li² cha⁴ni²tˀa³-jin²na³jin⁴ xi³ chˀao³ si¹cao⁴-na³jin⁴, to⁴nca³ chˀa⁴sje³ntjai²-na³jin⁴ xi³ cjoa⁴tsˀen⁴. 5 Cˀoa⁴-ti⁴ Jesús qui³tso²-le⁴: ˀya¹-ni³ xi³ jon²-vi⁴ xi³ tjin¹jnco³-le⁴ mi²yo⁴ xi³ coai⁴con³-le⁴ va³sen³ni⁴tjen⁴, xi³ coi⁴tso⁴-le⁴: Mi²yo⁴, ti⁴quin²ya³ jan²-nai¹³ nio⁴xti²la⁴, 6 nca⁴ jnco³ mi²yo⁴-na⁴ xi³ tso²ˀva³ ya⁴³ ntia⁴² ca²fa³ˀai³con³-na³, cˀoa⁴ tsin²-na³ jme³ xi³ tsjoa³-le⁴. 7 Cˀoa⁴ je² mi²yo⁴-le⁴ ja⁴ya³ ntˀia³-jan¹ nchja⁴-ni³, tso²-le⁴: A³li² an³-jin²³ ni²jti³-nai¹³. Je² xo⁴ntjoa⁴ je³tji¹chjoa², cˀoa⁴ je² ˀnti¹xti³-na⁴ cjio³son²cao⁴-na³ na⁴chan³. A³li²coi³ coan⁴ coi²so⁴tjen⁴ nca³ tsjoa³-le²³. 8 Cˀoa⁴ ti²xin³-no³: Nta³ tsa² tsi² coi⁴so¹tjen⁴ nca³ tsjoa¹-le⁴ xi³ to⁴tˀa³tsˀe⁴ cjoa⁴mi²yo⁴, to⁴coi³ nca³ cjai¹nca³ si³ sˀin¹, coi⁴so¹tjen⁴, tsjoa¹-le⁴ nca³yi³je³ xi³ ma³chjen¹-le⁴. 9 Cˀoa⁴ an³ xi³ xin³-no³ nca³ jon²: Ti⁴jao¹³, cˀoa⁴ cˀoai⁴-no³, ti⁴jnchi¹sjao³, cˀoa⁴ coan⁴sjai³-no³, ti⁴cja³ne³tˀao³ xo⁴ntjoa⁴, cˀoa⁴ tjo¹ˀai²-no³. 10 To⁴ˀya³-ni³ve⁴ xi³ si¹je¹, vˀai²-le⁴. Je² xi³ va³jnqui³sjai³, ma³sjai³-le⁴. Je² xi³ si¹cja³ne³tˀa³ xo⁴ntjoa⁴, tjo¹ˀai²-le⁴. 11 Jña³-le⁴ jon² xi³ nˀai³ ˀmi²-no³, tsa² ˀnti¹-no³ si⁴²je¹-no³ nio⁴xti²la⁴, a³ la⁴jao⁴ cˀoai⁴-lao⁴³. Cˀoa⁴ tsa² jti⁴ si⁴²je¹-no³, a³ ye⁴² cˀoai⁴-lao⁴³. 12 Tsa² si⁴²je¹-no³ chjao⁴², a³ cho⁴na³ˀya¹ cˀoai⁴-lao⁴³. 13 Cˀia⁴ tsa² ma³-no³ jon²-vi⁴ xi³ chˀao³ cjoaon³ nca³ nta³ vˀai²cjoa⁴tjao²-lao⁴³ je² xti³-no³, je² Nˀai³-no³ xi³ ti¹jna³ ya⁴ ncˀa³jmi³, a³ tsi² nqui²sa⁴-sa³ tsjoa¹-le⁴ je² Espíritu Santo je² xi³ si⁴²je¹-le⁴ nca³ je².

