10
1 Inoke Samuwela olibe enonona ana patuna etega i ahe ge i hol Sol kokowanaa, yaka i nalo ge i baek elana i ba, “Enonu ya hol kokowamwa kaiwena Yehoba i hilewa nu tabwa iya wana gamagalau hot Isileli ali tonul.* Topapasikal pana Gilik elana (toto alana ta ba Septuagint) puna ya ana tubwi hi teli i ola hiwe: Yehoba wana gamagalau nu logugui-agil ge nu pwamwalil ali topihigelgel elal, heliya hi mipainagil. He bugul bolo hiwe abwe nihi gan nihi ola etotohi ge nu atena tunahot Yehoba i hilewa nu tabwa wana gamagalau hot ali tonul. 2 Sauga nu eguluwagau ge nu nawanawa, yaka bolau labui nu pwawal tubula Letiyeli ana salai gegelinaa panuwa Selsa elana, un Beniyamina wali labi ana sigaa. Yaka wam wasa nihi pewa nihi ba, ‘Donki bolo kaiweliya ku loyaloya iyaka hi pwawal. He tamwam iyaka nige al i nuwanuwatu kaiweliya, yaa komiu kaiwemiu te i nuwanuwatu. Iya iyoho i nelnel i ba, “Ga na ola ge natu na pwawa?” ’
3 “Yaka abwe nu novevehe al nu na nu vin panuwa Tabo abwakilina bwabwalena elana, yaka bolau eton al nu pwawal hi nanawa panuwa Betel kaiwena ge nihi tapwalolo Yabowaine elana. Etegana goti natunau eton ni kalivail, eluwana beleid eton ni noahel, ge etonina oine ana patuna etega goti kunisina elana hi ginoliya ni kalivai. 4 Yaka alomwau nuku pemumulolu ge beleid eluwa nihi pewa ginebi wam yaliyaya nu ahe.
5 “Toto o enaa, abwe nu na Gibeya, iya Yabowaine wana oya. He labi o Pilistiya wali tolohaveyan wali abaholavi etega iyoho to. Sauga nu novin panuwa gegelinaa, yaka palopitau ali boda nu pwawal hi loem oyaa abapowona. Enuna nihi houwa egalagalavenu hapi, tambalin ge gita nihi lolol ge igo nihi yuyu, yaka gegewel Yehoba Yayaluwana wana gasisi elana nihi wonawona ge nihi sagasaga. 6 Inoke sauga o Yehoba Yayaluwana ni lau eliyam ge ni pagetoga-agiwa, yaka alomwau nuku wonawona ge nuku sagasaga. 7 He sauga ebo etotohi bolo ya baunagil nihi tabwa tunahot, yaka hauna u nuwatuan i waisi tage nu ginol, nu ginol ya, kaiwena Yabowaine ni miminaa eliyam.
8 “He nu houwa maniniwa nu na nu lau panuwa Gilgal. Nu matamatan lan ana gewi seben, yaka abwe na nowa, inoke bwasumu na powonan pwabwalige, ge heliheliyam powonina na ginol. Yaka wam wasa na pewa hauna abwe nu ginol.”
9 Sauga Sol i mipil ge ena i pek Samuwela elana ni eguluwai, yaka Yabowaine Sol yawalina i pil pavavaluna, ge etotohi gegewena bolo Samuwela i baunan, lan o hi tabwa tunahot. 10 He sauga Sol ge wana totuwalali hi vin panuwa Gibeya, yaka palopitau ali boda hi pwawal. Inoke Yabowaine Yayaluwana wana gasisi i lau Sol elana, yaka alonau hi wonawona ge hi sagasaga. 11 Gamagalau bolo Sol hi atena, wana ginol o hi kite inoke hi penelnel-agil hi ba, “Hauna gun i gan Kisi natuna Sol elana? Bi ola iya al palopita avaliya etega?”
12 Tau etega i miminaa to, analiya i lahe i ba, “He palopitau ya, henala tamaliya?”* Totalisi tomaha wali nuwatu baaba ya ali sapu kaiwena. Yaa tabam ana sapu i ola hiwe: palopitau tamaliya te Yehoba, iya te i pabaaba-agil, o ebo i pawonawona ge i pasagasaga-agil. Inoke bosowaina ya Yehoba Yayaluwana ni lau Sol elana ge ni tabwa palopita. Yaka heliya wali baaba etega hi babaa ola hiwe, “Bi ola Sol iya al palopita avaliya etega.” 13 He Sol i wonawona ge i sagasaga haba, yaka abwe i na i ha oyaa abapowona.
14 Sauga etega Sol tamana talina i nel Sol alona ge wana totuwalali elal i ba, “Ga ku nanawaa?”
Anana Sol i lahe i ba, “Ha na donki bolo hi tatayaomal ha loyaagil, yaa nige ha pwapwawal, yaka ha na Samuwela elana.”
