19
Zin Israel tila tipet abal Sinai uunu
1-2 To zin Israel timaŋga mini ma tizem Repidim, mi tipa ma tila tipet lele bilimŋana ta zaana Sinai. Pai kizin ta tizem Aikuptu mi tila na, irao ka puulu ru kek. Mi iwe tel pa, to tipet abal Sinai uunu mi tipun su.
3 Mose imaŋga, to isala pa abal be ziru Anutu tiso sua. To Yooba imbot abal uteene, mi iboobo sula pini ma iso: “So pizin Israel ta Yakop popoŋana kini na ta kembei:✡ Ŋgo 7:38 4 ‘Mbulu ta aŋkam pizin Aikuptu na, niom Israel kere kat kek. Mi niom kuute tau nio aŋbis yom kembei manboŋ imbis lutuunu bizin, mi aŋkam yom ma kamar, tana iŋgi koozi kepet tio taiŋgi. 5-6 Tana koozi niom sombe keleŋ la kalŋoŋ, mi motoyom iŋgal sua kiti mbukŋana mi koto, inako kewe leŋ kat, mi itiŋan taparlup ti ma tewe tamen. Ŋonoono, wal boozomen ta timbotmbot toono i, ina nio tio men. Tamen niom na, nio ituŋ aŋroogo yom, mi aŋpeikat yom la karkari mazwan kek, be kewe leŋ wal potomŋan kat. Niom ko kamap ma kewe kembei ta patoronŋana ka tomtom bizin, mi kombot lela peeze tio leleene.’ ”✡ Tit 2:14; 1Pe 2:9; Tur 5:10
7 Yooba iso makiŋ, mi Mose imiili ma isula mini. To iboobo zin kolman kizin Israel ma timar, mi iso zin pa sua ta boozomen tana. Ito Yooba kalŋaana tau. 8 Tileŋ, to timap ma tilup kwon mi tiso: “Sua boozomen ta Yooba iso na, niam ko amto.”
To Mose ikam kalŋan, mi imiili ma isala mini ki Yooba.✡ Kam 24:3 9 Tana Yooba iso pini ma iso: “Leŋ. Nio ko aŋbot lela miiri tieene gabgapŋana mi aŋma ku, tona ituru toso sua ma zin iwal biibi tileŋ. Naso zin tileŋ la kalŋom, mi tiurla sua ku totomen.”
10-11 To Mose iso Yooba pa sua kizin Israel. Yooba ileŋ, to iso pini ta kembei: “Sula mini, mi so pizin be koozi mi gaaga na, zin irao tiŋguuru mburu kizin, mi tiurpe ŋgar ma mbulu kizin ma iŋgeeze men, mi tisa yo. Pa malama to, nio Yooba aŋsu abal Sinai, mi zin ta boozomen tire kat mburoŋ.✡ Ga 4:24+
12 “Tana ur mbut sa ma ipapiliu abal tiŋgi, mi so pizin ta kembei. So: ‘Mbut tiŋgi, kozo komolo pepe. Mi kagarau abal ma keteege pepe. Pa tomtom ta so imolo mbut tiŋgi mi iteege abal, inako kupuni ma imeete. 13 Mi punŋana, nako kupuni pa nomoyom som. Ko kombot molo mi kupun la pini pa pat, som kepeeni. Tana tomtom sa, som mbili sa isombe imolo mbut tana, inako irao imbot na som. Kozo kupuni ma kup. Sua tiŋgi, ko imbol ma irao keleŋ twiiri sa itaŋ ma molo, tonabe niom irao kasala abal.’ ”✡ Ibr 12:20
14-15 Yooba iso sua ma imap, tona Mose izem abal uteene mi isula mini kizin iwal biibi. Isula to iso: “Keleŋ. Kuŋguuru mburu tiom, mi kuurpe ŋgar mi mbulu tiom ma iŋgeeze men, mi tazza Yooba pa malama. Mi kagarau kusiyom bizin pepe.”
Merere iswe itunu pizin Israel
16 Aigule ru imap, mi aigule iwe tel pa, mbeŋbeŋŋana na, miiri tieene gabgapŋana imar ma ilol abal. Mi lele ikuruŋruŋ mi lolo iwenweene. Mi koroŋ ta itaŋ kembei ta twiiri ma kalŋaana biibi kat. Tabe ikam ma zin Israel ta boozomen timoto kat. 17 Tona Mose ikam zin ma tizem lele ta tipun su pa na, mi tila abal uunu be ziŋan Anutu tilup zin.
18-19 To Yooba iswe itunu pizin. Isu kembei ta you. Mi you ka koi gabgapŋana bukbuk ma izze mi itungap ma ilol abal ma sik. To yeŋyeeŋge biibi itok. Mi koroŋ ta itaŋtaŋ kembei ta twiiri na imarmar kolouŋana. Tabe kalŋaana izalla mabe iwe biibi kat.
To Mose iso sua pa Anutu. Beso Anutu ipekel kwoono na, kalŋaana kembei ta lolo ipeene i.✡ Mbo 29:3+; Ibr 12:18+
20 Tana Yooba isu ma imbot sala abal Sinai uteene. Mi iboobo sula pa Mose ma isala kini ta kor a. 21 Isala na, Yooba iso pini ma isombe: “Miili ma sula mini, mi sope zin iwal biibi be timolo mbut tana pepe. Kokena tizooro ma timar be tire yo, to timetmeete. 22 Mi zin patoronŋana kan ta tisombe timar tigarau yo i, na bela tiurpe zitun ma tiŋgeeze kat muŋgu, tona tipet tio. Mi so som, nako zin tomini aŋmaŋga pizin mi aŋpasaana zin.”
23 Mose isu to iso: “Yooba, tomtom sa ko irao ise abal ti na som. Pa nu itum kwom imbol pa tau. Tana niam amur mbut ma ipapiliu abal potomŋana ti uunu kek, be tomtom tire mi timbot molo pa.”
24 Mi Yooba iso pini mini ma iso: “Ambai. Sula mini, mi kam tom Aron ma niomru men kese. Mi re: Kokena zin patoronŋana kan ziŋan zin iwal biibi tizooro mi timolo mbut tana, to aŋmaŋga pizin mi aŋpasaana zin.”
25 Yooba iso makiŋ, to Mose isula mini mi iso zin Israel pa Yooba kalŋaana.