1 Sapos yu laik krosim wanpela man o meri, yu mas tingting gut pastaim. Sapos i no stret long yu krosim em, orait mobeta yu pasim maus. 2 Ating i gutpela sapos yu autim kros bilong yu nau tasol, nogut kros bilong yu i stap oltaim. 3 Sapos yu autim rong bilong yu, orait nem bilong yu bai i no inap kisim bagarap. 4 Yu no ken mekim save long ol manmeri bilong winim kot bilong yu. Bai yu kamap olsem wanpela man i laik mekim pasin marit long wanpela meri, maski meri i laik o nogat. 5 Sampela manmeri i save pasim maus, olsem na ol i manmeri bilong gutpela tingting. Ol arapela i save toktok planti tumas, na ol manmeri i no save laikim ol. 6 Sampela manmeri i save pasim maus i stap, long wanem, ol i no gat toktok. Ol arapela i save sarap, long wanem, ol i save long wanem taim i gutpela long ol i ken toktok. 7 Ol manmeri i gat gutpela tingting, ol bai i pasim maus na i wet i stap inap long taim ol i ken autim tok. Tasol krankiman i mauswara nabaut, em i no save long wanem taim em i mas autim tok. 8 Ol manmeri i no laikim tumas man i save mauswara oltaim na i no save larim ol arapela i autim tok.

9 Long taim nogut ol manmeri inap kisim ol gutpela samting, na long gutpela taim ol inap kisim ol samting nogut. 10 Ating yu inap helpim wanpela man, na em i no bekim long yu. Tasol yu helpim narapela man na bai em i bekim gut long yu, inap long tupela taim. 11 Man i gat biknem, em inap kamap man nating. Na man nating em inap kamap man i gat biknem. 12 Yu tromoi liklik mani bilong baim samting yu ting em i gutpela long yu. Tasol bihain bai yu lusim planti mani long dispela samting. 13 Ol manmeri i save laikim ol manmeri i givim gutpela toktok. Tasol ol i no amamas long kranki man o meri i mekim toktok gris tasol. 14 Sapos dispela man o meri i givim wanpela presen long yu, dispela samting i no inap helpim yu. Em i ting em i givim samting i gutpela tru, tasol em i samting nating. 15 Em i givim liklik samting tasol. Em i mekim planti toktok nogut na i singaut nabaut, bai ol manmeri i ken harim. Nau em i givim dinau, na tumora em i laik kisim bek. Ating yu no save laikim tru kain man o meri olsem. 16 Bai em i tok, “Mi no gat sampela pren. Ol manmeri i no bekim ol gutpela wok bilong mi. 17 Ol i kisim kaikai long mi, tasol bihain ol i tok baksait long mi.” Tru tumas, olgeta manmeri bai i lap oltaim long em.

18 Sapos yu pundaun long rot bai yu kisim bagarap. Tasol sapos yu mekim stori giaman, bai yu kisim bagarap moa yet. Olsem tasol, ol manmeri nogut i kisim bagarap nogut wantu tasol.

19 Ating ol manmeri i les long harim stori bilong ol krankiman, long wanem, ol i save autim stori long taim ol manmeri i no amamas long harim. Olsem tasol, yu bai les long ol manmeri i no save wari long wanem kain toktok ol i mekim.

20 Sapos wanpela krankiman i mekim gutpela toktok, ol manmeri i no ken harim. Long wanem, em i autim dispela toktok long taim ol manmeri i no redi long harim.

21 Sampela manmeri i stap rabis, olsem na ol i no gat rot bilong mekim sin. Ol i ken slip gut na ol i no ken wari.

22 Sampela manmeri i save bagarapim ol yet long ai bilong ol krankiman.

23 Sampela manmeri i save mekim promis long ol pren bilong ol, long wanem, ol i sem long tok nogat. Sori tumas, ol i mekim promis nating, na ol pren bai i kamap birua bilong ol.

24 Pasin giaman em i olsem pipia i stap long nem bilong ol manmeri. Tasol ol krankiman i save mekim dispela pasin giaman oltaim. 25 Ol manmeri i no inap laikim ol manmeri i save stil na ol i no inap laikim tru ol manmeri i save giaman oltaim. Tupela lain wantaim bai i kisim bagarap. 26 Ol manmeri i save giaman ol bai i kisim nem nogut, na oltaim ol bai i sem.

27 Ol manmeri i gat gutpela tingting, bai ol i go het, long wanem, ol i save autim gutpela toktok tasol. Na ol manmeri i gat save bai ol i stap gut, long wanem, ol bikman i laikim kain manmeri olsem. 28 Ol manmeri i wokim gut gaden bilong ol, ol bai i kisim planti kaikai. Na ol manmeri i mekim gutpela wok, ol bikman i save laikim ol. Ol bai i no wari tumas long ol liklik rong ol dispela manmeri i bin mekim.

29 Maski ol manmeri i gat gutpela tingting, ol tu i ken paul na kamap olsem ol aipas, sapos ol manmeri i givim ol kain kain presen long ol bilong grisim ol. Ol bai i bihainim laik bilong ol dispela manmeri na ol bai i givim baksait long ol manmeri i laik stretim pasin bilong ol.

30 Gutpela tingting ol manmeri i no autim, em i olsem wanpela bokis mani i stap hait. Em i stap nating na i no inap helpim ol manmeri. 31 I gutpela sapos ol manmeri i haitim longlong tingting bilong ol. Tasol em i no gutpela tumas, sapos ol i haitim gutpela tingting bilong ol.