14 Cˀia⁴ Jesús ti¹vˀa³sje³xin²-le⁴ jnco³ cho⁴ta⁴ jnco³ nai⁴² xi³ nta³jin³ xi³ yo⁴ma⁴. Cˀia⁴ nca³ je³ji³tjo³xin²-le⁴ nai⁴² xi³ nta³jin³-ve⁴, je² cho⁴ta⁴yo⁴ma⁴ qui³nchja⁴. Cˀoa⁴ nca³tsˀi³ cho⁴ta⁴ to⁴coan³xcon¹-le⁴. 15 To⁴nca³ tjin¹ cˀa³ xi³ qui³tso²: Cao⁴ nca³nˀion¹-le⁴ Beelzebú xi³ nca³jco⁴-le⁴ cho⁴ta⁴nai⁴² vˀa³sje³xin² nai⁴² xi³ nta³jin³. 16 Cˀoa⁴ xi³cˀa³ nca³ tjio¹co³tˀa³ nca³ je², qui³si³je¹-le⁴ choa⁴ xi³ nčhoa¹-ni³ ncˀa³jmi³. 17 To⁴nca³ Jesús tsa³ve³ cjoa⁴fa³ˀai³tsjen³-le⁴, qui³tso²-le⁴: Nca³yi³je³ cjoa⁴te¹xo³ma³ xi³ ma³jao²ya³, xi³ co²ntran⁴ tjio¹-le⁴ xi¹ncjin¹, fi³tson³ya². Cˀoa⁴ jnco³ ntˀia³ xi³ ma³jao²ya³, xi³ co²ntran⁴ tjio¹-le⁴ xi¹ncjin¹, tsao³nti¹jao³. 18 Tsa² cˀoa⁴-ti⁴ je² Satanás ma³jao²ya³, tsa² co²ntran⁴ tjio¹-le⁴ xi¹ncjin¹, jo¹-sˀin² sˀe⁴jna³ cjoa⁴te¹xo³ma³-le⁴, nca⁴ jon² xo⁴ vi³xon¹³ nca³ cao⁴ nca³nˀion¹-le⁴ Beelzebú vˀa³sje³xian²³ nai⁴²-le⁴. 19 Tsa² an³ vˀa³sje³xian²³ nai⁴²-ve⁴ cao⁴ nca³nˀion¹-le⁴ Beelzebú, ja⁴xti³-no³ ˀya¹ cao⁴ tsˀe⁴ nca³nˀion¹ xi³ vˀa³sje³xin²-ni³ˀni³. Coi³ cjoa⁴-vi⁴ xti³-no³ coan³ xca²le⁴, tsjoa¹ cjoa⁴qui²xi⁴ tˀa³tsaon⁴³. 20 To⁴nca³ tsa² an³ cao⁴ na⁴jma¹ntsja³ Ni³na¹ vˀa³sje³xian²³ nai⁴² xi³ nta³jin³-ve⁴, cjoa⁴qui²xi⁴ je³ja³ˀai³-no³ nca³ jon² je² cjoa⁴te¹xo³ma³-le⁴ Ni³na¹. 21 Cˀia⁴ nca³ jnco³ cho⁴ta⁴ xi³ ta²ja³, si¹coi²nta⁴ cao⁴ tjo⁴ ntˀia³nˀion¹-le⁴, cjai¹nca³ nchˀan¹ tjio¹ tso³jmi²-le⁴. 22 To⁴nca³ tsa² nqui²jnco³ cho⁴ta⁴ xi³ nqui²sa⁴ nˀion¹ cao⁴-ni³ tsa² je², cjoa⁴ˀai¹ne², si⁴²qui³njen³-le⁴, cjoa⁴ˀa²-le⁴ nca³yi³je³ tjo⁴-le⁴ xi³ ma³nˀion¹tˀa³con³, cˀoa⁴ cˀoa⁴vi¹son² tso³jmi²-le⁴. 23 Je² xi³ tsi² fi²tˀa³-na³, co²ntran⁴ fi²-na³. Je² xi³ tsi² vˀe¹xco¹cao⁴-na³ vˀe¹tsao³va³. 24 To⁴cˀia⁴-ni³ nca³ je² ntjao⁴ xi³ nta³jin³ coi⁴tjo³-ni³le⁴ cho⁴ta⁴, tso²ˀva³ jña³ nca³ ˀnte³qui³xi², va¹sjai³ jña³ nca³ si⁴²cja¹ya³. Cˀoa⁴ li²coi³ ma³sjai³-le⁴, tso²: Cjoi¹-nca¹nia³ tso²cˀoa⁴ ntˀia³-na⁴ jña³ nca³ ji²tjo⁴-nia³. 25 Cˀia⁴ nca³ ja³ˀai³, je³qui³sa³te²cha², je³coan³ nta³ chon³. 26 Cˀia⁴ fi², cˀoa⁴ nčhoa¹cao⁴ nqui² ña³to³ ntjao⁴ xi³ nta³jin³, xi³ nqui²sa⁴-sa³ chˀao³ cjoan³ cao⁴-ni³ tsa² je². Cˀia⁴ fa³ˀa³sˀen³, ya⁴ va³tio². Je² cho⁴ta⁴-ve⁴ nqui²sa⁴-sa³ chˀao³ ma³ cjoan³ xi³ fe³tˀa³-ni³le⁴ cao⁴-ni³ tsa² xi³ ti¹tjon². 27 Cˀia⁴ nca³ Jesús ti¹tso² je² cjoa⁴, jnco³ chjon⁴² xi³ ya⁴ tjen⁴cao⁴ cho⁴ta⁴ncjin²-ve⁴, nˀion¹ qui³nchja⁴, qui³tso²-le⁴: Jo¹ to⁴nta³-le⁴ tsˀoa⁴ jña³ coan³jcha¹yai³, cˀoa⁴ je² chi³qui³ xi³ tsa³ca²qui³. 28 To⁴nca³ Jesús qui³tso²: Nqui²sa⁴ to⁴xcon¹ nta³-ni³ je² xi³ nčhˀoe¹ en¹-le⁴ Ni³na¹, cˀoa⁴ xi³ si¹tjo³son².

