1 Oplera Mir teosmelu Zonaim, Amataira werem kega, “Bakiamu Ninebeiem able auka uteb, a abi able opem detager ableglam abi lera adud tonar tabakiamudari kari opge ekweidari.” 2 Ege Zonade no nerut gab etaruklu e abi bakiamulu Zopaem ge nade nar barsirer Tasis atiem. 3 E tabara ati bodomalam dikailu a akawerti able narge waiakai e ko obadmirikdari Opleilam ege Oplelut au wag temariklu, auka wag nade able nar akailu arap paikaige ga dawer. 4 Pazar eudi geumge bakeri a netatnetat taba agudem erer bakrier a bakeri narlam beberlu erepda adem dikrida ko able nar waikaidarda perper obaidari. 5 Zona ge kikem bakiamulu muige ut tipereder. 6 Narkolelut ge abi terdari a abi titmeri, “Ma nalu ikeli ut nauperidi? Eti a mara agud damos upiatidarem karim e merbi ia nasge watidikerare a mi iako nole nabaume.” 7 Able pazar tabara netatnetat batagerda, “Baru mi lu dakeware a daraimrare able luglugira atamilam pe netira gem able au wagide deremli.” Able pazargize ga lu dikeuda ege able luglugira tag bamarida Zonaim. 8 Wi eudi abi itmerda, “Ma kerbi detagrare nako marialam paki uridli muige able adud paikaige? Nalu pema ikeli? Na gedlam ma tabakiamudari? Ma na gedbuai nali?” 9 “Ka Ibru nali”, Zonade iabi daratagrare. “Ka isorgiru waikerer able Ople, able Agud kotorira, ge e able gur a gesep daratagmi.” 10 Wi umele urder Zona Opleilam tabadmiriklu. Ablegide iabi geum dararepda wige batkarti, “Ma naluglam able korepge tabadmirikda?” 11 Able wag a gur ekelei aukaise adud belei. Able pazargize abi itmerda, “Ki marim nalu akairare waiakai able au wagira urker wedemri?” 12 “Kari able gurem natimdare a ei wakai mapodan obai. Ka umele kaka giz nali ableglam able auka adud wagide wabi derpeda.” 13 Ege able pazargize no mirem kelaru uzer erebda ko able nar waigareda gesepem a wi umerkak waikadarda ableglam able wagira urker no ko aukaise baisweri. 14 Wi ga eudim Opleim erer bakri, “Ople, ki mari namosa, ma nole kerbi dikerare nabaume ese ki able lera idid adem dakadarare.” 15 A wi Zonai erpeidarda adem batawereda gurem ege keko metalug barki. 16 Ablegide able pazar nakerda Oplei geumge bakeri, wi eudim agimurda tabara zegulu a mir idagda kega wi no abi tebteb wadamilare. 17 A Oplei Mirlam au laret Zonai irmilu a ega dawer neis a netat gerger a ki muige able au larira kem.