1 Kaimer to Abaraam izem kar Mamre, mi ipa ma ila pa toono Negeb. To ipun su kar Kades mi kar Sur mazwan. Mana imaŋga mini mi ila imbot ri su kar Gerar.

2 Indeeŋe ta Abaraam imbotmbot kar Gerar na, izzo pizin wal kar kan ta kembei: “Sara, ina nio luŋri.” Tabe Abimelek, king ki kar Gerar, iŋgo mbesooŋo kini pakan ma tila, mi tikam Sara ma imar ruumu kini.

3 Tamen mbeŋ na, Abimelek imiu be Anutu imar kini mi iso pini ta kembei: “Abimelek, leŋ! Iŋgi be meete i. Pa moori ta kami na, ni ulaŋana.”

4-5 Tamen Abimelek ila ma igarau Sara zen. Tana iso: “Wai, Merere, nio aŋkam sosor sa, ta sombe pun yo sorok i? Abaraam itunu, ta iso moori tana, ina ni lunuri. Mi Sara tomini iso: ‘Abaraam, ina nio atoŋ.’ Tana nio aŋkam ŋoobo mbulu sa som. Pa nio aŋute? Tana nio leŋ sosor sa som.”

6 To Anutu iso pini: “E, nio aŋute nu ŋgar ku ambai. Uunu tina ta aŋpeteke u be garau Sara pepe. Kokena kam sosor sa pini, to kam sanaana pa nio motoŋ. 7 Tamen kozo ur Sara ma ila ki kusiini Abaraam mini ta buri. Pa tomtom tina, ni iwe nio kwoŋ. Tana ni isombe isuŋ pu, nako meete som. Tamen nu sombe ur Sara ma imiili ma ila ki Abaraam mini som, inako niomŋan wal ku ta boozomen kemetmeete lup.”

8 Mankwoono mbeŋbeŋŋana kat, to Abimelek imaŋga mi iboobo la pa menderŋan kini ta boozomen ma timar, mi iso zin pa sua boozomen ta Anutu iso pini na. Iso makiŋ, to motoŋana biibi ikam zin. 9-10 Tona Abimelek iboobo la pa Abaraam ma imar kini, mi iyaambi ma iso: “Wai, parei ta nu kam mbulu tiŋgi piam? Rimen mi aŋkam sanaana biibi ŋonoono. Nio aŋkam sosor sa pu, ta kam pataŋana tiŋgi ise tiam? Mbulu ta kam pio, ina ambai som kat.”

11-13 Abaraam ipekel kwoono ma iso: “Niam amar kar ku zen, mi aŋkam ŋgar ta kembei: Wal ki kar tana tiute Anutu som, mi timoto i som. Kokena tipun yo ma aŋmeete, mi tikam kusiŋ. Sua tau Sara ina nio luŋri, ina ŋonoono. Pa niamru Sara tomoyam tamen. Tamen noyam ndelndelŋa. Tanata aŋrao aŋkami ma iwe kusiŋ. Muŋgu indeeŋe ta aŋbotmbot ki tamaŋ men na, Anutu iso pio be aŋzem lele ki tamaŋ, mi aŋla ma aŋwwa pa lele pakaana toro. Mazwaana tana, nio aŋso pa Sara ta kembei. Aŋso: ‘Nu sombe lelem pio ilip, nako kam ta kembei: Kar boozomen tabe ituru tala pa i, sombe tiwi u pio, na so pizin: Abaraam, ina nio atoŋ.’ ”

14 Abaraam iso sua tana ma imap, tona Abimelek ikam le sipsip, mekmek, makau, mi mbesooŋo pakan. Mi Sara na, Abimelek iuri ma imiili ma ila ki kusiini Abaraam mini. 15 To Abimelek iso pa Abaraam: “Re. Toono tiŋgi, ina nio tio. Nu sombe lelem be mbot pa pakaana sa, ina ambai.”

16 Mi Sara na, Abimelek iso pini ta kembei: “Re. Nio aŋkam tom le pat milmilŋan munŋaana ta (1,000), bekena wal ku ta boozomen tiute kembei nu kam sosor sa som. Kokena urum isaana.”

17-18 Tona Abaraam isuŋ pa Merere, mi ni iurpe Abimelek ziru kusiini mi zin mbesooŋo moori kini ma tirao be tipeebe pikin mini. Paso, indeeŋe ta Abimelek ikam Sara ma imar ruumu kini na, Merere iur mete sananŋana pa moori boozomen ta timbot lela Abimelek ruumu kini. Tabe tirao tipeebe pikin som.