29 Cˀia⁴ nca³ ji³cho² ma³ña³tˀa³-sa³le⁴ cho⁴ta⁴, Jesús tsa³cˀe¹tsˀia⁴cao⁴ nca³ qui³tso²: Je² cho⁴ta⁴ xi³ ntˀai⁴ tjio¹, chˀao³ cjoan³. Va¹sjai³ choa⁴, to⁴nca³ li²coi³ cˀoai⁴-le⁴, to⁴je² choa⁴-le⁴ Jonás xi³ cˀoai⁴-le⁴. 30 Jo³-sˀin² nca³ Jonás qui³sˀe³jna³ choa⁴ xi³ tˀa³tsˀe⁴ cho⁴ta⁴ ninivitas, cˀoa⁴²-ti⁴sˀin² je² ˀnti¹-le⁴ cho⁴ta⁴ sˀe⁴jna³ choa⁴ xi³ tˀa³tsˀe⁴ cho⁴ta⁴ xi³ ntˀai⁴ tjio¹. 31 Je² reina xi³ ya⁴ tsˀe⁴ Sur, cjoa⁴ˀa¹ya³-ni³le⁴ cao⁴ je² cho⁴ta⁴xˀin⁴ xi³ tjio¹ ntˀai⁴, cˀia⁴ nca³ sˀe⁴nta³jin³-le⁴ cjoa⁴ cho⁴ta⁴, cˀoa⁴ cˀia⁴ tsjoa¹-le⁴ cjoa⁴ñˀain³, nca⁴ je² reina ja³ˀai³-ni³ sa³ˀnta³ jña³ fe³tˀa³ son³ˀnte³ nca³ qui³nčhˀoe¹-le⁴ cjoa⁴ˀi³sen³ta³con²-le⁴ Salomón. Coe⁴-ni³ tjin¹ xi³ nqui²sa⁴-sa³ nˀion¹ cao⁴-ni³ tsa² Salomón xi³ i⁴ ti¹jna³-vi⁴. 32 Je² cho⁴ta⁴xˀin⁴ xi³ tsˀe⁴ Nínive, cjoa⁴ˀa¹ya³-ni³le⁴ cao⁴ cho⁴ta⁴ xi³ tjio¹ ntˀai⁴, cˀia⁴ nca³ sˀe⁴nta³jin³-le⁴ cjoa⁴ cho⁴ta⁴, cˀoa⁴ cˀia⁴ tsjoa¹-le⁴ cjoa⁴ñˀain³, nca⁴ je² qui³si³cˀa³ntjai²ya³ cjoa⁴fa³ˀai³tsjen³-le⁴ cˀia⁴ nca³ Jonás qui³nchja⁴ya³jin³-le⁴. Coe⁴-ni³, i⁴ ti¹jna³-vi⁴ jnco³ xi³ nqui²sa⁴²-sa³ to⁴nˀion¹ cao⁴-ni³ tsa² Jonás.