15 Inoke tau o i nel i ba, “No wasa ku pem Samuwela ga i ba ola eliyamiu.”
16 Anana Sol i lahe i ba, “I baem eliyama te donki bolo hi tatayaomal iyaka hi pwawal.” Yaa nige i wawasaan te Samuwela i baek elana i ba, “Owa abwe nu tabwa Isileli wali kin.”
Sol Hi Hile I Tabwa Kin
17 Sauga etega al Samuwela boda Isileli i yoga gogonil hi na panuwa Mispa ge hi talmilila Yehoba awonaa. 18 Inoke i baek elal i ba, “Yehoba, Isileli wala Yabowaine, i ba ola hiwe: Ya pwamwalimiu Itipita nimaliyaa ya ahemiu ku tagilem Itipita ku nem Kenani. Ge ya pwamwalimiu abalogugui ona elal bolo wali logugui ana gasisi i paanlowagimiu. 19 Yaa bwagana ya pwamwalimiu ami pulowan ge ami nak gegewel elal, he nau wami Yabowaine iyaka ku towaagau. Inoke ku awanun elau ku ba, ‘Wama kin etega nu pem ge ni logugui-agima.’ He ami un ge un, pwahiya ge pwahiya, nuku nem nuku talmilil nau Yehoba maniniwa.”
20 Sauga Samuwela i ba Isileli un ge un hi notagil, yaka Yehoba un Beniyamina i hile.* He nige ta aatena Isileli ga hi ginol ola ge Yehoba wana hilihili o hi atena. Yaa tabam pat ali etotohi gaganina Ulim ge Tamim hi patuwalali. Ulim ge Tamim nu kite Baaba Ona ali Sapu ana Abaloya elana, lamwa 241 Abatelipuna, Totagil, Yosuwa, Ludi, Daniyela ge Yona ali buki elana. 21 Yaka Samuwela i ba un Beniyamina pwahiya ge pwahiya hi notagil, yaka Yehoba pwahiya Matili i hile. Yaka abwe pwahiya o gamwanaa Yehoba Sol i hile, iya Kisi natuna. Yaa hi loyaloya nige hi pwapwawa. 22 Inoke hi nel Yehoba elana hi ba, “Tab Sol i nem e?”
Wali nel i lahe i ba, “E, iyaka i nem, iya iyoho i bunsumi bugubugul gamwaliyaa.”
23 Yaka hi patalelu hi na hi ahe tagilan ge hi en pwatanik i talmilil boda gamwaliyaa. Iya i yapu hot alonau gegewel hi sikala ya te vevelana elana. 24 Yaka Samuwela i baek Isileli gegewel elal i ba, “Ku kite! Tau toto e iya te Yehoba i hile i tabwa wami kin. He nige etega al i gagan boda Isileli gamwalaa i oola iya.”
Yaka gegewel hi yoga hi ba, “Wama kin yawalina ni yapu!”
25 Yaka Samuwela kin ali logugui i ba pwamwananal gamagalau elal. Inoke i leli tukan buki etega elana ge i na i teli Yehoba manininaa. Yaka abwe gamagalau i patunal hi sikal wali panuwa tomaha ona elal.
26 He Sol al ge i na wana panuwaa Gibeya, alonau bolau gasigasisel enuna bolo ateliya Yabowaine i pihikan nihi tabwa Sol ana tototoulil. 27 Yaa gamagalau sisigal enuna hi kite lowan inoke hi ba, “Tau ya bosowaina ya ni pwamwalila?” Yaka nige mulolu etega hi pwapwatanik elana. Yaa Sol nige baaba etega i babaunan kaiweliya.
*10:1: Topapasikal pana Gilik elana (toto alana ta ba Septuagint) puna ya ana tubwi hi teli i ola hiwe: Yehoba wana gamagalau nu logugui-agil ge nu pwamwalil ali topihigelgel elal, heliya hi mipainagil. He bugul bolo hiwe abwe nihi gan nihi ola etotohi ge nu atena tunahot Yehoba i hilewa nu tabwa wana gamagalau hot ali tonul.
*10:12: Totalisi tomaha wali nuwatu baaba ya ali sapu kaiwena. Yaa tabam ana sapu i ola hiwe: palopitau tamaliya te Yehoba, iya te i pabaaba-agil, o ebo i pawonawona ge i pasagasaga-agil. Inoke bosowaina ya Yehoba Yayaluwana ni lau Sol elana ge ni tabwa palopita.
*10:20: He nige ta aatena Isileli ga hi ginol ola ge Yehoba wana hilihili o hi atena. Yaa tabam pat ali etotohi gaganina Ulim ge Tamim hi patuwalali. Ulim ge Tamim nu kite Baaba Ona ali Sapu ana Abaloya elana, lamwa 241 Abatelipuna, Totagil, Yosuwa, Ludi, Daniyela ge Yona ali buki elana.