26
Deibid Sol Yawalina I Pwamwal Palabuina
1 Sauga etega Sip gamagaliliyau enuna hi na Sol wana panuwaa Gibeya ge hi baek elana hi ba, “Deibid iyoho i bunsumi Oya Hakila, toto labi kekevana Diyesimon i awoni.”
Inoke Sol alonau wana tolohaveyan hi na Deibid hi loyaan. Sol i holaviya kamwasa bebenaa, yaka Deibid i nok labi o ge i kite pwawa Sol ge wana tolohaveyan wali tohouwa Abna ga hi kenuwa. Inoke bulina alona Abisai hi tuk abaholavi elana hi na Sol labenaa. He Sol iyoho i kenu mati ge wana gau i antawan kokowana labenaa. (puna 2-7)
8 Abisai i baek Deibid elana i ba, “Lan ya Yabowaine am topihigelgel i teli nimwamwa. Nu ba inoke totona wana gau elana alona ge bilibili na howa toyawel. Na howa kamwase ya, he nige na giginol palabuina.”
Yaa Deibid i ba, “Bahiwa! Ya awanun Yehoba ni labeyau ge bahi iya wana hilihili gamagalina na aapanak.” Yaka Sol wana gau ge ana wewel ana patuna hi ahe ge hi egon. (puna 9-12)
Deibid i na ana bwaga i yapu ge i yoga Abna elana i ba, “Ga i ola ge kin nige u mamatahikan bubun? Matam u lipwapwati. Wana gau ge ana wewel ana patuna heliya ga?” (puna 13-16)
Sol Deibid anana ana gun i hago ge i atena, yaka i ba, “Natu Deibid, owa anam ei?” Anana Deibid i lahe i ba, “Ee, i ola.” Yaka i ba vevehe al i ba, “Ga i ola ge u takeyau? Hauna ya ginol panak?” (puna 17-20)
Yaka Sol i ba, “Lan ya yawaliu u kite pwabwata ge u pwamwalau, inoke nige al na lologasisi tage na apanakiwa. No ginol i ola tokokona ge ya gegi nabi.” (puna 21)
Anana Deibid i lahe i ba, “O kin, wam gau hiwe. Wam heval etega nu patunam ge ni ahe. Lan ya yawalim ya kite pwabwata ge ya pwamwaliwa, inoke ya awanun Yehoba yawaliu ni kite pwabwata ge ni pwamwalau no pulowan gegewel elal.” (puna 22-24)
25 Yaka Sol i baek Deibid elana i ba, “Natu Deibid, Yehoba ni muloluagiwa! Tunahot hauna ebo nu ginol, nasi ni waisi ge nu gasisi.”
Yaka Deibid i noegon ge Sol i sikal wana panuwaa.