33 Ni⁴jnco³-jin² xi³ vˀe¹jna³ˀma³ lˀi¹ xi³ ti¹ti², ni⁴vˀe¹jna³ˀma³nqui³-jin² ca²xa⁴choa⁴, to⁴nca³ ya⁴ jña³ ma³ si¹ncha¹ya³ lˀi¹, jme¹-ni³ nca³ coan⁴ˀi³sen³-si¹ni³le⁴ je² xi³ cjoa⁴ˀa³sˀen³. 34 Je² xcoan³² lˀi¹-le⁴ ni¹ yao³-na¹. Tsa² je² xcoin³ ña³qui³ nta³, cˀoa⁴²-ti⁴ i³sen³ coan⁴-le⁴ nca³yi³je³ yao³-li⁴. To⁴nca³ tsa² tsi² tsa² nta³ xcoin³, cˀoa⁴²-ti⁴ njion² chon³-le⁴ yao³-li⁴. 35 Ti⁴coi²ntai⁴ tso²cˀoa⁴ je² lˀi¹ xi³ ti¹jna³jin³-li², jme¹-ni³ nca³ tsi² tsa² njion² ma³-si¹ni³le⁴. 36 Cˀoa⁴-sˀin² tsa² nca³yi³je³ yao³-li⁴ coan³ˀi³sen³jin³, nca³ ni⁴ˀi⁴tse¹-jin² cjoa⁴njion² ti¹jna³jin³-le⁴, ña³qui³ coan³ˀi³sen³jin³-ni¹ jo³-sˀin² cˀia⁴ nca³ jnco³ lˀi¹ xi³ nˀion¹ fa³te³ si¹ˀi³sen³-li².

37 Cˀia⁴ nca³ Jesús je³qui³nchja⁴, jnco³ cho⁴ta⁴ fariseo tsa³cˀe¹tsˀoa³-le⁴ nca³ coa⁴cjen⁴cao⁴. Ja³ˀa³sˀen³ Jesús, tsa³cˀe²jna³tˀa³ ya¹mi²xa⁴. 38 Je² cho⁴ta⁴ fariseo coan³xcon¹-le⁴ cˀia⁴ nca³ tsa³ve³ nca³ tsi² tsa³ca³ne¹jon³ ntsja³ to⁴nqui³-ni³ nca³ coa⁴cjen⁴. 39 Je² Señor qui³tso²-le⁴: Jon² xi³ cho⁴ta⁴ fariseo ˀmi²-no³, ya⁴ son²ncˀa³-le⁴ cho⁴tsin¹ cao⁴ čhoa⁴-ve⁴ ni²tsjao³, to⁴nca³ ja⁴ya³ ni⁴ma⁴-no³ tjio¹qui³tse³-ni³ cjoa⁴che¹ cao⁴ cjoa⁴tsˀen⁴. 40 Xi¹jion³, je² xi³ qui³si³nta³ son²ncˀa³-le⁴, a³ tsi² cˀoa⁴-ti⁴ qui³si³nta³ ja⁴ya³-le⁴. 41 To⁴nca³ je² xi³ ncha³ya³ tso³jmi²-no³ tˀai²cjoa⁴tjao²-lao⁴³ xi³ yo⁴ma⁴. Coe⁴-ni³ nca³yi³je³ tsje³ coan⁴-no³. 42 Ma⁴-xo¹nio³ jon², cho⁴ta⁴ fariseo, nca⁴ jnco³ ya³ xi³ te³ya³ ma³-ni³ vˀao²³ xi³ tsˀe⁴ xca⁴xi³ cao⁴ xca⁴ ruda cao⁴ nca³yi³je³ ˀnti¹ xca⁴ntia⁴-ve⁴, to⁴nca³ tˀa³xin² vˀe²jnao³ je² xi³ cjoa⁴qui²xi⁴ cao⁴ cjoa⁴tjao²cha³ xi³ tˀa³tsˀe⁴ Ni³na¹. Je² cjoa⁴-vi⁴ ma³chjen¹ nca³ cˀoa⁴sˀiaon⁴³ tsa²cai³, cˀoa⁴ li²coi³ ma³chjen¹ nca³ ni²cˀe¹yo³tˀa³-xion²³ xi³cˀa³ cjoa⁴-ve⁴. 43 Ma⁴-xo¹nio³ jon², cho⁴ta⁴ fariseo, nca⁴ tsjoa³chao³ ˀnte³ xi³ ti¹tjon² ya⁴³ ntˀia³ sinagoga, cˀoa⁴ cjoa⁴ni²xa³tˀa³-no³ ya⁴ nti⁴tsin⁴-ve⁴. 44 Ma⁴-xo¹nio³ jon², cho⁴ta⁴ scribano cao⁴ cho⁴ta⁴ fariseo, xi³ jao²ncjain¹, xi³ cjoaon³ jo³-ni³ tsa² tsjo¹ xi³ tsi² coi³ ma³tsen³, cˀoa⁴ xi³ vˀe¹ma³son²-le⁴ cho⁴ta⁴ nca³ li²coi³ ve³. 45 Cˀoa⁴ qui³tso² jnco³ cho⁴ta⁴chji⁴ne⁴ xi³ tsˀe⁴ cjoa⁴te¹xo³ma³: Maestro, cˀia⁴ nca³ cˀoa⁴si³ je² cjoa⁴ je²-vi⁴, cˀoa⁴ti⁴ no²cjoa⁴ˀaon³-na³jin⁴. 46 Jesús qui³tso²: Ma⁴-xo¹nio³ nta³ tsa² jon², cho⁴ta⁴chji⁴nao⁴³ xi³ tsˀe⁴ cjoa⁴te¹xo³ma³, nca³ ni²cˀao³ chˀa¹ cho⁴ta⁴ xi³ tsi²coi³ coan⁴ coai⁴cao⁴, to⁴nca³ jon²-vi⁴ ni⁴jnco³-jin² na⁴jma¹ntsao⁴³ ni²cao⁴-nio³ chˀa¹-ve⁴. 47 Ma⁴-xo¹nio³ jon² xi³ vˀe²ntao³ tsjo¹-le⁴ cho⁴ta⁴ xi³ qui³nchja⁴ya³, xi³ nˀai³jcha¹cjin³-no³ qui³si³cˀen³. 48 Cjoa⁴qui²xi⁴ nca³ vˀao²³ en¹, cˀoa⁴ tjio¹jnco³ta³con²³ cjoa⁴ xi³ qui³sˀin³ nˀai³jcha¹cjin³-no³, nca⁴ ña³qui³ cjoa⁴qui²xi⁴ je² ni¹ xi³ qui³si³cˀen³, cˀoa⁴ jon² xi³ vˀe²ntao³ tsjo¹-le⁴. 49 Ni³na¹ cao⁴ cjoa⁴ˀi³sen³ta³con²-le⁴ qui³tso²: Si³ca³sen¹-le⁴ cho⁴ta⁴ xi³ coi⁴nchja⁴ya³ tˀa³tsˀan⁴ cao⁴ xi³ pastro. Si⁴²cˀen³ cˀa³ xi³ tsˀe⁴, cˀoa⁴ xi³cˀa³ coai⁴tjen⁴nqui³ co²ntran⁴-le⁴. 50 Coi³ xi³ sˀian³ jme¹-ni³ nca³ ca²ta³ni²je¹-ni³le⁴ je² cho⁴ta⁴ xi³ ntˀai⁴ tjio¹, je² chji¹-le⁴ njin¹-le⁴ nca³tsˀi³ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹, xi³ qui³xi²jten⁴ sa³ˀnta³ nca³ qui³sˀe³nta³ son³ˀnte³, 51 sa³ˀnta³ njin¹-le⁴ Abel, cˀoa⁴ sa³ˀnta³ njin¹-le⁴ Zacarías xi³ cˀen³ ya⁴ ˀncho²-le⁴ xta²-ve⁴ cao⁴ yo⁴nco⁴. Cˀoa⁴-sˀin² xin³-no³ nca³ si⁴je¹-le⁴ je² cho⁴ta⁴ xi³ ntˀai⁴ tjio¹. 52 Ma⁴-xo¹nio³ cho⁴ta⁴chji⁴ne⁴-le⁴ cjoa⁴te¹xo³ma³, nca⁴ qui³chja³ˀa²xion²³ yo²vi⁴-le⁴ cjoa⁴chji⁴ne⁴. Ti⁴jon²-nio³ li²coi³ ji³tja³sˀaon³, cˀoa⁴ je² xi³ tjio¹fa³ˀa³sˀen³ tsa³cˀe²chjoa²-lao⁴³. 53 Cˀia⁴ nca³ qui³tso²-le⁴ je² cjoa⁴-vi⁴, cho⁴ta⁴ scribano cao⁴ cho⁴ta⁴ fariseo tsa³cˀe¹tsˀia⁴cao⁴ nca³ tse³ tsa³ca¹nˀion¹, qui³si³jtso²ˀa³ ncjin² cjoa⁴. 54 Qui³si³coi²nta⁴ tˀa³xin² jo³ tjio¹co³xin⁴-le⁴ tsa² jme³ xi³ coi⁴nchja⁴, jme¹-ni³ nca³ coa⁴²nqui³-si¹ni³.