1 O Yooba, motom ŋgalŋgal Dabit mi pataŋana boozomen ta ni ibaada pa nu zom na.

2 Muŋgu, ni imbuk sua mbolŋana pa Yooba, ta Anutu mbolkeŋkeŋŋana ki Yakop na.

Mi ipombol sua tana ma imbol kat.

3-4 Iso ta kembei: “Nio ti, ko irao aŋlela ruumu tio som,

aŋsu muriŋ be aŋkeene som,

aŋur motoŋ som,

mi aŋkeenekaala ki motoŋ som,

5 ma irao aŋdeeŋe Yooba le lele sa.

Pa ŋgar tio imbol be aŋkam Anutu mbolkeŋkeŋŋana ki Yakop le muriini sa be imbot pa. ✡ Ŋgo 7:46

6 Indeeŋe niam ambot lele pakaana ki Eparata na, amleŋ Sua Mbukŋana Ka Koror uruunu.

Tana amla ma amdeeŋi imbot igarau kar Yar.

7 To amso: “Tamaŋga mi tala Anutu muriini ta Yerusalem a.

To tala tagarau muriini peeze kana, mi telek kumbundu pini ma tapakuri.”

8 O Yooba, maŋga ramaki Sua Mbukŋana Ka Koror ta iswe mburom na, mi la pa murim.

9 Patoronŋana ka tomtom bizin ku ko tikam mbulu ndeeŋeŋana totomen. Ko iwe kembei len mburu be tizebzeebe zin pa.

Mi zin wal ku ta tiurur lelen pu mi titoto mbulu ku na, kalŋan ko izalla mi tiyotyooto raama menmeen zin.

10 Yooba, motom iŋgal mbesooŋo ku Dabit.

Popoŋana kini ta itum roogi mi uri ma iwe king na, pizil ndemem pini pepe.

11 Muŋgu Yooba itunu imbuk sua mbolŋana pa Dabit, mi ipombol ma imbol kat. Tana irao ireege sua tana na som. Sua ta kembei:

“Popoŋana ku tabe tiyooto pu i, nio ko aŋur kizin tasa ma ikelu be imbot se murim peeze kana. ✡ Ŋgo 2:30

12 Mi sombe lutum bizin matan iŋgalŋgal sua tio mbukŋana mi titoto kat ka tutu,

tona lutun bizin tomini kadoono ko tikam murim, mi timbutultul su murim peeze kana, mi iseeŋge iseeŋge ma ila.

Tutu tana, nio ituŋ ko aŋpaute zin pa.”

13 Yooba iroogo kar Sion, mi ikam ma iwe lene kek.

Lele tana, ta ni leleene be imbotmbot pa.

14 Tana iso ta kembei: “Lele ti ko iwe muriŋ be aŋbotmbot pa ma alok.

Nio leleŋ be muriŋ peeze kana imbotmbot lele ta ti.”

15 Nio ko aŋpombol zin Sion kan, mi aŋkampe zin ma tirao kat pa koroŋ ta boozomen.

Tana zin wal ki Sion ta petel zin ma timbot ŋoobo na, nio ko aŋputu zin ma kopon bok.

16 Mi zin patoronŋana kan ki Sion na, nio ko aŋpombolmbol zin pa uraata kizin, mi zin ko tizzwe zaala tabe aŋkamke zin tomtom pa i.

Mi zin wal ki Sion ta tiurur lelen pio mi titoto mbulu tio na, kalŋan ko izalla mi tiyotyooto raama menmeen zin.

17 Popoŋana ki Dabit ta iwe king mi imbotmbot Sion na, nio ko aŋkam i ma zaana mi mburaana iwe biibi.

King ta ituŋ aŋroogi mi aŋuri pa uraata na, nio ko aŋpombolmbol peeze kini, mi iseeŋge iseeŋge ma ila.

Peeze kini ko kembei lam ta iyaryaara totomen. ✡ Mbo 148:14; Lu 1:69

18 Mi nio ko aŋkoto ka koi bizin ma timbotmbot raama kan miaŋ.

Mi mogar ta imbotmbot sala king uteene, nako imilmil ma iŋgeeze kat.