1 Abele sabath iobaru, Maria Magadalena, a Maria, Iakobo ra apu, a Salome debe laglag lu terapei, uiaba ko Iesu ra kem dedered.

2 Uiaba aoem tabarki bane ge, abele kekiam gerger sefen, kerker lem eupamada.

3 Uiaba mer atager, kega, Nete de meribim baker erparik abele kur telam?

4 Ui dasmer, a erdali baker emetu kei erparkei: au baker peik.

5 Uiaba aoem barot, a makeriam dasmer tuter pek emeri, zazer uali ame; uiaba bazigmaret.

6 E uiabim detager, kega, Uaba azigmaret kak: uaba Iesu Nazareta le deraimer, abele le emetu satauroem; E iako eded akaida; E nole ike; dasmer abele uteb uiaba abi ikedi!

7 Ua bakeamlam, a abara kaimeg giz a Peteruim detager, kega, E kekiam bakeamulu uabi opem Galilaiaem; uaba ko abi erdali abele uteb, mokakalam ababur ge E uabim detager.

8 Uiaba sobkak teosmeda, a koreder aolam; uiaba durdur, a orida: epe uiaba nole nerute le mer atager kak; abelelam ui geum ge.

9 Iesu emetu eded akaida idim ge, abele gerger kekiam sefen, E Maria Magadalena kekiam paret kak osmeda, E sefen demoni ditrida abele koskerlam.

10 E dali bakeamulu, a uiabim gaire le Iesu ra kemem natomelu, uiaba noge okasosok a bazoli.

11 Uiaba asereda Iesu eded akaida, pako E kosker paret kak osmeda, uiaba nole oatur kak.

12 Abele gaire lu iobaru, Iesu paret kak osmeda nerute tonar uiabim neisi uiaba boai, ui gab ge gedub bakeam.

13 Ui bakeam a uiaba boai natomelu; epe uiaba ui nole oatur kak.

14 Keubu, Iesu paret kak osmeda uiabim gaire elefen le, uiaba aroem; E uiabi nakereda nole oatur kaklam, a kelarkelar nerkep, abelelam uiaba nole oatur kak abele gaire le abi dasmer E eded akaida.

15 Ege E uiabim detagereda, kega, Ua bakeuare gaire ged narida uridili, a ko euangelia marao uiabim gaire le uridili.

16 Ese nerute le oituli, a emetu bapataiso, E ko eded: ese nerute le nole oatur kak, E ko eumilu.

17 Abele gaire atamelam ko irmilare gaire le oituli: uiaba ko demoni giz dituaki kara nei de; uiaba ko detager uader ged ra kodomer;

18 Uiaba ko tabu giz erpei, ese uiaba eudeud lukup ereli, uiaba nole eud kak; uiaba ko tag giz gim le giz dikmerik, uiaba nadgirauem.

19 Iesu Opole emetu uiabim daratagereda, iako abim bakuarda kotorem, a Ade ra tuter tag emeri.

20 Ui bakeuare, a marao gaire ged uridili, Opole uiabi kemem dorge, a abele mer ageakarem, gaire adigir de irmili. Amen.